آزمانک: پدائیں – نیاز ناز بلوچ

نبشتانک: آزمانک: پدائیں

نبشتہ کار: نیاز ناز بلوچ

سپر سک دراج ات شپ سیاه تھار ات، پد ءَ پند ات ءُ زمستاں ات همک سنگت ءَ وتی کمبل ءِ هوری ءَ تیوگیں ورگی مڈی هم گون ات انت ءُ سپر جنان ات انت گوریچ هم پہ وڑے شیک شیک ءَ کشگ ءَ ات چہ سارتی ءَ تیوگیں سنگتانی هون گش ئے بند ات ءُ دست کلمپوگ جوڑ بوتگ ات انت روان روان ءَ دان شپ وتی گڈی پاس ءَ سر ات دراجیں پند ءُ گرانیں مڈیاں چہ سنگتاں سک دمبرتگ ات گڑا سلا اش کت کہ داریں ءُ دمے بالا کنیں داں سھب بہ بیت-

سارتی ءَ چہ وپسگ نہ بوت ریک هم انچو سارت ات کہ تو گش ئے چو مسلے برپ ءَ ات کس واب کپگ ءَ نہ ات بس شگل ات کندگ ات ءُ ٹھک دیوکائی ات،
همد ءَ سنگتے ءَ درائینت اڑے تماشا کت هماهاں کہ انو ماں گسانی توک ءَ گرمیں کمبلانی تلا انت ءُ وش واب انت مارا سارتی ءَ وتی پنجگاں گوں انچو پریتکگ کہ جان ھشک انت،
کش ءِ نشتگیں سنگت ءَ گون بچکندے ءَ درائینت تو سنگ ءِ مرمر لوٹ ئے ءُ سنگ ءِ مرمر ترا ماں گرمیں کمبلانی تھا نہ رس ایت پد ءَ دراھیں سنگتاں ٹھک دات-

بام ءَ داتگ ات نوں روچ ءِ کسان کسانیں شھم چہ کوهانی سر ءَ درائی کنگ ءَ ات انت چاه تیار ات کلیں سنگتاں چاه وارت ءُ چیزے سنگت گوں نان ءِ پچگ ءَ گلائیش بوت، یکے گوں ڈڈ سریں لوبیا ءِ گرادگ ءَ دلگوش ات ءُ لھتیں اے دیم ءُ آ دیم ءَ تُر وران ات آئی ءَ کسانوکیں سھتے بوت کہ واب کپتگ دان گوانکو ءَ توار کت-

هلو منی چک تو جوڑ ءُ وش ئے؟ وتی هکاں من ءَ شری سر ءَ پھل کن، باریں هال کن شما پس کشتگ اگاں نا؟آئی ءِ مات ءَ تیوگیں جست ءُ گپ یکیں گین ءَ گوں کت انت،ما شکریں اما، اما مرچی ائید-

ھو اما، ما پس کشتگ گوں پوست جنگ ءَ گلائیش ایں، بس انچو پارک بہ ایں گڑا وتی نوکیں گُد ءُ چمپلان پِر کنیں ءُ ائید ءِ اکساں گران ءُ پہ ترا روان هم دیاں-

شریں منی بچ من پہ ترا تباھگ ایر کناں پد ءَ الم بیا دست اش گر بلکیں منی دل ءَ شرتر ایر بہ کنز انت-

شریں اما!

نان ورگ ءَ پد آ پد ءَ دیم پہ وتی سپر ءَ رھادگ گپت انت…… روان بوت انت دیم پہ وتی منزل ءِ نیمگ ءَ-

آئی ءِ مات ءَ آئی ءِ تباهگانی بهر اسپیتین پلاسٹکے ءَ کتگ ات انت ءُ کل ءِ دیم ءَ دراتکگ ات انت ءُ وداریگ ات کہ کد منی مھرانی چراگ کیت ءُ بارت اش-

بلے پنچ ماه گوستگ ات کہ آ انگت وتی تباهگانی رند ءَ نیاتکگ ات تباهگ انگت ءَ کل ءِ دیم ءَ اسپیتیں پلاسٹک ءِ توک ءَ ات انت ءُ کل ءِ تیر ءَ گون درتکگ ات انت-

مرچی روچ ءِ ٹک ءَ گوں تیوگیں میتگ ءَ گڑ ءُ منج ات هرکسی وٹسپانی پروپائل مٹ بوان ات انت همک گس ءَ ءُ همک مرد ءِ دپ ءَ بس همے یکیں گپ ات مرچی همل ءِ جیئند ءِ کسہ دوبر نوک بوت-

آئی ءِ مات انگت ماں کل ءَ نشتگ ات ءُ وتی بچ ءِ وداریگ ات، آ پاد اتک ٹی وی ءِ بٹن ءِ جت تاں بلاھیں ھیسکارگے جت ئِے ءُ بے هوش بوت-

آ اسپیتیں پلاسٹک انگت کل ءِ دیم ءَ درتکگ ات گوات کشگ ءَ ات ءُ آ چیک ورگ ءَ ات-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔