تمپ ءَ پوج ءَ بیڑ برتگ ءُ یک مردمے آوار جتگ

دی بلوچستان پوسٹ

سر بیتگیں ھالانی رد ءَ تمپ ءِ دمگ دازان ءَ پاکستانی لشکر ءَ بیڑ برتگ ءُ یک مردمے آوار جتگ ءُ بیگواہ کرتگ –

ٹی بی پی ءَ سر بیتگیں ھالانی رد ءَ گوستگیں شپ ءِ ساھت دوازدہ ءَ پاکستانی پوج ءَ تمپ دازن ءَ بیڑ برتگ ءُ جمیل ءِ صالح مھمد آوار جتگ ءُ برتگ –

دمگی مردمانی رد ءَ جمیل ءِ اُمر دوزدہ سال اِنت ءُ گوستگیں شپ ءَ دازن ءَ پوج ءَ صالح مھمد ءِ لوگ انگیر ءَ کرتگ اَنت ءُ اود ءَ آئی ءِ کسان سالیں بچ آوار جتگ ءُ برتگ –

زانگ بہ بیت چِد ءُ پیسر ھم پاکستانی پوج ھژدہ اگست ءَ ھم پاکستانی پوج ءَ دازن ءَ بیڑ برتگ ءُ اود ءَ مناب ءُ شھزاد نامیں دو مردم آوار جتگ اَت کہ اشانی تہ ءَ مناب یلہ کنگ بیتگ اَت ءُ شھزاد انگت ءَ بیگواہ اِنت –

اے وھد ءَ بلوچستان ءِ جتائیں جاھاں پاکستانی پوج ءِ لشکر کشی برجاہ اَنت ءُ بازیں جاھاں لشکر کشیانی میان ءَ بلوچ زالبولانی بیگواھیانی ھال ھم پیداک اَنت –