دیوانے گوں ناکو مراد بکش ءَ
سرھال:راج ءِ جُست ءُ ناکو ءِ پسّو
سفرخان بلوچ
دی بلوچستان پوسٹ
ناکو آئی ءَ پیسر کہ من جُستانی امباراں پچ بہ کن آں، منی ھیال ءَ چاھے بہ بیت۔ اے گپ من ھما وھد ءَ کُت کہ ، من ناکو گْوشتگ اَت لھتیں جُست پہ ترا منی کِرّ ءَ مھلونک ءَ دیم داتگ اِیشانی پسّو ءَ کدیں دئے۔ ناکو ءَ گْوشت انوں! ناکو ءَ منی گپ ءِ پسّو ھم دات ءُ گْوشت، بیا رویں مچکدگ ءَ انگور ءِ چیر ءَ نِندیں دیوان کن آں۔ ما چہ لوگ ءَ درآتکاں ءُ ناکو ءِ لوگانی دیمی نیمگے مچکدگ ءَ شُتاں ءُ انگور ءِ چیر ءَ نشتاں۔ من گوں نِندگ ءَ ھوار وتی جستانی امبار پچ کت۔
من گْوشت ناکو چہ پروم ءَ ترا جوھر سلام دَیَگ انت ءُ جست کنگ اِنت، ھما ورنا کہ کوہ ءَ گوں شُدلاپی ءَ جنگ ءَ اَنت ، آیانی جنگی ءُ زِند گُزران ءِ لوٹ ءُ زلورت پرچا پورا نہ اَنت؟
ناکو ءَ گوں سلام ترّینگ ءَ ھوار گْوشت! بچار اگاں من گپ ءَ اے دیم ءُ آ دیم بہ کن آں کُتے ؤ کناں کہ پرچا سنگتانی زلورت پورا نہ بنت ۔ لھتیں کتابی درور ھم دات کناں کہ پِلاں جاگہ ءَ چوش بوتگ ، بلے من اِد ءَ یک گپّے گیش کنگ لوٹاں کہ تھنا کوہ ءَ نندوکیں سنگتانی زلورت پورا بُوَگ ءَ نہ اَنت؟ یا مئے یک کارے ھم شری ءَ بُوَگ ءَ نہ اِنت؟ دومی گپ مئے کِرّ ءَ کُجام کار اِنت کہ سرجم ءُ پہ طریقہ ء کار بُوَگ ءَ اِنت۔ یک چوشیں کارے تو من ءَ پیش بدار کہ سرجم ءُ طریقہ ءِ سر ءَ بُوَگ اِنت۔ راستی ؤ اش اِنت کہ مئے پوزیشن ھم اے نہ انت کہ سنگتاں دو وھد ءِ ورگ مہ رس اِیت، مئے کِرّ ءَ ادارہ نیست کار کنگ ءُ پرمائینگ ءِ طریقہ نیست ، مئے کِرّ ءَ ھرچ چیز اللہ ھیر ءِ سر ءَ اِنت ، ما اگاں بچاراں ما کُجام کار ءِ سر ءَ منصوبہ بندی کُتگ آ کار گُڑا تاریخی کار بوتگ اَنت۔ تئی کِرّ ءَ شریں منصوبہ بندی مہ بیت ، ادارہ مہ بیت ، برابری مہ بیت چیز درس اللہ ھیر ءِ سر ءَ بہ بنت الم انچوش بیت، دگہ یک گپّے گْوش آں مئے سیاسی رویہ ءِ تھا پاکستان ءِ سیاست کنوکیں مردُمانی سیاسی رویہ ءِ تھا ھاسیں پرکے نیست، بس ما وت ءَ انقلابی مردم گوش آں بلے راستی ءَ انقلابی بُوَگ ءَ تیار نہ اِیں ، یک گپّے ھست آشوب وتی زھگ ءَ وت وارت ۔ ءُ اے گپ فرانس ءِ انقلاب ءَ پد دیم ءَ آتکگ ، اے ھما مردمانی کُشگ ءَ پد دیم ءَ آتکگ کہ فرانس ءِ آشوبی مردماں وتی زاتی مفادانی واستا وتی مردم وت کُشتگ اَنت ءُ پد ءِ آیاناں دگراں کُشتگ۔
ناکو دگہ یک جستے کہ اے سنگت گْوش اِیت منی نام ءَ مہ گر ، بلے جست چو اے وڑ ءَ اِنت کہ ناکو تو مظاہرہ نہ منّ ئے ، تو سفارت کاری نہ منّ ئے، ریلی ءُ جلسہ ، جلوس نہ منّ ئے، تو ھچ نہ منّ ئے ، تو گْوش ئے دِگہ ھچ مکن اِت بس جنگ بہ کن اِت ، جنگ ؟
تو بگُش؟ بلوچ ءِ کِرّ ءَ ابید چہ جنگ ءَ دِگہ چی پشت کپتگ ، ھپتاد سال ءِ تھا آ دگہ دُرائیں راہ ما کارمرز کتگ اَنت مارا چی رستگ ؟ مروچی اگاں بلوچ ءِ پجّار رکّ اِتگ آ ھمے جنگ ءِ بدولت اِنت، بلوچ ءَ ریلی کتگ ،مظاہرہ کتگ ، لانگ مارچ کتگ بلوچ راج ءَ را چی رستگ؟ بچار اے سنگت ءِ جُست منی جند ءِ سر ءَ کتگ ، من گڑا وتی جواب ءَ دے آں کہ من نا انسانی ھکّانی پاسبانے ءَ آں ، نیکہ دگہ سوشل میڈیا اکٹیویسٹ ءُ خود ساختہ سفیر ءِ آں ، من اے سرپداں بلوچ گُلام اِنت ءُ آجو کنگی اِنت۔ بس ھرچی کنگی اِنت ، پہ آجوئی ءِ جھد ءَ کنگی اِنت ۔ ماما قدیر سئے ھزار کلو میٹر لانگ مارچ کنت، بلے انگت بیگوائیں بلوچ آجو نہ بنت۔ چی ءَ کہ آزادی ترا پہ کوکار ءَ چوں رس اِیت؟ اگاں راستی ءَ تو لوٹ ئے بلوچ آجو بہ بیت ، گُڑا جنگ بہ کن ۔ جنگی مردمانی ھمایت ءَ بہ کن ۔ ھر وڑ ءَ آیانی ھمراہ ببُو ، آیانی کارانی تہ ءَ ھمراہ ببُو، دگہ پہ ترا ھچ راہ پشت نہ کپتگ ۔ھاں! پہ وتی جند ءِ رد دَیَگ ءَ تو ھزار کار کُت کن ئے ، بلے دُرس بے پائدہ۔
من ناکو گْوشت، ناکو تو اِد ءَ گپّے کار مرز کت من سرپد نہ بوت آں۔ چو مانگیش اِتگیں گپّے اَت۔ خودساختہ سفیر ؟ اِد ءَ تو چی گْوشگ لوٹ ئے ؟
ھو! مئے ھرچی کہ ڈنّی مردُم ھست اَنت ، اِیشانی تھا بلکیں یکّے یا دو مردُم بہ بنت کہ پارٹی ءُ گلّاں پلینگ کتگ ءُ را داتگ اَنت ، گیشتری ھما اَنت کی جنگ اِد ءَ تیز بوت اِیشاں وتی چادر چنڈّ اِت ءُ دیم پہ ھما دمگ ءَ شُت اَنت کس جست ھم نہ کت ، نوں پد ءَ ھما مردم وت ءَ تھنک ٹینک گْش اَنت ءُ ایشانی واھگ اِنت جنگ مئے تب ءَ بہ بیت ، اَجیب اِنت! جنگ ءَ پیش تتکگیں سپاہی سپاہ سالار ءَ بِہ گْوش اِیت تو جنگ نہ زان ئے ایشاں من چی بگُش آں دگہ ؟
ناکو اِد ءَ یکّے ءَ جُستے را داتگ گْوشی کہ تو یکرندے لطیف جوھر بد ءُ رد گْوشتگ پرچا ؟ ناکو اے راستے؟
بچار ورنا من لطیف جوھر کدی بد ءُ رد نہ گْوشتگ ،اے گپ من گْوستگیں ماہ ءَ کُتگ اَت کہ لطیف جوھر بے سریں ٹوئیٹے کتگ اَت ۔ من بس ھمے گپ جت کہ لطیف ءَ داں کولواہ ءَ تربت ءَ کس ءَ دیم نہ داتگ ، ما بڈّ ءَ جتگ ءُ واجہ کینیڈا ءَ سر کُتگ انچوش بیت، ءُ اگاں راستی ءَ جوھر کینیڈا ءَ بی ایس او ءَ را داتگ اے تاریخی ردی یے لیکگ ءُ زانگ بیت۔ منی کِرّ ءَ نِشتگیں منی سنگتے ءَ من ءَ گْوشت اے زاھد ءِ کیس ءِ ھاتر ءَ شُتگ ، من گْوشت اکبر بگٹی ءِ شھیدی ءَ پد سلیمان داؤد انچوش شُت کہ من بلوچستان ءِ کیس ءَ عالمی عدالت ءَ براں ءُ جوھر چل روچ شد ھڑتال ءَ نِشت۔ پد ءَ گْوشی زاھد ءَ من رواں چہ کینیڈا ءَ آجو کناں ، بلے روچ ء مروچی ءَ ناکہ زاھد آجو بوت ناکہ بلوچستان ءِ کیس میان اُستمانی آمد گِس ءَ شُت، من جوھر ءِ بابت ءَ دِگہ ھچّ نہ گْوشتگ کہ مھلوک زھر ءُ کولنجی اَنت۔ اگاں من دِگہ گپّے بہ گْوشتیں، من تچک ءَ تچک ترا گْوشت کہ من واجہ جوھر ءَ چے گْوشتگ۔ وسر ءُ بے بُنیں گپ مردم پُشت ءَ باز جن اَنت ، بلے من ءَ ترا راستی ءِ دامن یلہ کنگی نہ اِنت کہ کئے چے گْوشگ ءَ اِنت ءُ کئے چے گْوش اِیت ، کئے کہ بِہ بیت ۔ پوہ بوت ئے ورنا؟ اگاں نا اے بابت ءَ دِگہ روچے مئے وتی نام ءَ کن ئے۔۔۔ ھاھاھاھاھاھا۔
گوں ناکو ءِ ٹھک ءُ کندگاں منی اے ( لطیف جوھر ءِ درگت ءَ) جُست چہ ھمد ءَ آسر بوت ءُ دیوان انگت برجاہ اِنت۔
دیوان برجاہ اِنت
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔