دشت، پنجگور ءُ جاؤ ءَ پاکستانی پوج ءِ بیڑ برجاہ سِی مردم بیگواہ

دشت، پنجگور ءُ جاؤ ءَ پاکستانی پوج ءِ بیڑ برجاہ سِی مردم بیگواہ

دی بلوچستان پوسٹ

سر بیتگیں ھالانی رد ءَ کیچ ءِ دمگ دشت ءِ ھنکین مزن بند ءِ کوھی دمگاں پاکستانی پوج ءَ بیڑ برتگ ءُ پَٹ ءُ پول بندات کرتگ –

دمگی مردمانی رد ءَ مروچی سیمی روچ اِنت کہ مزن بند ءِ کوھی دمگاں پاکستانی پوج ءِ بیڑ برجاہ اَنت ءُ مروچی ھم پوج ءَ برزی کمک ءَ بالگرد گون بیتگ اَنت ءُ کوھی دمگاں مانریتکگ ءُ بازیں جاھاں کوہ ءِ تہ ءَ دوت گندگ بیتگ اَنت –

آیاں گوشت کہ پوج ءَ گورگی ءِ راہ ءَ گوستگ ءُ سارتاپ سرپٹ ءَ وتی نوکیں چوکی جوڑ کرتگ ءُ نشتگ اَنت سرجمیں راہ ءُ دربند کنگ بیتگ اَنت –

دمگی مردمانی رد ءَ بانسر، چرپان کور کترینز ءِ کوہ ءُ سرجمیں دمگاں پوجی لشکر کشی برجاہ بیتگ اَنت اود ءَ بازیں جاھاں پوج ءَ درچک ءُ دار ھم مانداشتگ اَنت –

ھمے وڑ ءَ دشت ءَ ھواریں دمگ تلی دار، کروچی موکندر، زیارتی ءُ نیمگور کور ءَ پاکستانی پوج ءَ وتی نوکیں چوکی جتگ اَنت ءُ نشتگ –

بلوچستان ءِ جتائیں جاھاں پوجی زوراکی ھمک روچ برجاہ اَنت ءُ ھمے وڑ ءَ پنجگور ءُ جاؤ ءَ پاکستانی پوج ءَ بیڑ برتگ ءُ بازیں کچے ءَ مردم آوار جتگ ءُ بیگواہ کرتگ اَنت –

پنجگور ءَ آوار جنگ بیتگیں مردمانی تہ ءَ لھتے ءِ پجار حبیب، کھور، میر جان، نواب، کریم بکش، رُستم، آصف، دلدار، خالد، مزار، مھمد سالہ ءِ ناماں زانگ بیتگ اَنت –

ھمے وڑ ءَ آدینگ ءِ روچ ءَ جاؤ ءُ اورناچ ءِ کوھی دمگاں پاکستانی پوج ءَ بیڑ برتگ ءُ چمنگی، راھین، گری، گزی راھین ءَ بازیں جاھاں بمبگواریں بالگرداں جاہ جاہ ءَ تیرگواری ھم کرتگ –

چہ جاؤ پاکستانی پوج ءِ دست ءَ آوار جنگ بیتگیں مردمانی پجار مجید ء مھمد، صدیق چنال، دارو، رحیم بکش ء دولت ءُ جاؤ کوھڑو ءَ استاد ھامد ء جوگی ھم آوار جتگ ءُ برتگ اَنت –

ھالانی تہ ءَ گوشگ بیتگ کہ گچک ءِ کوھی چمگاں پوج ءَ زھر مانریتکگ ءُ چریشی ءِ آسر ءَ چہ چارسد پس، گوگ، ھشتر مرتگ اَنت –

بلوچستان ءِ سیاسی ءُ چاگردی مردمانی گوشگ اِنت کہ پاکستانی پوج آپریشنانی وھد ءَ لس مردماں آوار جنت ءُ بیگواہ کنت پدی ءَ لھتے مردم سالانی سال بندیگ بنت ءُ گنوگ بنت ءُ چریشانی تہ ءَ لھتے ءِ لاش ھم دز کپ اَنت –

زانگ بہ بیت بلوچستان ءِ بنجاھی شھر شال ءَ گوستانک ءَ بازیں لاش ابید ءِ پجار ءَ کَل ءُ کسارات کنگ بیتگ اَنت ایدھی ءِ رد ءَ لاشانی پجار نہ بیگ ءِ سوب ءَ لاش ھنچُش کل کنگ بیتگ اَنت کہ آیانی تہ ءَ ھنچیں لاش ھوار بیتگ اَنت آیانی دیم ءِ چھرگ ھم پجارگ نہ بیتگ اَنت –