نبشتانک: هر کُج ءَ ئے بچکنداں بات ئے
نبشتہ کار: نورمھمد نور
سُھریں دْروت همبل
مروچی نُھ روچ اِنت کہ تو رپتگ ئے ، نا هال نا اِهوال ، من اوں بے توار ءَ نِشتگ آں کہ کدی ترا بے هیال بِہ باں !
پرچا کہ تئی یات ، تئی هوناں مِیچّلیں جون ءُ تئی ارسیگیں مات ءِ چِیهال ءُ تئی کماشیں پِت ءِ چمانی بے وسی گوں من سَگگ نہ بیت-
هیات تئی روگ ءَ پد
منی چاریں آتراپاں یک ترسے ءَ مانشان اِتگ همک نیمگ ءَ چاراں داں بے کراری اِنت
لوٹاں کہ دمانے بچکنداں پد ءَ تئی یات من ءَ انگِر ءَ کن اَنت ءُ من پد ءَ ارسیگ باں-
تو سرپدئے تئی روگ ءَ پد همک هیاتیں انسان ءَ وتی بچکند شَموشتگ اَنت !
همک درچک ءُ دار پُرسیگ اِنت همک مات ءِ جگر هونین اِنت
تئی مات ءِ کسہ ءَ نہ کن آں کہ گوں من نہ بیت
من هُشک ءُ هیران نشتگ ءُ ترا جیڑگ ءَ اِتاں کہ ترا کُج ءَ روگی اَت تو پہ اشتاپی کُج ءَ رپت ئے ؟
پد ءَ تئی وش بهتی ءِ سر ءَ لوٹاں کہ دمے بچکنداں بلے همے دمان ءَ بیگواهیں مردمانی مزنیں لڑے کیت ءُ منی چمانی دیم ءَ میلانک بیت ءُ من پد ءَ ارسیگ باں
کہ آیاں چنچو موسم ماں زندان ءِ تهاریں کوٹیانی تہ ءَ ببا داتگ
کے رَپتگ کے پش کپتگ ؟؟ کس نہ زانت
هیات جان! اے ارس ءُ هونانی کِسہ مروچی نہ اِنت
زمانگانی زمانگ گْوستگ اَنت کہ همے زمین ءِ دلبند ءَ همے دمک ءُ دَگّانی سر ءَ هزاراں هیاتانی ارواه چہ تیراں سُپتگیں جوناں گِسر کپتگ اَنت ، هزاراں مات ءُ پِتانی جگر هونین اِنت
هیات! تو گُڈی هیات نہ ئے مارا چنچو هیاتیں ارواه ماں کبراں اِیر دیگی اِنت مارا چنچو ارس گْوارگی اِنت
مارا هپتاد ءُ سے سال سرجم اِنت نوں ما سوهو اِیں
هیات تئی تیراں سُپتگیں ورناهیں جون، پیریں پت ءُ مات ءِ بے روکیں چمانی گندگ ءَ پد گْوش ئے زاناں دل ءَ یک آسے جمبور اِنت ، تہ ءِ دنیا…. زمین چنڈ ءَ وتی ارجاں جتگ
هیات ! اچ تو پد اوں هچ چیز مَٹ نہ بوتگ( بید ء تئ مات ءُ پت ءِ رژنائیں دنیا ءَ کہ اچ تو پد تهار بوت) هما آه ءُ پریات هما بے وسی ءُ هما ودار کہ آسر بوگ ءِ نام ءَ نہ زانت
بلےچون کن اِیں
همک بلوچ ءَ همک هیات ءَ اِے چکاس ءِ آس ءَ گْوزگی اِنت
مرچی تو، باندا من ءُ پوشی دگرے ، اے کِسہ همے وڑ ءَ روان کنت
هر کُج ءَ ئے بچکنداں بات ئے
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔