مشکے ءَ ناشناسیں مردمانی تیرگواری ءَ دو کَس بیران

دی بلوچستان پوسٹ

سربیتگیں ھالانی رِد ءَ بلوچستان ءِ کوھی دمگ مشکے زھمڑو میری میتگ ءَ ناشناسیں مردمانی تیرگواری ءَ ساھو نامیں مردے ءِ دو گھار زتک بیران بوتگ اَنت –

بیران بوتگیں ورنایانی پجار واجو ءُ شعیب ء محمد عمر ءِ نام ءَ چہ بوتگ انت – دوئیں ورنا ھما وھد ءَ تیر جنگ ءُ کشگ بوتگ اَنت کہ پس ءُ دلوتانی چارینگ ءَ شتگ بوتگ انت –

دمگی مردمانی گوشگ اِنت کہ تیرگواری کنوکانی سیادی پاکستانی پوج ءِ جوڑ کرتگیں گل ڈیتھ اسکواڈ ءَ اِنت –

زانگ بہ بیت بلوچستان ءَ سیادی داروکیں سیاسی ءُ چاگردی مردمانی بھتام اِنت کہ پاکستانی پوج ءَ ڈیتھ اسکواڈ جوڑ کرتگ ءُ لس مردمانی کُشت ءُ کوشگ ءَ ھوار چاگرد ءِ دگہ سِلکاریاں ھوار اِنت –

ھمے وڑ گوستگیں وھداں تربت ڈنک ءَ یک لوگے ءِ سر ءَ تیرگواری ءَ یک زالبولے ءِ بیرانی ءَ پد دمگی مردماں آئی ءِ کوشکارانی سیادی ڈیتھ اسکواڈ کرتگ اَت –

بلے تنی وھدی کُشندہ دزگیر ءُ نانکہ دمگ ءِ واکدارانی نیمگ ءَ چوشیں گامگیجے گندگ ءَ اتکگ –