کماشیں بلوچ رھشون بگٹی ٹک ءِ سروک نواب مھمد اکبر خان بگٹی ءِ نمیرانی ءِ چار دھمی سال روچ ءِ درگت ءَ ستاشانی درشانگ بیتگ ءُ جھد، کرد ءُ زند یات کنگ بیتگ اَنت ۔
دی بلوچستان پوسٹ
دی بلوچستان پوسٹ چاگردی رسانکدر ءِ اھوالکار ءِ رد ءَ گوستگیں روچ ءَ کماشیں بلوچ رھشون نواب مھمد اکبر خان بگٹی ءِ چار دھمی نمیرانی ءِ سال روچ دارگ بیتگ ءُ پہ آئی ءِ کرد جھد ءُ زند ءَ ستاشانی درشانگ بیتگ ءُ آئی ءِ مرگ ھم یک جھد ءِ چیدگ ءِ نامینگ بیتگ۔
اے رد ءَ بلوچ ریپبلکن پارٹی ءَ جرمنی ءَ یک مزنیں سیمینار ءِ اڈ داتگ کہ ایشی ءِ تھ ءَ بلوچ رھشون ءُ بی آر پی ءِ سروک نواب براھمدغ بگٹی ءَ ھوار افسریاب خٹک، فرحت اللہ بابر، گلالئی اسماعیل، ڈاکٹر پرویز ھودبائی، ھسین ھقانی، مھسن داوڑ، ڈاکٹر مھمد تقی، طھہ صدیقی ءُ اھمد وقاس گواریہ ءَ ھوار بلوچ جھدکاراں ھم تران کُتگ شھید نواب اکبر بگٹی ءَ را دروت پیش کُتگ۔
ھمے درگت ءَ بلوچ ریپبلکن پاٹی ءِ سروک براھمدگ بگٹی ءَ گپ کنان ءَ گْوشت کہ من ءَ پھر اِنت بلوچ بیگ ءُ بلوچ دودمان ءُ بلوچ گوستانک ءِ سر ءَ کہ نواب اکبر خان بگٹی ءِ رنگیں کماشے ءَ وتی ھون پہ بلوچ سرڈگار ءِ ھاتر ءَ ریتکگ اَنت –
آئی ءَ گوشت کہ ھمے ھون ءُ دیمونیاں چہ اھد بیت ءُ یک روچے ءَ ناں یک روچے ءَ بلوچ راج اے زُلم ءُ زوراکیاں چہ چُٹینگ بیت اِنت –
ھمے وڑءَ بی آر پی ءَ یک سیمینار ءِ برتانیہ ءَ ھم اڈ داتگ کہ آود ءَ ھم نمیرانیں نواب اکبر بگٹی ءَ سھریں دروت پیش کنگ ءُ آئی ءِ کوش ایر جنگ ءُ زند یات کنگ بیتگ۔ اے سیمینار بی آر پی ءِ برتانیہ ءِ مستر منصور بلوچ، بلوچ راجی زرمبش ءِ مستر عبداللہ بلوچ، بی این ایم ءِ میان اُستمانی جھگیر ھمل ھیدر، بی این ایم یوکے ءِ صدر حکیم واڈیلہ، بی ایچ آر سی ءِ جھگیر کمبر مالک ءُ بی آر پی ءِ باسک ھمید بلوچ ءَ تران کُتگ ءُ شھید اکبر خان ءَ دروت پیش کُتگ۔
نواب اکبر خان ءِ نمیرانی ءِ روچ ءِ درگت ءَ بی آر پی ءَ یونان ءُ زرباری کوریا ءَ دیوان برجم داشتگ اَنت ءُ نمیرانیں اکبر بگٹی ءِ زند کرد ءُ آئی ءِ دلیریں نمیرانی ءَ سھریں دروت پیش کُتگ ۔
زانگ بہ بیت نواب اکبر خان بگٹی بیست ءُ شش اگست دوھزار ءُ شش ءَ بلوچستان ءِ دمگ تراتانی ءَ پاکستانی پوج ءِ یک آپریشنے ءِ میان ءَ جنگ بیتگ اَت –
نواب اکبر خان بگٹی ءِ جنگ ءَ پد بلوچستان ءِ مھلوک ءَ پاکستان ءُ آئی ءِ ادارھانی سر ءَ زھر ءِ درانگازی گیش بیتگ اَنت ھما روچ ءَ بہ گر داں ھمک بیست ءُ شش اگست ءَ بلوچ مھلوک نواب اکبر خان بگٹی ءِ یات ءَ یاتگاری دیوان دارگ ءَ اَنت –