ماتاں انچیں بچ نازینتگ اَنت – شیر دل بلوچ

نبشتانک: ماتاں انچیں بچ نازینتگ اَنت

نبشتہ کار: شیردل بلوچ

دی بلوچستان پوسٹ

یکبرے ما نشتگ ءُ دیوانے کنگ ءَ اَت ایں، ھمے دیوان ءَ بی این ایم ءِ گوستگیں کارگشاد شھید ڈاکٹر منان جان ساڑی اَت، دیوان جاہ آھو بگاڑی زیلگ ءَ بوگ ءَ اَت، گپّ بھادری ءُ لگوری ءِ دَرگت ءَ بوگ ءَ اَت، دیوان ءَ نشتگیں کسے ءَ ھمے گوشت پِلانی پمیشکا بھادرے کہ آئی ءِ پِت ءُ پیرک بھادُر بوتگ اَنت، شھید ڈاکٹر منان جان ءَ پسو” تر اِینت ءُ گوشت ئِے اِناں،، چو نہ اِنت اے ھیال ءَ گوں من تپاک نہ کن آں، دراسل ھمے گپّ ءِ مول ءُ مراد بس ھمے بوت کنت، ما وتی سلاھیتاں کار مہ گر اِیں بلکیں زھن اوشت ءِ آماچ بہ بہ اِیں ، من گوش آں انسان بہ لوٹ ایت ھرچ وڑ بوت کنت، بس جُھد کنگ لوٹ ایت ـ

مارا پہ اے گپّ ءَ راستی بس ایوک ءَ وتی راجدپتر ءِ تاک وانگ لوٹ اَنت، چہ استان ءِ کبزہ کنگ ءَ پد انچیں کرد گندگ بنت تمرد نرمزاریں جنگولانی سر ءَ تیوگیں راج پھربند ایت،
بَلے!! آوانی زھگ ءُ نماسگ سک لگور اَنت ـ

ھمے دَرگت ءَ بتلے ھست …..

شیر ءِ نراں لگور ودی کرتگ اَنت
لگوراں شیر ءِ نر ودی کرتگ اَنت

راست اَنت وھد ءَ ھر چیز پدر کرتگ، بھادری پِت ءُ پیرکی میراسے نہ اِنت بلکیں گوں انچیں ھیل ءُ آدتاں بندوک اِنت ـ
دگہ ….. بتلے ھست:
شَرّ ءَ گوں بہ ئے شَرّ بہ ئے
شِرّ ءَ گوں بہ ئے شِرّ بہ ئے

سیمی …. بتل ھمے درگت ءَ
ماہ نند ئے ماہ بہ ئے ! دیگا نند ئے سیاہ بہ ئے ـ
وھدیکہ کومانی سر ءَ نگیگیں جاور اتکگ اَنت، گڑا تمرد ءُ بھادریں پُسگاں وتی راج ءِ پھازگ ءَ دژمن ءِ دیم ءَ چو کوہ ءَ مِک بوتگ اَنت، وتی ھون اِش رِتکگ اَنت ءُ ڈیھ اِش رکینتگ ـ
“مبارک کازی ءِ شَیرے

اتکگاں گرانیں نوبت ءُ جنگانی بھار
دیم پہ مات کوھاں رپتگ اَنت مَلیں سرمچار

گیرت ءُ بھادری گوں وتن ءُ کوم ءِ دژمنانی ھلاپ ءَ جنگ کنگ ءَ پدر بنت ،کے بھادر ءُ کے لگورے ….؟ دگہ ھم گپّے ھست کوم ءُ زمین ءُ وتن ءِ دژمناں گوں ھمراہ داری بھادری ءِ سپتاں ھور نہ اِنت، ھما گڑا لگور گوشگ بنت ـ

بلوچ راج ءِ بھادریں پرزنداں یکے شھید گلشیر جان ءُ آرپ ھان جان بلوچ اَنت ماں جاہ آھو کوھڑو واجہ دلمراد بلوچ ءِ لوگ ءَ ودی بوتگ نہ وانتگ ئِے کومی شھور تہ ءَ بوتگ ئِے کہ اے گرانیں راہ ءِ سپر بے کومی سِنچ ءَ بوت نہ کنت، گوں کومی جزبگ ءَ پند ئِے بُر اِتگ ءُ داں زند ءِ گُڈّی ساھتاں گون بوتگ،
چہ دَرکسانی ءَ سیل ءُ شکار ءَ ھُب ءُ واھگ ئِے بوتگ، کرگوش، سسو، کپینجر ءِ شکاری یے بوتگ ءُ مدام کوھاں گشتگ ءُ بینگ چار اِتگ ئِے ھند ءِ مردماں آئی ءَ را شکاری ءِ نام ءَ توار کرتگ، گس ءِ تہ ءَ سک وار ءُ بزگیں مردم بوتگ اَنت، پوریاگِری کرتگ ئے ءُ وتی زند ءِ روچ ئِے تیلانک داتگ اَنت ـ

پہ روزگار ءِ ھاتر ءَ گاڑیاں شُتگ ءُ کلینڈری کُتگ ئِے، وشھال نہ بوتگ، گلامیں راج ءِ زند ءِ تہ ءَ ایمن ءُ آسراتی وَ نیست گلامی ءِ زند
کوھنیں گُد ءِ وڑ ءَ اِنت یک دِرے گِر ئے ءُ دگہ جاھے ءَ دِر اِیت، تیوگیں زند ءَ تچگ ءُ تاچ بہ کن ئے انگت شام ھست سبارگ نیست انچو جنجال دائم ءَ ھست اَنت، دانکہ گلامی ءِ سانکل نہ سِد اَنت، بلوچ ءَ را واری ءُ بزگی یل نہ دے اَنت،
“شھید چیرمین واجہ گلام مھمد گوش ایت
تیوگیں نادراھیانی جڑ گلامی اِنت الاج ایوک ءَ آزادی اِنت ـ

ھروھد ءَ بہ دیستیں ایوک ءَ نشتگ اَت، بے تواریں سنگتے اَت، وھدے یاتان ئِے کپ آں دل چِہ دل ءَ سِد اِیت جگر ٹکر ٹکر بیت، ماتاں بچ پہ لج ءُ ننگ ءُ ڈیھ ءِ پھازگ ءَ ودی کرتگ اَنت، تیر اِش ماں دلبند ءَ وارتگ چک اِش پُشت ءَ نہ تر اِینتگ، راجدپتر چہ انچیں بھادریں بچّانی کسھاں سرکیل اِنت ءُ راج پھر بند اِیت، گڑا بلوچ ماتاں انچیں بچ وتی نازینتگ اَنت وتی ھالو ءُ سپتانی ءَ نام اِش مان اَنت،
شھید گلشیر بلوچ ءِ بارو ءَ چنکس بہ نبیس آں، کم اِنت، وھدیکہ آ راجی جُنز ءَ ھور بوتگ وتی کول ءُ کرار ءَ اوشتاتگ وتی سر ئِے ندر کرتگ ـ
ھپت، تومشان 2018 ءَ سپرے ءَ بنت، استان ءِ لشکر رندگیری ءَ گون بیت، تیوگیں راھاں بند اِیت، ماں جاؤ شندی ءَ کور ءَ ڈِیک وارت، لشکر ءَ انگر کرتگ اَنت ءُ جنگ دوئیں نیمگاں بوتگ اولی روچ ءَ گلشیرجان، راشدجان ءُ کسان سالیں اورنگ جان شھید بنت ءُ دومی روچ ءَ مھیم جان شھید بیت ـ
شھید گلشیرجان ءَ ھور تومشان ءِ ءُ سرڈگار ءِ شھیداں سھریں سلام ـ

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت