پاکستانی پوج ءِ لیفٹنٹ جنرل ءِ چیریں مڈی پاشک بیتگ اَنت –
دی بلوچستان پوسٹ
سر بیتگیں ھالانی رد ءَ پاکستانی پوج ءِ لیفٹنٹ جنرنل عاصم سلیم ءِ سر ءَ چیر بیتگیں کار ءُ ماڑیانی ھال پاشک کنگ بیتگ اَنت ءُ کہ آئی ءَ امریکہ ءِ تہ ءَ بازیں کساسے ءَ ماڑی ءُ باپاری مڈی مُچ کرتگ اَنت
ھمے وڑ ءَ پاکستانی اھوالکار اھمد نورانی ءَ فیکٹ فوکس نامی ئیں تند جاھے ءَ شنگ کُتگیں شاھگانیں رپورٹے ءَ ٹاہ داتگ کہ سی پیک ءِ مستری کنوکیں پاکستانی پوج ءِ لیفٹنٹ جنرل عاصم سلیم باجوہ ءُ آئی ءِ کھول ءِ نام ءَ مزنیں زر، باپاری ءُ ماڑی امریکہ ءَ ھست اَنت۔
اھمد نورانی ءِ رپورٹ ءِ رد ءَ عاصم سلیم باجوہ ءِ ھانواد ءِ کر ءَ داں اے وھد ءَ امریکہ ءِ تھ ءَ نود ءُ نُہ شرکت (کمپنی) ھست اَنت، ءُ ایندگہ یک سد ءُ سی شرکتانی تھ ءَ دکان ءُ بھر ھم ھست، گوں ایشاں رپورٹ ءِ ردءَ دو لوگ ءُ ماڑی ءُ سینزدہ مزنیں شاپنگ سینٹر ھم امریکہ ءَ عاصم سلیم باجوہ ءِ کھول ءِ نام ءَ ھست کہ اے درستانی منانک ھم اھمد نورانی ءَ وتی پَٹ ءُ پولی رپورٹ ءَ ھوار کُتگ اَنت۔
اھمد نورانی ءِ رپورٹ ءِ ردءَ عاصم باجوہ ءِ زھگ یوشاءَ دو لوگ امریکہ ءَ ھما وھدءَ گپتگ کہ، لیفٹنٹ جنرل عاصم سلیم باجوہ زرباری کمانڈ ءِ کمانڈر بیتگ۔