نبشتانک: موتکاں پہ نازینکے گْوپاں
نبشتہ کار: ماھِکان بلوچ
دی بلوچستان پوسٹ
مکھیں مات ءِ شیشاریں شار ءِ پھازگ ٹھلیں بچّاں ھوار جِنکّانی ھم ڈُبّہ ءُ زِمہ واری اِنت کہ آ چہ دُژمِن ءِ دست ءَ وتی مات ءِ شار ءَ پچ بِگر اَنت ءُ زھگ بُوَگ ءِ ھکّ ءَ پیلو بِہ کن اَنت۔
چی ءَ کہ تھنا راجدپتر ءَ بامردانی کِسّہ نبشتگ نہ اَنت ، بلکیں راجدپتر ءِ تاکدیماں شیرزالیں بانَڑیانی چکنکاریں داستان ھم نبشتہ اَنت کہ آیاں وتی راجی ڈُبّہ ءِ پیلو کنگ ءَ برات ءِ ھمراھی ءُ ھمکوپگی ءَ جُھد ءِ پِڑ ءَ وتی بھر داتگ ءُ دیمونی دَیَگ ءِ ھر گام ءَ ساڑی بوتگ اَنت۔
مرچی انچو کہ دُژمِن ءِ دیم ءَ مئے برات جنگ ءِ میدان ءَ ساڑی اَنت ، ھمے داب ءَ مارا ھم دُژمِن ءِ دیم ءَ اُوشتگی اِنت دانکہ دُژمِن شرّی ءَ پوہ بِہ بیت ءُ بِہ زانت بلوچ گُلزمین ءِ پُسّگ پہ وتی مات ءِ شیشاریں شار ءِ رکّینگ ءَ جُھد ءُ جنگ ءِ ھر پِڑ ءَ ساڑی اَنت۔
مرچی زیبائیں مشکے ءِ بالاد کہ ھوناں میچل اِنت ، اے ھونانی ملپداں گْواشیں مشکے ءِ ٹیٹلیں بالاد چو ترّیں بانور ءَ سمبھینتگ ءُ سالونکیں بچّ پہ شانے آھگی دِلبند ءَ وش واب اَنت ءُ پہ آیوکیں پدریچ ءَ دیمونی دَیَگ ءِ سسّا ساچیں درونتے۔
پمیشکا من پہ پھر ءُ شان گْوش آں کہ اے ڈیھ کمبریں بچّانی ھواری ءَ مھناز ءُ بانڑی ئیں جِنکّانی ھم مکھیں مات اِنت ، مکھیں مات ءِ پاسپانی تھنا لاڑیں بچّ ءِ کوپگاں نہ اِنت کہ مِر اِیت۔ مان اِیت جمبولیں آس ءَ مان دَیَگ تھنا بچّ ءِ کار نہ اِنت۔
بلکیں جِنکّ ھم وتی ڈُبّہ ءُ زِمہ واری ءَ بِہ زانت کہ من ھم اے ڈگار ءِ پرزند آں ، من ءَ ھم وتی مات ءِ سانکلانی بوجگ ءَ تھاریں زِندان ءِ ھون دونتگیں بالاد ژامبلینگی اِنت، دانکہ برات اے مہ جیڑ اِیت تھنا گْرانیں بار منی کوپگ ءَ اِنت، بلکیں منی گْوھار ھم، ھمکوپگی ءَ اُوشتاتگ ءُ موتکاں پہ نازینکے گْوپگ ءَ اِنت۔
گُڑا پہ جزم گْوش آں کُجام راج ءِ وھدے بچّ ءُ جِنکّ پہ وتی راجی آکبت ءِ براھداری ءُ سجّینگ ءَ ھمدست بَہ اَنت ، آ راج ءَ ھِچّ زور ءِ ھُدابُند وتی زیردستی ءِ لد ءَ نہ چارین ایت۔
بلکیں آ پہ ٹھل ءُ شان وتی ماتیں وتن ءِ گْورباسکاں پُر مھر ءُ اِیمنیں زِندے گْوازین اِیت ءُ گیدی ءِ راجدپتر ءَ پہ ابد زِندگ مان اِیت۔
بیا اِت! اھد ءَ دِگہ نامے دے اِیں ءُ پہ آیوکیں پدریچ ءَ نوکیں درونتے اِیر کن ایں دانکہ باندا میاریگ مہ بَہ اِیں ءُ سر پہ مُجّتی جھل مہ بیت۔
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت