زامران ءَ پاکستانی پوج ءِ سر ءَ اُرش، اُرش ءِ زمہ واری یو بی اے ءَ منّ اِتگ

سیمسری بندگ ءِ سر ءَ ٹٹ جنوکیں زورگریں پوج وتی نشانگ کرتگ – مزار بلوچ

دی بلوچستان پوسٹ

ٹی بی پی پتر ءَ سربوتگیں ھالانی رِد ءَ مروچی بلوچستان ءِ سیمسری دمگ زامران گونجتو ءِ میتگ ءَ ناشناسیں سلاہ بندیں مردماں پاکستانی پوج ءِ سر ءَ مزن ءُ کسانیں سلاھاں گوں اُرش کُتگ – اُرش ءِ آسر ءَ پاکستانی پوج ءَ جانی ءُ مالی تاوان رس اتگ –

اھوالکار ءِ رِد ءَ اے اُرش ھما وھد ءَ کنگ بوتگ کہ پاکستانی پوج ءِ گاڑی سیمسری بندی ءِ سر ءَ ٹٹ جنوکیں کارمندانی پھازگ ءِ ھاتر ءَ تر ءُ گرد کنگ ءَ بوتگ کہ سلاہ بندیں مردماں آئی ءِ سر ءَ اُرش کتگ ءُ تچگ ءُ رؤگ ءَ سوبمند بوتگ انت –

دومی نیمگ ءَ بلوچ سلاہ بندیں گل یونائیٹڈ بلوچ آرمی ءِ جارکش مزار بلوچ ءَ رسانکدراں وتی شنگ کرتگیں درشان ءِ تہ ءَ اے اُرش ءِ زمہ واری منّ اِتگ گوشتگ کہ مئے سرمچاراں کیچ ءِ دمگ زامران گونجتو ءَ سیمسری بندی ءِ سر ءَ ٹٹ جنوکیں زورگریں پوج ءِ پھزگی گاڑی ءِ سر ءَ کسان ءُ مزنیں سلاھانی گون ءَ اُرش کُتگ –

جارکش ءَ گوشتگ اے اُرش ءَ زورگریں پوج ءِ گاڑی ءَ سک باز تاوان رس اِتگ ءُ گاڑی ءَ سواریں کارمند مرتگ ءُ زدگ بوتگ انت – وھدیکہ مئے سرمچار درآیگ ءُ رؤگ ءَ سوبمند بوتگ انت وتی اوتاگ ءَ سر بوتگ انت –

جارکش ءَ وتی درشان ءِ تہ ءَ بلوچ راج یک رندے پد ءَ مکن کرتگ گُشتگ کہ آ پاکستانی پوج ءُ زورگریں بند ساچی بنجلاں چہ گستا بہ بنت، سرمچارانی اُرش ءَ ھروڑیں تاوان ءِ زمہ وار پاکستانی زورگریں پوج ءِ نزیکی داروک وت بہ انت –

گڈسر ءَ جارکش مزار بلوچ ءَ گوشتگ کہ بلوچستان ءِ آجوئی تاں مئے اُرش برجاہ مان انت –