گوادر ءِ کوھی دمگاں پوجی لشکر کشی برجاہ، نوکیں بنجلے جوڑ کنگ بیتگ

دی بلوچستان پوسٹ

سر بیتگیں ھالانی رد ءَ گوادر ءِ کوھی دمگ ساھجی کوہ، دور کنڈگ، کنڈاسول، ھُر، بشولی، زریں بگ ءُ بازیں ھند ءُ دمگ پاکستانی پوج ءَ گوستگیں روچ ءَ انگیر ءَ کرتگ اَنت ءُ لشکر کشی بندات کرتگ –

دمگی مردماں ٹی بی پی ءَ گوں گپ کنان ءَ گوشتگ کہ گوستگیں روچ ءَ پاکستانی پوج بازیں کَچے ءَ دشت ءِ جتا جتائیں دمگاں اتکگ ءُ مُچ بیتگ اَنت کوھی دمگ پوج ءَ انگیر کرتگ ءُ لشکر کشی بندات کرتگ –

دمگی مردمانی رد ءَ گوادر ساھجی ءِ کوھی دمگ کنڈاسول ءَ پاکستانی پوج ءَ یک نوکیں بنجلے جوڑ کرتگ ءُ راہ ءُ در بستگ اَنت –

آیاں گوشت کہ گوستگیں روچ ءَ جھلی پوج ءِ کمک ءَ برزی ءَ بالگرد ھم بال بیتگ اَنت ءُ جاہ جاہ ءَ بالگردانی تیرگواری کنگ ءِ ھال ھم بیتگ اَنت –

زانگ بہ بیت بلوچستان ءِ جتا جتائیں جاھاں پوجی لشکر کشی برجاہ اَنت ءُ گوستگیں وھد ءَ پنجگور گچک ءَ پوجی لشکر کشی کنگ بیتگ ءُ ھمے لشکر کشی دراج کش کنگ ءُ کیچ ءُ گوادر ءِ دشت ءِ دمگاں کنگ بیگ ءَ اِنت –

زانگ بہ بیت گوستگیں ماہ ءَ اوماڑہ ءِ کوھی دمگ بزی ءِ کنڈگ ءَ پاکستانی پوج ءِ سر ءَ اُرش کنگ بیتگ اَت کہ اے اُرش ءِ زمہ واری بلوچستان ءِ آجوئی لوٹوکیں ھمسنتیں گل آجوئی سنگر “براس ” جارکش بلوچ ھان ءَ منّ اِتگ اَت –

اُرش ءَ پاکستانی پوج ءِ بازیں کارندھے جنگ بیتگ اَت ءُ آیانی اکس چاگردی رسانکدراں ھم شنگ بیتگ اِت اَنت –

بلوچستان ءِ سیاسی ءُ چاگردی مردمانی گوشگ اِنت کہ پوج ءِ سر ءَ بیتگیں اُرشاں پد پاکستانی پوج لس میتگانی سر ءَ بیڑ بارت ءُ لس دست ءُ گوشیں مردماں نشانگ کنگ ءَ اِنت –

گوادر ساھجی دشت ءِ پوجی لشکر کشی ءِ بارو ءَ تنی وھدی پوجی واکدارانی نیمگ ءَ ھچ ھال دیم ءَ نیاتکگ اَنت –