نبشتانک: آپ چہ سر ءَ سرگوستگ
نبشتکار: شے مرید شاد
دی بلوچستان پوسٹ
وھدے کارے کسے ءِ دست ءَ پہ نہ زانتی زوال بوت ھما ردی گوشگ بیت پہ زانگ کارے ھراب کنگ دومی ءِ جان ءُ مال ءُ ازت ءِ تاوان دیگ ءَ ردی نہ گوش اَنت، من ھیراناں استان ءِ داشتگیں پھاز کار گیشتر انچیں ردی ءِ کنگ ءَ اَنت لھتیں وھد اِنت من گیشتر شوشل ءُ پرنٹ میڈیا ءَ چارگ ءُ وانگ ءَ آں گڑا ھمے وڑیں ھال گیش دیم ءَ آیگ ءَ اَنت نَکیب اللہ مسھود ماں کراچی ءَ راؤ انور شھید کنت جعلی پولیس مکابلہ ءِ نام ءَ دنت ھمے ماہ ءَ نوشکی ءَ ورنایے ماں پولیس ءِ لاپک ءَ ازیت دیگ ءُ شھید کنگ بیت وتکشی ءِ نام دیگ بیت ھمے ائید ءَ یک روچے ساری پنچ بلوچ ماں راجن پورا شھید کنگ بنت پولیس مکابلہ ءِ نام ءَ دیگ بوگ بنت وزیرستان ءُ سوات ءَ سندھ ءُ بلوچستان ءَ مدام استان ءِ گوں بے سریں کاراں مدام بے گناھیں مردماناں نُکس دیگ ءَ اِنت ـ
بلوچستان ءِ سر وزیر جام کمال ءِ وتی میتگ ءَ ھمے ھپتگ ءَ دِگہ یک انچیں ویلے دیم ءَ اتکگ” شکیل جان ء بابو بلوچ بیلہ ءِ پولیس ایس ایچ او مھمدجان ساسولی ءِبگیر ءَ کیس ءُ جُرم ءَ چست کنت ءُ بارت سیمی روچ ءَ کُنٹ لوگ ءَ آرگ بیت ھمے گوش اَنت وتکشی ءِ کرتگ ئِے پرچا وتکشی کنت ….؟ لَٹ ءُ ازیت دیگ ءِ نشاں ماں جان ءَ ئِے ھست اَنت ـ
اے رنگیں ردی سَگگ ءُ اُوپار کنگ نہ بنت ، بَلے تئی ھر ردی یے ما اوپار کتگ ءُ سَگ اِتگ ، بلکیں اے مئے اوپار نہ بیتگ نا دسترسی ءُ بے وسی بوتگ کہ ترا گوں مئے دست نہ رس اِتگ تو یک زالم ءُ زوراورے بوتگ ئے ، دھر ءِ تھ ءَ چوشیں مردمے نہ بوتگ کہ آئی ءِ گوشاں مئے مات ءُ گھارانی پریات ءُ زارانی توار نہ شتگ ءُ نہ اِشکتگ ئِے ، بَلے بلوچ یک انچیں بے وس ءُ بزگیں راجے بوتگ ، نیکہ آئی ءَ را ھُدایے بوتگ نیکہ آئی ءَ را چوشیں درد واریں ھمساھگے بوتگ درست تئی بوتگ اَنت ، آئی ءِ ھمے چیھال ءُ زار یکے ءِ گوشاں نہ کپ اَنت ناں آزمان ءَ شتگ اَنت ناں زمین ءَ اِشکتگ بیتگ اَنت ، بَلے مارا چہ دھر ءِ مردماں چہ گلہ نیست ما یکیں بس آزمان ءِ واجہ ءَ گوں گلہ کن ایں کہ آئی ءَ زمین ءِ سر ءَ انچیں یک ناشریں ءُ بے مزھبیں ، بے رھیمیں رسترے آؤرتگ ءُ مئے سر ءَ آ وت ھُدائی ءِ جنگ ءَ کنگ ءَ انت بس مئے ھُدا زمین ءَ آرگ بیتگ، ھر وھد آ گوں بلوچ ءِ ھون واری ءَ دستگٹ ءُ گلائیش بوتگ چو دُزیں تولگ ءَ مئے زمین ءَ چو مورینک ءَ مانریتگ اَنت بلوچ پُسگاں یک پہ یک ءَ کُش اَنت ءُ بیگواہ کن اَنت کُنٹاں ماں جنگلاں دُور دے انت ، بَلے نوں آپ چہ سر ءَ سرگوستگ اوپار کنگ نہ بیت، اگاں ما اے زالم ءُ زوراور ءِ ھلاپ ءَ نوں جھد مہ کن ایں ءُ بہ نندیں ندارہ بہ کن ایں، گُڑا اے نندگ ءُ ندارہ کنگ مئے باندات ءِ تبائی زانگ بیت ءُ مارا بیگواھی ءِ نیمگ ءَ بارت اِنت ۔
شکیل بابو سے ءُ چار روچ ءَ پیسر چہ لسبیلہ ءَ چست کنگ بیت ، پاکستان ءُ آئی ءِ داشتگیں میر ءُ دلار پلیس ءَ زر دے اَنت ، ایس ایچ او ، مھمد جان ساسولی شکیل ءَ چہ گس ءَ چست کنت سیمی روچ ءَ آئی ءِ کُنٹ آرگ بیت ، ایس ایچ او ، مھمد جان ھمے گپ ءَ جنت کہ شکیل بلوچ ءَ وتکشی کتگ ، چہ اے گپاں زانگ بیت کہ شکیل بلوچ ءِ کُوش ءِ زمہ وار ایس ایچ او ، مھمد جان ساسولی، بیلہ پلیس ءُ جام کمال اَنت، کجام کانود ءِ رِد ءَ چہ گس ءَ شکیل چست اش کتگ ءُ سیمی روچ ءَ آئی ءِ کُنٹ ءَ مات ءُ گھاراں سر کن اَنت ھمے گش اِیت شکیل بابو وت ءَ وت کُشتگ ۔
ایس ایچ او ، مھمد جان ساسولی ءِ اے اولی ردی نہ اِنت ، بلکیں ایس ایچ او ، مھمد جان ساسولی ءَ اے رنگیں ردی مدام کتگ ءُ انگت کنگ ءَ اِنت ، دائم ءَ زَر زرتگ دمگ ءِ میر ءُ دلارانی گشگ ءِ پد ءَ بزگ ءُ لاچاریں مردم گپتگ ءُ زندانی کتگ اَنت، لَٹ ءُ کُٹ کتگ اَنت ، اے بابت ءَ بلوچ لَس مھلوک ءَ را ایس ایچ او ، مھمد جان ساسولی ءِ ھلاپ ءَ تُرندیں گامگیج ءِ زورگی اِنت داں ایس ایچ او ، مھمد جان ساسولی ءَ سزا دیگ بہ بیت ، کہ چہ ردیں کار پداں آ دست کَش بہ بیت ءُ ھمے جُست گرگ بہ بیت کہ شکیل بابو ءِ گناہ ءُ میار چے بوتگ گس ءِ تھ ءَ چست کنگ بیتگ ءُ سیمی روچ ءَ ءِ ٹپ ءُ ٹوریں کُنٹ پہ مات ءُ گھاراں سوگات کنگ بوتگ، اگاں بیلہ مھلوک برمش ءُ ملک ناز، کلسوم، ھیات مرزا کُش ءَ توار چست بُکتیں مرچی شکیل بابو اے دروشم ءَ پلیس ءَ شھید نہ کتگ اَت ـ
اے درگت ءَ کُلیں انسان دوستاں گوں دزبندی اِنت“شکیل بابو ءِکُش ءِ ھلاپ ءَ توار ءَ چست بہ کن اَنت گوں لسبیلہ مھلوک ءَ ھمتوار بہ بنت، داں بلوچ نسل کُشی ءُ بلوچستان ءِ تھ ءَ اے وڑیں جاوراں چہ وت ءَ بہ رکین اَنت ھاموش ھچ مہ بہ اِت ، اگاں ما ھاموش بہ ایں گُڑا ایوک ءَ مروچی شکیل بابو نہ اِنت بلکیں زیکیں روچ ءَ نودربر ھیات بلوچ ھم چہ مات ءُ پت ءِ دیم ءَ پاکستان ءِ پوج ءَ چست کتگ ءُ مات ءِ گُشان ئِے زرتگ ھیات بلوچ ءِ چم ئِے بست اَنت ءُ تیرانی آماچ ئِے کتگ پد ءَ ھیات بلوچ ءِ پُرس ءَ کیت ءُ ھیات بلوچ ءِ پت ءَ را ھمے گش اِیت کہ تئی بَچ پہ ردی جنگ بوتگ ، اے کجام ردی گشگ بیت کہ تپنگ ءَ بزور ءُ ھشت تیر ماں سینگ ءَ بہ جن ھما بچ کہ مات ءُ پتاناں پہ چارگ ءَ دل نہ بنت تو آواناں تیرانی آماچ کن ئے ، ما پاکستان ءُ پاکستان ءِ میر ءُ چیریں دُز ءُ ڈنگانی کجام ردیاں اوپار بہ کن ایں ، مئے نازاکیں گھار ملَک ناز ءُ گھار کلسوم نور ھم ھمے پاکستان ءِ داشتگیں چیریں گلانی دست ءَ شھید کنگ بیت ھما کُشندہ سزا دیگ نہ بوتگ اَنت تنی وھدی گردگ ءَ اَنت ، شھید ھیات بلوچ ءِ کُشندہ پاکستان ءِ پوج اِنت آئی ءَ را ھم سزا دیگ نہ بوتگ مروچی شھید شکیل بابو ءِ کُشندہ ایس ایچ او ، مھمد جان ساسولی نہ اِنت بلکیں پاکستان اِنت ایس ایچ او، مھمد جان ساسولی سزا دیگ نہ بیتگ ءُ نہ بیت ، ایشانی سزا دیگ ءِ واستا مارا بلوچ راج ءَ یکمشت ءُ یکجاہ بوگی اِنت دانکہ ما چہ اے ھون واریں ریاست ءُ آئی ءِ ھون واریں رسترانی دست ءَ وت ءَ وت بہ رکین ایں ۔
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔