پنجگور: گچک ءَ آپریشن بندات ، سَے مردم بیگواہ

دی بلوچستان پوسٹ

بلوچستان ءِ دمگ پنجگور ءَ پاکستانی پوج ءِ آپریشن بندات کرتگ، آپریشن ءِ میان ءَ پاکستانی پوج ءَ سَے مردم آوار جتگ ءُ چیریں جاھاں بُرتگ اَنت –

اھوالکار ءِ رِد ءَ پنجگور دمگ گچک بگر داں جوری ءُ کنڈگ پاکستانی پوج ءِ انگیر ءَ اَنت ءُ اے آپریشن ءَ پاکستانی پوج مزنیں کساسے ءَ بھر زرتگ آپریشن بندات کُرتگ وھدے کہ پاکستانی پوج ءَ بالگردانی کمک ھم گون اَنت –

اے آپریشن ءَ سَے شوانگ ءِ ھم آوار جنی ءِ ھال انت کہ آھانی تہ ءَ دو مردمانی پجار اللہ داد ءُ شاہ مراد ءِ ناماں بوتگ انت وھدےکہ سیمی مردم پجار دنیگت ءَ نہ بوتگ کہ پاکستانی پوج ءَ آوار جتگ ءُ بندیگ کرتگ انت –

زانگ بہ بیت گچک ءُ چپ چاگردی دمگاں چہ ماہ ءِ اگست ءَ پاکستانی پوج ءِ آپریشن برجاہ انت کہ تنی وھدی پنجاہ ءَ گیش مردم آوار جنی ءَ پد بیگواہ کنگ بوتگ کہ آھانی تہ ءَ چُک ءُ جنین ھم ھوار انت کہ آھانی تہ ءَ لھتے مردم یلا کنگ بوتگ ءُ وھدے کہ بازیں گار اَنت-