روکپتی بلوچستان ءَ دگ ءِ وئیل، یک گاڑی ءِ بُنگپتگ

دی بلوچستان پوسٹ

سر بیتگیں ھالانی رد ءَ روکپتی بلوچستان ءِ دمگ سراوان ءُ چھبار ءِ دگ ءَ یک گاڑی ءِ وئیل ءِ آماچ بیتگ ءُ بُنگپتگ –

اھوالکار ءِ رد ءَ مروچی سراوان ءُ چھبار ءِ دگ ءَ کاپہ ءُ مگس ءِ میانی دمگ ءَ ترند رؤکیں گاڑی ءِ وئیل ءِ آماچ بیتگ کہ چریشی ءَ چہ گاڑی بُنگپتگ –

اھوالکار ءِ رد ءَ بُنگپتگیں گاڑی ءَ سواریں مردمانی باور ءَ تنی وھدی دگہ جوانیں گپ دیم ءَ نہ اِتکگ اَنت-

اھوالکار ءِ رد ءَ وئیل ھما وھد ءَ درپیش بیتگ کہ اسپیت رنگیں گاڑی ءِ سراوان ءَ دراتکگ ءُ دیم پہ چھبار ءَ روگ ءَ بیتگ کہ کاپہ ءُ مگس ءِ ھند ءَ وئیل ءِ آماچ بیتگ –

اھوالکار ءِ رد ءَ دگ ءِ وئیلانی تہ ءَ گیشی اتکگ کہ آیانی گیشتریں سوب ترندیں رؤکیں گاڑی ءُ بے دلگوشیں راندھانیگ اِنت کہ آ بے دلگوشی ءِ سوب ءَ دگ ءِ وئیل ءِ آماچ بنت ءُ تاوانبار بنت –

اھوالکار ءِ گوشگ اِنت کہ دمگ ءَ دگ ھم پُرشت ءُ پروش ءِ آماچ اَنت کہ چریشی ءِ سوب ءَ بازیں گاڑی وئیلانی آماچ بیگ ءَ اَنت –