نبشتانک: ھیات ءِ ھونانی ریچگ ءَ پَد بلوچ ءِ زھرگ پاد اتکگ
نبشتہ کار: گنی ھیات
دی بلوچستان پوسٹ
ھیات کے بوتگ؟
پرچا اے بلوچ. چُش جزباتی اَنت ؟
شال ءَ بگر داں کراچی۔
کیچ ءَ بگر داں گوادر۔
پسنی ءَ بگر داں جیونی ءَ
اورماڑہ ءَ بگر داں ھب چوکی ءَ
ھر کُج ءَ بلوچ ءِ پدریچ ھست اِنت پہ ھیات ءَ بلوچاں جاک ءُ سلوات اِنت ۔
زھرشانی، روانک، مُچی ءُ جرگہ
سرجمیں بلوچ پاد اتکگ اَنت پہ ھیات ءَ ۔
اے ھیات کے اِنت؟
کئی چُک اِنت کُج ءِ جھمنند اِنت ؟
ھیات ءِ کار چی بوتگ چونیں مردمے بوتگ۔
من سے ءُ چار روچ اِنت کہ رسانکدر ءُ سوشل میڈیا گندگ ءَ آں ۔
کہ بلوچاں ھیات ءِ نام دپ ءَ اِنت۔
رسانکدر ءَ ھیات ءِ اکساں بیگر دگہ منی چمّانی دیم ءَ ھچ کپگ ءَ نہ اِنت۔
کَسے ھست کہ من ءَ سرپدی بہ دنت اے ھیات کے بوتگ؟
ھو ھو بیا من ھم چوناھا مُردنی اِنت چِد ءُ پیسر نہ زانتگ بلے ھمے گندگ ءَ آں بلوچانی جاک ءُ سلوات ءُ زھرشانیاں بازیں جست ءُ پُرس ءَ پَد ھمے سرپدی رس اِتگ۔
تو گپے زان ئے لھتیں مردم مَرگ ءَ چہ پَد زانگ بیت۔
ھیات مالدارے ءُ منشیات پروشے نہ بوتگ نانکہ میر ءُ امیرے بوتگ ءُ نانکہ سرداری چُکے بوتگ نا ھیات ءِ پت سردارے ۔۔
ھیات مَرگ ءَ پیسر کَس ءَ نہ زانتگ بس آئی سنگت ءُ میتگ ءِ مردماں ءُ ھمے کہ ھیات ءِ ھم کلاس ءُ ھم تبک بوتگ اَنت وانگ جاہ ءَ ابید دگہ کَس ءَ نہ زانتگ کہ ھیات کے اِنت۔
ھمے ھاتر ءَ کہ آ گریب ءُ نیزگارے بوتگ ھیات ءِ کماش واجہ مرزا یک دھکان کار ءُ سکّیں نزوریں مردمے نیزگارے تنگ دستے وت ءَ ھم مال ءُ زمین ئِے نیست واجہ مرزا پہ دھکان کاری ءُ شریداری کار کنگ ءَ اِنت۔
سجّھیں روچ مچّانی سَر ءَ تور ئِے بستگ ھید شلونچ ایت.
پہ وتی چُکانی باندات ءِ ھاتر ءَ کہ باند ءَ ھمے بچ منی کوپگ ءَ سبُک بہ کن اَنت۔
واجہ مرزا ئِے چار چُک بوتگ اَنت چارینانی تہ ءَ یکے ھمے ھیات بوتگ کہ مروچی سرجمیں دگنیا ءَ ھیات ءِ نام دپ ءَ اِنت۔
شَر اِنت ھیات کہ گریب ءُ نیزگارے بوتگ اے بلوچ پرچا انچُک جاک ءُ سلوات کنگ ءَ اَنت ؟
ھو راست اَنت سکیں گریبے بوتگ بلے بیا کہ شَریں وانندھے بوتگ۔
ھیات وتی کھول ءَ چہ یکیں ورنا بوتگ کہ آ کراچی مزن شھدربرجاہ ءَ “پزیالوجی ءَ بی ایس ءِ “پائنل ایر” نودربر بوتگ۔
بلے بیا کہ ھیات ھمے کرونا ءِ وھد ءَ واتر وتی گِس ءَ روت کیچ آپسر ءَ ھیات ءِ گِس ھمود ءَ اِنت۔۔
ھیات چارایت کہ من وَ سکیں گریب ءُ نیزگارے آں منی کماش نہ رَس ایت گوں آ ھم تھنا اِنت گڑا ھیات ھم پہ کماش ءِ کوپگ ءِ سبُک کنگ ءَ ڈگارانی سَر ءَ روت کہ کماش ءِ کار کَمے کمتر بہ بنت۔
بلے بے بھتیں کماش ءَ نہ زانت کہ مروچی ھیات جان ءِ آکر ءِ روچ اِنت۔
ھیات ءِ بانُکیں مات ھم ڈگارانی سَر ءَ ساڑی بیت پہ مچّانی بُن ءِ پون ءُ ناھانی چنگ ءَ چوناھا مات ھَر وھد ءَ گِس ءَ بوتگ گِس ءِ کار ءُ چلوپگ ئِے کُتگ اَنت بلے ھر وھد ءَ کہ ھیات ڈگارنی سَر ءَ اتکگ مات ھم وتی بچ ءِ پجّیگ ءَ اتکگ گوں کہ من ءَ وتی بچ دِل نہ بیت تھنا۔
ھید بچّ ءِ چمّانی تہ ءَ برو اَنت۔
مات ءَ دم پہ ساھت وتی گُشان ءِ لمب زُرتگ پہ ھیات جان ءِ پیشانیگی ھید پَھک کُتگ اَنت بے بھتیں مات ءَ ھم نہ زانتگ اَت کہ ھمے گشان کہ من وتی دُریں بچّ ءِ ھیدانی پھک کنگ ءِ بدل ءَ منی گُشان پچ گِرگ بیت ءُ بچ ءِ چمّ ءُ دست ھمے گُشان ءِ سَر ءَ بندگ بنت ءُ مئے مات ءُ پِت ءِ دیم ءَ گِرُّکان کنگ بیت ءُ دَگ ءِ سَر ءَ بَرگ بیت ءُ بے بھتیں مات ءُ پِت ءَ ھچ نہ زانتگ اَت کہ لجُزیں دژمن کیت ھیات ءَ مئے دیم ءَ پاد ءَ گردن ءَ دیّنت ءُ تیرانی آماچ ئِے کن اَنت ۔۔
بلے ھیات ءِ میار چی بوتگ پرچا گِرکان کنگ بوتگ ءُ تیرانی آماچ بوتگ؟
بلوچے بوتگ وانندھے بوتگ دژمناں تُرْس اِتّگ کہ باند ءَ ھمے ھیات باریں چُنت ھیات جوڑ کنت پہ بلوچاں۔
بلوچ ءِ بیگ زاناں گناہ اِنت؟
اگاں بلوچاں زندگ بوْگ ءِ ھَک نیست؟
یا وانندھیں بلوچاں دژمن زندگ بوْگ ءَ نیل اِیت؟
ھو انچوش اِنت اگاں بلوچ وان اَنت بلوچانی چم ءُ دِل پچ بنت ءُ آ وتی راہ ءِ راست ءَ زان اَنت۔
پہ وتی نوکیں پَدریچ ءَ باز کُت کن اَنت۔
بیا کہ دگہ جستے ھست
ھیات ءَ چہ پیسر بازیں بلوچ وانندھے شہید کنگ بوتگ انگت باز گار ءُ بیگوہ اِنت۔
آ وھد ءَ اے بلوچ کُج ءَ بوتگ اَنت اینچکیں زھرشانی ءُ روانک اِش نہ کَش اِتّگ؟
آ وھد ءَ بلوچ تُرْسینگ بوتگ اَنت پادتراپ دیگ بوتگ اَنت اگاں ھَکّیں گپ کُت تو ھم گار ءُ بیگوہ ءُ کُشگ بئے ۔
بلے مروچی بلوچاں چار اِت کہ ھما بلوچ گپ کنگ ءَ نہ اَنت وتی دپ اِش داشتگ ھما ھم کُشگ ءُ گار کنگ بوگ ءَ اَنت ھمے ماہ ءَ پیسر کسانُکیں بْرمش ءِ مات گھار ملک ناز شھید کنگ بوت بْرمش ءِ جند زدگ کنگ بوتگ سے ماہ ءَ نادراہ جاہ ءَ درمان ءُ دارو کنگ بوت ۔۔
ھمے یکیں ماہ ءِ تہ ءَ گھار کُلسوم بلوچ ھم شھید کنگ بوت آئی دوئیں چُک چُنت روچ ءَ بے ھوش بوتگ اَنت۔
ملک ناز ءَ ،ءُ کُلسوم ءَ ، ءُ ھیات ءَ آزادی ءُ بلوچ ءِ گپ نہ کُتگ۔۔
ھمے ھاترا مروچی سرجمیں بلوچ برانز گپتگ اَنت کہ گپ کن ئے یا نہ کن ئے ترا دژمن ءِ دست ءَ مِرگی اِنت۔۔
راستی ءَ پَدر کن ئے یا نہ کن ئے ترا مِرگی اِنت ۔
جُنز ءَ ھور بئے یا نہ بئے ترا مِرگی اِنت ۔
سیاست کن ئے یا نہ کن ئے ترا مِرگی اِنت ۔
گوں بلوچ سلاہ بنداں ھور بئے یا نہ بئے ترا مِرگی انت ۔۔
روانک ءُ زھرشانیاں ھور بئے یا نہ بئے ترا مِرگی اِنت ۔۔
دَرمُلک ءَ نند ئے یا وتی زمین ءِ سَر ءَ ترا مِرگی اِنت۔
ھمے ھاتر ءَ کہ تو بلوچے ئے بلوچ ءَ زندگ بیگ ءَ دژمن نیل اِیت۔۔
نوں ھیات ءِ شھید بوْگ ءَ پد بلوچاں ھوش کُتگ۔
جنگ کنگی اِنت گوں جُنز ءَ ھور بیگی اِنت دژمن نزور کنگی اِنت۔
دژمن سریں پروش کنگی اِنت۔
یک مُشت ءُ یک جاہ بیگی اِنت بلاھیں راونک ءُ زھرشانی کنگی اِنت۔
بلکیں مئے جان بہ رَک ایت ما زندگ بہ بہ ایں ۔
ھیات ءِ رتکگیں ھون ءَ زرمبش دوبر نوک کُتگ بلوچ ءِ جزبگ ءُ جزبات انچوش مھکم ءُ تمرد کُتگ کہ انّیگیں وھد ءَ دژمن ءَ سریں پروش کُت کنت۔
ڈیھ ءَ گوں مھر کنوکانی دوستی انچوش مُھکم اِنت۔
بلوچستان ءَ ھر زھگ ھیات جوڑ بوتگ
بلوچ سرجم ءَ ھیات جوڑ بوتگ اَنت ۔
ھیات ءِ رتکگیں ھوناں ڈیھ ءِ دھکان ءُ مزدور ءُ بزگرانی اُمیت اِنت ۔۔
پہ ڈیھ ءَ ءُ پہ زمین ءَ ھرکس ءَ نمیران بیگ لوٹ ایت۔
ھیات ءِ رتکگیں ھوناں گون نَد ءَ نبیساں کن اِت۔
ھیات ءِ نَد زمین ءِ سَر ءَ نہ کپتگ اے نَد ھر بلوچ ءِ پنجگ ءَ اِنت ۔
آشوبی مردم مرگ ءَ رند زندگ مان اَنت۔
ھیات ءَ وتی نَد بلوچانی میار کُتگ۔
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔