نبشتانک: جنگی سوب گوں جنگی مول ءُ مُراداں ھمگرنچ اَنت
نبشتہ کار: ھُدا داد بلوچ
دی بلوچستان پوسٹ
اگاں ما ھمے زانگ ءِ کوشست بہ کن ایں کہ ماں جنگ ءِ وھد ءَ کجام چیز گیشتر ارزِشت دار ایت گُڑا ایشی ءِ تچکیں پسّو ھمے بیت کہ “مِلیٹری آبجیکٹوز”! بزاں ھر جنگ ءِ یک بُنھِشتی مول ءُ مُرادے اَلم بیت ءُ بے مول ءُ مُراد ءَ وَ جنگ نہ بنت۔ ماں جنگ ءَ لشکر ءَ جانی تاوان رس اِیت، زر ھرچ کنگ ھم بیت بلے جنگ ءِ مول ءُ مُراد اَلم پیلو کنگ بنت گُڑا بزاں تو باج بُرتگ۔
اگاں ما 1955-1977 ءِامریکہ ویتنام جنگ ءَ بہ گند اِیں گُڑا اے جنگ ءَ ویتنامی جنگول ءُ ویتنامی مھلوک چہ امریکیاں گیشتر مُرتگ بلے امریکہ ءِ جنگی مول ءُ مُراد پیلو نہ بوتگ اَنت پمیشکا ماں ھمے جنگ ءَ امریکہ ءَ پْروش وارتگ ءُ ویتنام راج ءَ لکّانی کچ ءِ جانی تاوان ءَ ابید جنگ ءَ باج بُرتگ۔
ھمے داب ءَ اگاں ما ھندوستان ءُ پاکستان ءِ 1965 ءِ جنگ ءَ گِند اِیں کہ ماں اے جنگ ءَ دمگی ڈُنگ ءُ نیکراھی جنگولاں ھوار کشمیر ءِ تہ ءَ پاکستان ءِ بُگیج کُرتگیں “آپریشین جبرالٹر” جمبور اَت گُڑا ھندوستان پہ پاکستانی آپریشین جبرالٹر ءِ بے سوب کنگ ءُ جنگی پِڑ ءَ چہ کشمیر ءَ بدل کنگ ءُ پاکستان ءِ نیمگ ءِ آرگ ءِ ھاتر ءَ سیالکوٹ ءُ لاھور ءِ سر اُرُش کنت کہ پاکستان بے وس بیت ءُ وتی لشکر ءَ چہ کشمیر ءَ کش اِیت ءُ اے نیمگ ءَ بئیت۔ چہ اے ھندوستانی بامردیں اُرُش ءَ پاکستانی دوئیں شھر ھندوستان ءِ مُشت ءَ کاینت۔ چریشی ءَ پاکستان ءِ جنگی مول مُراد سد در سد بے سوب بنت ءُ البت ھندوستان ءِ دْراھیں جنگی پیلو نہ بنت۔ ھمے وڑ ءَ 1970-71 ءَ پاکستان ءُ بنگالیانی جنگ ءَ چار اِیں اد ءَ کساس 400000 بنگالی کُشگ بیتگ انت ءُ ھزارانی کچ ءِ بنگالی زالبوالانی اِزت لگتمال بنت ءُ ھزارانی بلکیں لکانی ھساب ءَ بنگالی لڈّ اَنت ءُ ھندوستان ءِ پناہ گِیر بنت۔ بلے پاکستان ءِ ھزار زورانسری ءُ زُلم ءَ ابید انگت پاکستان اے جنگ ءَ پْروش وارت ءُ بنگالی وتی جنگی مُول ءُ مُراداں سوبمند بنت۔
ھمے داب ءَ اگاں ما 1979-89 ءِ سوت یونین ءِ ماں اوگانستان آیگ ءُ پد ءَ چیر جنگ ءَ گند ایں گُڑا اے دہ سال ءِ جنگ ءَ سوت یونین ءِ پانزدہ ھزار لشکری کارمند مرُتگ ءُ دومی نیمگ ءَ لک ءُ نیم لک اوگان مجاھدین مُرتگ، مرگ ءَ وَ سوت یونین ءِ لشکر سک کم ءُ مجاھدین گیشتر مُرتگ بلے سوت یونین وتی جنگی مول ءُ مُراد ءِ پیلو کنگ ءَ سوبین نہ بوتگ۔
ھمے رنگ ءَ 1999 ءِ پاکستانی بُنگیج کُرتگیں کارگِل جنگ ءَ گِند اِیں کہ ایشی ءِ مول ءُ مُراد ھندوستانی سیاچن ءَ سر بیوکیں دو پُلانی ھمپُسگ ءُ سیاچین چہ ھندوستان ءَ پچگِرگ ئیگ اَت۔ چریشی ءَ پد ھندوستان کشمیر ءُ دگہ جیڑھانی سر ءَ بیھار دیگ بہ بیت۔ بلے اے جنگ ءَ دوئیں نیمگاں ھزارانی کچ ءَ لشکر مُرتگ اَنت بلے ھندوستان ءَ وتی ڈیھ چہ پاکستان ءَ رکینتگ ءُ وتی جنگی مول ءُ مُراد پیلو کُرت اَنت بلے پاکستان ءِ جنگی مول ءُ مُراد اد ءَ ھم سرجم نہ بوتگ اَنت بلکیں یک بے شرپیں پْروشے ءِ آماچ بوتگ۔
اگاں ما کُرد راج ءِ سر ءَ اِراک ءِ جنگی اُرشاں بہ گند اِیں کہ توری 70 ءِ دھک بہ بیت یا توری 80 دھ ءُ 16 مولمان 1988 ءَ ھلبجاہ ءِ ویل ءَ گِند اِیں کہ اِراکی لشکر چہ رستری سیمسراں گْوست ءُ کُردانی سر ءَ جَوریں گیس ءِ اُرش ئِے کتگ۔ ھزارانی کچ ءَ بے گُناھیں چُک، کماش ءُ زالبوال شھید کنگ بوتگ اَنت بلے انگت اِراک ءِ جنگی مول ءُ مُراد پیلو نہ بنت بلکیں گیشتر کُردانی تہ ءَ اِراک ءِ ھلاپ ءَ زھر ءُ کستے ودی بوتگ۔ مرچاں اود ءَ کُردانی وتی نیم آجو ءُ جُتائیں سرکارے ھست۔
اگاں ما ھمے داب ءَ سھودی اَرب ءِ بُنگیج کُرتگیں یمن جنگ ءَ گِند اِیں کہ اود ءَ چہ 2015 ءَ تا روچ ء مرچیگ ءَ سھودی ارب ءِ سروگانی ءِ چِل مُلکانی ارب کولیشن شپ داں روچ یک کسانیں چیرجنگولی گل شیئیا ھوتیانی ھلاپ ءَ وتی جنگی مول ءُ مُراداں سرجم کُت نہ کنت۔ سھودی ءَ شش سال اِنت ھمے جُھد ءَ اِنت کہ اود ءَ یک سُنّیانی سھودی پلہّ مرزیں سرکارے اڈ کنگ بہ بیت بلے اود ءَ بے سوب انت۔
نی مئے گپ ءِ گْوشگ ءِ مول مُراد ھم ھمیش اِنت کہ ما بلوچ راجی آجوئی ءِ چیرجنگ ءَ وتی جنگی مول ءُ مُراد ھم چارگی اَنت کہ ما وتی راجی آجوئی ءِ جُنز ءَ چُنت ھد ءَ سوبین اِیں۔ چہ اے برجاہ داشتگیں جنگ ءَ بلوچ راج ءِ لس مھلوک ءَ چُنت کچ ءَ راجی گلامی ءِ مارشت ودی کتگ اَنت؟ زاناں مرچی بلوچ راج ءِ پدریچ ءَ اے باوری بوتگ کہ بلوچ راج وتی ڈیھ ءِ وتواجہ ءُ یک آزات ءُ آجوئیں استانے ءِ واھند ءَ اَت پد ءَ 27 مولمان 1948 ءَ زورگری ءَ زیردست ءُ گلام بوتگ۔ زاناں بلوچ راج ءَ اے سرپدی بوتگ کہ بلوچ راج وت یک جُتائیں راجے ءُ آئی ءِ وتی جُتائیں زبان ءُ جُتائیں دود ءُ ربیدگ اَنت ءُ بلوچ ءَ گوں اے زوراکیں استان ءَ ھچ ڈولیں سْیادی یے نیست انت۔ زاناں بلوچ چاگِرد ءَ ھمے سرپدی ءُ آگاھی رس اِتگ ءُ ھست زورگِر ءِ ھلاپ ءَ بلوچ راج یک زھر ءُ کستے دار اِیت ءُ ناں کہ بلوچ راج وت ءَ اے استان ءِ بَھر منّ اِیت ءُ نَیکہ دژمن ھم بلوچ ءَ راجے لیک اِیت۔ مرچاں زورگِر ءَ بلوچ راج ءِ زیردستی زری پِڑ ءَ سک گْران کپان اِنت۔
اگاں بہ گِند ئے بلوچ راج چہ گْوستگیں راجی جُنزاں ھستیں وھد ءَ گیشتر سرپد ءُ زانت کہ بلوچ راج ءِ آجوئی نی اَلّمی اِنت، مرچی بلوچ سرمچاراں دژمن ء بلوچستان ءِ کُنڈ کُنڈ ءَ بُنجل اڈ کنگ ءِ بے وانک کتگ۔ مرچی بلوچ ڈیھ ءِ ھر دمگ ءِ کوہ ءُ گیاباناں دژمن ناگمانی اُرش ءُ ھکل ءِ آماچ انت۔ بلوچ راج ءَ اے باوری ھست کہ زورگِر وَ نزوریں راجانی ڈیھ ءِ پچگِرگ ءُ زیردست کُت کنت بلے زندگ ءُ بامردیں راجانی سر ءَ زیردستی ءِ مھکم کنگ سَک گِران انت پمیشکا بلوچ راج ھم مُدام زیردستی ءُ گلامی ءَ پِٹّ دنت ءُ وتی راجی آجوئی ءِ جُنز ءَ مُدام جُنزان کنت۔
بلوچستان آجو بات ءُ گلامی ءَ پِٹ بات۔
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔