نبشتانک: دیوانے گوں ناکو مراد بکش ءَ
راج ءِ جست ءُ ناکو ءِ پسّو
نبشتہ کار : سفرخان بلوچ
دی بلوچستان پوسٹ
دیوان برجاہ اَت ، ناکو جُستانی پسّو ءَ دَیَگ ءَ اَت۔ ما گْونڈیں اُوشتے زُرت ءُ ناکو ءَ توار جت گْونڈلے ءَ مئے واستا چاہ آؤرت اَنت ۔ اے ساھت ءَ انگور ءِ چیر ءَ گْوات ھم لھم لھم ءَ کشّگ ءَ اَت ۔ ما چاہ وارت ءُ پد ءَ من ناکو ءَ را گْوشت ، جست انگت اِیر اِنت اِیشانی پسّو ترا دَیَگی اِنت۔ ناکو ءَ گْوشت ھو راج زھر کنگ نہ بیت، پسّو الم دَیَگی اَنت۔ مئے ھست ءُ نیست راج اِنت، من چم پہ جُستاں شانک دات اَنت داں منی دیم اے جست کپت ، من گْوشت ناکو اے جُست چہ جھاؤ ءَ سنگتے ءَ دیم داتگ ءُ جست کنگ ءَ اِنت ک تئی ھیال ءَ آ کُجام سبب اِنت کہ انگت ءَ بلوچ ءِ جنگ یک منظمیں سیاسی پارٹی یے ءِ دست ءِ چیر ءَ نہ اِنت؟ ءُ ھاس بلوچ تیوگیں مسلح گل یک سیاسی پارٹی ءِ دست ءِ چیر ءَ پہ چی ءَ کار نہ کن اَنت ؟ دومی مئے چاگرد ءِ توک ءَ پرچا سیاسی پارٹی ءَ چہ گیش تر مسلح گل ارزِشت دَیَگ بیت؟
ناکو ءَ دست ریشانی سر ءَ لتاران اَت ءُ گُشاد گُشاد ءَ گْوشت کہ اے گْونڈل ءَ یک جستے ءِ تہ ءَ بازیں جست یکجاہ کتگ ، ھیر من وتی کد ء ھِساب ءَ اے جستاں یک یک کنان ءُ آیانی پسّو ءَ دے آں۔ اولی جُست کہ گْونڈل ءَ کتگ جنگ پرچا یک سیاسی پارٹی ءِ پابند نہ اِنت،بچار گْونڈل اِد ءَ اے گْوشگ لوٹ اِیت کہ گوں جنگ ءَ بندوکیں گل ءُ پارٹی پرچا یک سرفیس پارٹی ءِ پابند نہ اَنت۔ چوناھیگا لوٹ ءُ ھمیش اِنت کہ درس یک پارٹی یے پابند بہ بَہ اَنت ، بلے آ پارٹی کُجام اِنت؟ اے ھم یک جستے وتی تہ ءَ وت آ پارٹی ماس پارٹی اِنت نوں الم تو اے ھم جیڑے کہ اے ماس پارٹی چی یے؟ بہ گِندے تو ماس پارٹی ءِ نام ھم اِش کتگ، بلے بیا کہ جست ءُ پسّوانی تہ ءَ دگہ یک جستے ودی بوت آ اِش اِنت ھیا بلوچ ءِ کرّ ءَ ماس پارٹی ھست ، گُڑا اِد ءَ الم انسان جیڑ اِیت چہ جیڑگ ءَ پد پسّو کَیت اِنّا ماس پارٹی نیست ، دومی تئی ھیال ءَ اے ھم کَیت گڑا “بلوچ نیشنل موومنٹ” آ دگہ پارٹی چی اَنت ؟ نوں اِد ءَ اے گپ کیت بی این ایم آ دگہ پارٹی ماس پارٹی ءِ دعویدار تو ھست اَنت بلے ماس پارٹی ءِ ھما لوٹ بنت آ تنی وھدی سرجم نہ اَنت- پرچا سرجم نہ اَنت ؟ آئی ءِ ھاتر ءَ بس یک گپّے من جن آں ، چوش کہ ما تنی وھدی سیاست ءَ سرپد نہ اِنت یا پارٹی ءُ آرگنائزیشن ءَ ، اِد ءَ بچار مئے ھرچی کہ وانندہ ءُ آ دگہ گل ھست اَنت ، آ گْوش اَنت ما آزاد ءُ خودمختاریں، بلے راستی چُوش نہ اِنت وانندہ گلاں الم پارٹی ءِ پابند بُوَگی اِنت انچوش آدگہ ھرچی آرگنائزیشن بَہ اَنت آیاں ھم یک پارٹی یے پابند بُوَگی اِنت انچوش پہ نام نا بلکیں آیانی پیسلہ ءُ پالیسیاں ھم ھما بِہ ٹھیں اَنت گُڑا یک ماس پارٹی یے لوٹ پورا بَہ اَنت ، بلے مئے کرّ ءَ تو وانندہ گل ءِ ورنایاں بِہ گْوش کہ شُما پارٹی ءِ پابند اِت یا آئی وِنگ اِت گُڑا آ ورنا تئی کِشگ ءَ چک ءُ پد نہ بیت ، اگاں ما سیاست ءُ آرگنائزیشن ءِ جند بہ زانت اِیں چی اِنت ، گڑا مئے پوزیشن اے ھم نہ بوت ۔۔۔دومی جست ات کہ ،،پرچا سرفیس پارٹی ءَ گیش مزاحمتی گلاں ارزشت دے اَنت ، مئے مھلونک،،؟ منی ھیال ءَ جست ءِ پسّو بُرز ءِ جُست ءِ پسّو ءِ تہ ءَ من دات اگاں ما سیاست ءَ سرپد بہ بَہ اِیں کہ سیاست چی یے ، مئے لوٹ چی اَنت؟ ءُ پیسلہ کے کنت کہ کَے ءَ را کجا کار کنگی اِنت اگاں انچوش ھرکس وت سرا بِہ گْوش اِیت کہ من اے کناں یا آ کناں گُڑا چوش و نہ بیت یک ریاستے ءِ تہ ءَ ھرکس ھما پیلڈ ءَ ماہرءُ بلد بیت آئرا ھما جاگہ ءَ کار گیت چوناھیگا آشوبی ءُ آجوئی ءِ جھدانی تہ ءَ پارٹی ریاست ءِ نعم البدل بیت۔۔۔بلے ھما چیزے جند گار اِنت ، چوناھیگا بلوچ ءِ کرّ ءَ اے وھدی ابید مزاحمت ءَ ھم دگہ راہ نیست –
ناکو دگہ ھم یک جستے سنگتے ءَ چہ شاپک ءَ دیم داتگ آ گشی اے وھد ءَ بلوچ لیڈر شپ ءِ سوب مندی ءُ بے سوبی ءِ بابت ءَ تئی ھیال چی اَنت؟ –
ناکو ءَ گْوشت بچار ورنا اے یک بلائیں پیسلایے بیت کہ من بہ گوش آں لیڈر شپ سوب مند بوتگ یا بے سوب ، ھاں نزوری ھست اے وھد ءَ سک باز نزوری ھست بلے سوب مندی ءُ بے سوبی تنی وھدی سک دُور اِنت دانکہ بلوچ ءِ یک زھگے اے گپ ءَ مار اِیت بلوچ گُلام اِنت ،بلوچ بے سوب نہ اِنت وھد ءِ ھمرائی ءَ جُھد ءِ اندر ءَ پیچ ءُ تاب کاینت انچیں وھدے بئیت جھد بلکیں سرجم ءَ ھاموش بہ بیت بلے پد ءَ بندات بیت گُڑا ما اِیشرا بے سوبی گْوشت نہ کن اِیں ھاں اگاں جست اے بوت اِیں کہ لیڈر شپ ءِ نزوری چی اِنت گُڑا ما گپ کت بلے جست دگرے ۔
ناکو ءَ کہ اے جست ءِ پسّو دات من گْوشت ناکو دگہ لھتیں جست ھست کہ اے جستانی سیادی راج کاری ءُ راجی جنز ءَ گوں نہ اِنت ، اے گیشتر چاگردی جُست اَنت ایشانی پسّو ءَ بِہ دے گوں۔
ناکو ءَ گْوشت ھو ھرچی کہ من زان آں ایشانی پسّو ءَ الم دے آں
گُڑا من جُست ایر کت کہ ناکو یک سنگتے ءَ چہ کیچ ءَ اے جست کتگ کہ مروچی باندا فیس بک ءَ نبشتہ کار انچوش باز اِنت کہ ایشانی وانگ ءَ پد مردُم ءَ سما بیت کہ مردم نزانت من چی وانگ ءَ اُوں ءُ نبشتہ کار نزانت من چی نبشتہ کتگ؟-
ناکو ءَ پسو دات ھو من برے برے گڑا فیس بک ءَ سیل کناں ایشاں من گنداں، من وت ھیران بَہ آں کہ ایشاں چی نبشتہ کتگ من کہ چینچو دیستگ ایشانی تہ ءَ گیشتر زالبول بوتگ ، بیا من گوں تو کِسّہ کناں ، یکروچے من فیس بک ءَ چاران اِت آں دانکہ منی چمانی دیم ءَ یک ورنایے نبشتگے کپت من ونت من ءَ دوست بوت ، ایشی ءِ درشانداب انچوش اَت مردُم نبشتانک ءَ بِہ وان اِیت ھمے مار اِیت کہ مردم ھما جاگہ ءَ گردگ ءَ اِنت اے من ونت لائیک ءِ جت گوں منی لائیک ءَ اشی دو بوت انت اے وھد ءَ منی چمّاں اے نبشتانک کپتگ ات اے وھدے اشی بیست ءُ سے گھنٹہ ءَ ساری شنگ کتگ ات، ھمے روچاں من کمو جھل ءَ شتاں دانکہ گنداں یک بانکے ءَ چار لائن نبشتہ کتگ من واللہ سرپد نہ بوت آں ، بانک ءَ چی نبشتہ کتگ بلے اِشی کمنٹ ءُ لائیک من دیستاں من لاچار بوتاں کہ دوبر بواناں کہ اشی چی نبشتہ کتگ، بلکن منی اگل ءَ نیاتکگ من سے چار رند ءَ ونت ترا باور کنت اے نبشتانک ءِ جندے نہ اَت ، من پدا شتاں کمنٹاں چاراں انچیں دل ءُ پُل انچیں ارس ریچوکائی توبہ توبہ پد ءَ لھتیں ءُ گْوشگ اِنت ،،بازوش،جنزاں،، من وَ ھیران بوتاں یک کورے چوں دگرے ءَ گْوش اِیت کہ جنزاں کہ راہ تو گپتگ پد ءَ دگہ یک چیزے کہ اے دُرس لُنڈ انت ءُ درس غیر سنجیدئیں مردم اَنت ، نوں ایشاں مردم چی گْوشت کنت ، بلے راستی ھمیش انت کہ اے گوں وتی غیر سنجیدگی ءَ یکے نوکی ردوم زورگ ءَ انت ھمائی ءَ تبائی ءِ نیمگ ءَ برگ ءَ اَنت آئرا حوصلہ دَیگ ءَ نہ انت ، بلکیں آئی ءِ پاداں تپر جَنَگ ءَ اَنت ، تو اگاں آئی ءِ دوست بوتین ئِے تو آئرا گْوشت اے جاگہ ءَ اے رد اِنت ، اے یک تبائی یے ، اِشی ءِ سرا مھلونک الم دلگوش گْور بِہ کنت ۔
ناکو ءَ اے جست ءِ پسّو دات ءُ گْوشت ، باریں سفر خان دگہ ھست یا ھلاس بوتاں، من گْوشت بس منی جند ءِ یک کسانیں جُستے ھست
ناکو ءَ ٹھکے دات ءُ گْوشت کسانیں جستانی پسو ءَ مردم کسان گُڑا دنت-
کت جست کت، زندگی چی یے؟
ناک ءَ پہ بچکند پسّو دات ءُ گْوشت۔۔۔زندگی ناسرجمیں کِسّھے!
ناکو ءَ منی جست ءِ پسّو دات من چہ انگور ءِ چیر ءَ پاد آتکاں ءُ دیم پہ ناکو ءِ ڈگارانی نیمگ ءَ دات ءُ کَوش شیکگ ءَ اَت۔۔۔
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔