ھیات بلوچ ءِ کوش ءِ ھلاپ بلوچستان، سند خیبر پختونخواہ ءُ پنجاب ءَ ھوار یورپ ءَ زھرشانی
دی بلوچستان پوسٹ
ایف سی ءِ دست ءَ سیزدہ اگست ءَ بیران بیتگیں بلوچ نودربر ھیات مرزا ءِ کوش ءِ ھلاپ ءَ زھرشانیانی درچ یکشلی ودان اِنت، بلوچ نودربراں بلوچستان ءِ جتاھیں ھند ءُ دمگاں ھیات ءِ کوش ءِ ھلاپ ءَ زھرشانی روانک کش اِتگ رژن ءِ چراگ روک کُتگ ءُ ھاموشیں زھرشانی کَنگ بندات کُتگ۔ اے زھرشانی چہ تُربت ءَ بندات بیتگ انت ءُ پد ءَ شال، کراچی، اسلام آباد ءُ وزیرستان ءَ ھوار نیدرلینڈز ءُ جرمنی ءَ ھم زھرشانی کنگ بیتگ۔
ھیات مرزا ءِ وئیل سینزدہ اگست ءِ بیگاہ ءَ ھما وھدءَ دیما اتکگ وھدیکہ ایف سی ءِ سر ءَ“آئی ای ڈی” اُرش کنگ بیت پد ءَ ایف سی آبسر ءِ ھند ءَ بیڑ بارت ءُ ھمے بیڑءِ نیام ءَ ھیات ءَ چہ وتی مات ءُ پِت ءِ دیم ءَ مچکدگانی تھءَ چہ دزگیر کنت ءُ دیم پہ دگ ءَ بارت ھیات ءَ آئی ءِ مات ءُ پِت درست پریات کن اَنت کہ من بے میار آں بلے ابید چہ آیانی گپءِ گوش دارگ ءَ ایف سی ءِ کارمند ھیات ءِ دستاں گوں آئی ماتءِ سر ءَ چہ پچ گپتگیں گُشان ءَ بند اَنت ءُ بازیں لٹ ءُ کُٹ ءَ پد آئی ءِ سینگ ءَ ھشت تیر جن اَنت ءُ ھما جاہ ءَ ھیات ساہ دنت۔
ھیات ءِ کوش ءِ ھال چاگردی رسانکدراں رسگ ءَ پد بلوچستان ءِ نودربر، سیاسی جھد کار درست اے کوش ءِ ھلاپ ءَ ترندیں زھرشانیاں بندات کن اَنت ءُ دانکہ پاکستان ءِ انسانی ھقانی مزن وزیر شیرین مزاری پہ ٹوئیٹ کنگءَ لاچار بیت۔
دومی نیمگ ءَ ایف سی ءِ کرد ءِ پلگار ءِ ھاترءَ آئی جی ایف سی بلوچستان ھیات ءِ لوگ ءَ رؤت ءُ گوں آئی ءِ کماش ءَ عکس کشیت ءُ درشان ءِ شنگ کنت کہ اے یک مردمی کردگار ءِ بیتگ۔
بلے مئے جھگیرانی ردءَ بلوچستان ءِ مھلوک اے گپ ءِ منگ ءَ ھچ پیم ءَ ساڑی نہ اَنت کہ یک مردمے ءِ چُشیں زوراکی ءِ تھنا کُت بہ کنت۔ ھندی مردمانی چم دستگیں شائدی ءُ پد ءَ جاورھالانی گندگ ءَ پد اے گپ انگت پدر بیت کہ ایف سی ءَ تھنا یک مردم ءَ دیم ءَ داتگ دانکہ آئی کرد پولنگ کنگ مہ بیت۔
دومی نیمگ ءَ بلوچ نودربر رھشون ماھرنگ بلوچ ءَ وتی درشان ءُ ترانانی تھءَ ترندیں گالانی تھءَ گوشتگ کہ اے یک ھواریں کرد اِنت ایشی ءَ یک مردمے سر ءَ لڈگ راستیں جرمکاراں رکینگ اِنت۔
ھمے وڑءَ بلوچ وانندہ گل آں چہ بلوچستان ءَ ایف سی ءِ کَشگ ءِ لوٹ کُتگ ءُ زھرشانی کنگ ءَ اَنت۔ مئے جھگیرانی ردءَ پہ ھیات ءَ مروچی ھم بازیں ھند ءُ دمگانی تھءَ زھرشانی ءُ رژن ءِ چراگ روک کنگ ءُ روانک کَشگ بیتگ۔