گورکوپ ءَ پاکستانی پوج ءِ سر ءَ اُرش، اُرش ءِ زمہ واری بی آر اے ءَ منّ اِتگ

دی بلوچستان پوسٹ

سر بیتگیں ھالانی رد ءَ مروچی کیچ ءِ دمگ گورکوپ ءَ ناشناسیں سلاہ بندیں مردماں پاکستانی پوج ءِ کاروان ءِ سر ءَ اُرش کرتگ –

دمگی ھالانی تہ ءَ اُرش ھما وھد ءَ کنگ بیتگ کہ پاکستانی پوج وتی کاروان ءَ گوں روگ ءَ بیتگ کہ ناشناسیں مردماں نشانگ کرتگ –

دومی نیمگ ءَ بلوچ ریپبلکن آرمی ءِ جارکش ءَ گورکوپ ءَ بیتگیں اُرش ءِ زمہ واری منّ اِتگ –

بلوچ ریپبلکن آرمی ءِ جارکش بیبگر بلوچ ءَ رسانکدر شنگ کرتگیں وتی درشان ءِ تہ ءَ گوشتگ کہ مروچی سھب ءَ پاکستانی پوج ءِ ھپت گاڑیانی کاروان ھما وھد ءَ نشانگ کرتگ پوج دمگی مردمانی چریکانی ھمراھاھی ءَ دمگ ءَ لشکر کشی ءَ روگ ءَ بیتگ –

جارکش ءَ گوشت کہ اُرش ءِ زد ءَ دو گاڑی اتکگ اَنت سرجم ءَ پُرشتگ اَنت کہ چریشی ءَ سواریں شش کارمند مرتگ اَنت ءُ چار زدگ بیتگ اَنت –

بیبگر بلوچ ءَ گْوشت کہ زورگریں پوج بلوچ سرمچارانی دست ءَ پروش ورگ ءَ پد وتی زھر ءَ لس دمگ ءِ سر ءَ کش اِیت –

گڈ سر ءَ جارکش ءَ گْوشت کہ زورگریں پاکستانی پوج ءِ ھلاپ ءَ راجی آجوئی ءَ داں مئے سلاہ بندیں جھد ءُ جھد برجاہ مان اِیت –