زورگریں پوج ءِ واستا کمک رسینوکیں پنجاپ ءِ جھمنندیں ششیں مردم انسانی ھم دروری ءَ یلہ کرتگ اَنت – بی آر اے

دی بلوچستان پوسٹ

گپتگیں مردم بازیں ٹرکاں شال ءَ فرنیچری ساماناں آواران گیشکور ءِ بنجل ءَ رسینگ ءَ روگ ءَ بیتگ اَنت کہ دزگیر کرتگ اَنت – بیبگر بلوچ

بلوچ ریپبلکن آرمی ءِ جارکش بیبگر بلوچ ءَ رسانکدراں شنگ کرتگیں یک بیانے ءِ تہ ءَ گْوشتگ کہ 31 اگست ءَ کولواہ آواران ءَ چہ دزگیر کرتگیں پنجاب ءَ سیادی داروکیں ریاستی پوج ءِ شش کمکاری رسینوک دزگیر کرتگ اَنت جُست ءُ پرسی وھد ءَ گپتگیں مردماں اے منّ اِتگ کہ آ ھما ٹرانسپورٹانی سوب ءَ ماھانی سر ءَ بلوچستان ءِ جتائیں ھند ءُ دمگاں پوج ءِ واستا کمکاری سامان رسین ایں کہ چریشاں کراچی ءَ وردنی ساماناں ھوار شال ءَ چہ فرنیچری سامان ھوار اَنت –

جارکش ءَ گوشت کہ سرجمیں دنیا سرپد اِنت کہ زورگریں پاکستانی پوج بلوچستان ءَ راجدپتری ناوشیں پوجی آپریشناں گوں دزبند اِنت، سدانی کچ ءَ لوگ پروشگ بیتگ اَنت، ھزارانی کچ مردم بیگواہ اَنت بلے لھتے دری مردم ریاست ءِ گوشگ ءَ جنگ زدگیں بلوچستان ءَ پوجی کمکاری ءُ بند ءُ ساچی پروجیکٹ سی پیک ءُ دگہ کارانی بھر بیگ ءِ واستا بلوچستان ءَ آیگ ءَ اَنت –

آئی ءَ دیمتر ءَ گْوشت کہ رسانکدراں گپتگیں مردم بس پوریاگر پدر کرتگ اَنت کہ اے راستی ءَ چہ باز دور اَنت گپتگیں مردم سرجم ءَ ریاستی پوج ءِ کمکاری ءِ جوانیں دست بیتگ اَنت کہ انسانی ھم دروری ءُ ھما منّانک ءَ یلہ کنگ بیتگ اَنت کہ آ دو بر جنگ زدگیں بلوچستان ءَ ریاستی مشینریانی بھر جوڑ نہ بہ اَنت –

بیبگر بلوچ ءَ گْوشت کہ ما انسانی ھکانی ادارھاں اے گوشگ لوٹ ایں کہ آ وتی پرز ءَ پیلو بہ کن اَنت بلوچستان ءَ ھمک روچانی تہ ءَ انسانی ھکانی پادمالیاں ھم بہ چار اَنت -پاکستان ءِ پوج ءُ چیریں ادارھاں ڈیتھ اسکواڈ جوڑ کرتگ ءُ بلوچ راج ءِ نسل کُشی ءَ ھونریچی کنگ ءَ اَنت -کہ جنگی رھبنداں ھم لگتمال کنگ ءَ اَنت اے جاورھالانی سر ءَ انسانی ھکانی ادارہ وتی دیستگیں گپاں بہ جن اَنت –

بیبگر بلوچ ءَ ٹرانسپورٹر ترندی ءَ گوں سرپد کرتگ ءُ گْوشتگ اَنت کہ دوبر پوج ءِ واستا کمکاری ءِ رسینگ ءَ وتی گاڑیاں کارمرد مہ کن اَنت اگاں ناں وتی زمہ وار وت بہ اَنت –

آئی ءَ گْوشت کہ مئے جد ءُ جھد یک آجوئیں ڈیھے ءِ سرجمی ءَ برجاہ مان اَنت –