بلوچستان جتا جتائیں دمگاں پاکستانی پوج ءِ زوراکی یکشل ءَ برجاہ انت۔
دی بلوچستان پوسٹ
ٹی بی پی ھال پتر ءَ سربوتگیں ھالانی رِد ءَ مروچی پدا آواران مشکے ءُ چپ چاگردے دمگاں پاکستانی پوج ءِ زوراکی برجاہ انت آپریشن ءِمیان ءَ پاکستانی پوج ءَ یک مردمے زورانسری آوار جتگ ءُ بیگواہ کتگ۔
اھولکار ءِ رِد ءَ مروچی سھب ءَ پاکستانی پوج ءَ آواران ءِ دمگ پیراندر، جکرو، اللہ بخش بینٹ، درمان بینٹ، حمل بازار، وادیتولگی، غلامو، کندھار، بکشی بازار ءُ چپ چاگرد وتی انگیر ءَ کُرتگ ءُ آپریشن بندات کرتگ۔
ھالانی رِد ءَ آپریشن ءِ میان ءَ پاکستانی پوج ءَ بازیں مردمے لوگ جاہ ءُ گدان سوتکگ انت ۔
ھندی مردمانی گوشگ انت کہ پاکستانی پوج ءَ مشکے کلان، تیراں کاشی ءُ راغے ءَ دگے دمگ وتی انگیر کُرتگ انت وھدیکے جتا جتائیںجاھاں وتی نوکیں لشکری پانگس جتگ ءُ نشتگ۔
اے ھال ھم ھست انت کہ پاکستانی پوج ءَ بازیں شوانگ ءِ ھم گپتگ ءُ ناشناسیں جاھاں بندیگ کرتگ کہ بندیگیانی تہ ءَ یکے ءِ پجاربشیر احمد ء دلشاد ءِ نام ءَ چہ بوتگ۔
زانگ بہ بیت اے دمگے مردم گیشتر زمین دار ءُ کشتکشاری کن انت آھانی تہ ءَ گیشتریں گلہ کشی کن انت، ـ بیگواھیں بشیر احمد ءِ درگتءَ ھمے گوشگ بوھگ انت کہ آ دکاندار ءِ بوتگ کہ پوج ءَ آوار جتگ ءُ گوں وت برتگ۔