نبشتانک: نوک ودی بیتگیں بچ ءِ نام ءَ
نبشتہ کار: مھروان کمبر
دی بلوچستان پوسٹ
(شھید بیتگیں سرمچارے ءِ گڈی نمدی پہ وتی نوک ودی بوتگیں بچ ءِ نام ءَ ۔ اے من پکشن رنگیں ھیالے نبشتہ کُتگ کس ءَ گوں ھمدپ نہ انت منت وار)
منی بچ! من زاناں چہ من ءَ رند ترا منی یات بے کرار کن اَنت۔ بِہ گِند ئے من تئی گُناھکاراں کہ من تئی چہ پھریزگ ءَ گیش بلوچستان ءِ پھریزگ ءَ کوہ ءُ اگاراں درکپتگاں ، ھما ھکّ پتے ءِ پہ وتی بچّے ءِ ھاتر ءَ بَہ اَنت بِہ گِندئے من آ ھکّ پیلو کُت نہ کُت اَنت۔
بِہ گندئے تو منی گون ءَ گِلّہ ھم بِہ بَہ ئے کہ شالا من زندگ بہ بوتیناں تئی ھواری ءَ زند ءِ وشیں روچ بِہ گوازینتین آں۔
بلے منی ارواہ! اے وڑ گیگ ءُ گْوم نہ اَت۔، چی ءَ کہ گُلامی ءِ سانکل پاداں نہ۔ارواہ ءَ گوں پیڑ اتگ اَنت۔ پیڑ اتگیں ارواہ ءَ گوں کَے زندگ بیت کنت۔؟ پادانی سانکل بِہ گندئے گوں تیزیں آسنے ءَ بُرّگ ءُ چگل دَیَگ بِہ بَہ اَنت۔بلے ارواہ ءَ گوں پیڑ اتگیں سانکلانی سِندگ ءِ ھاتر ءَ سلاہ بند بُوَگ، کوہ ءُ اگاراں درکپگ ءُ مُھکمیں جُھدے ءَ گوں ھمگرنچ بُوَگ ھژدری اَت۔پمیشکا من ترا گوں زندگی ءِ چہ وشیں روچانی گْوازینگ ءَ کوہ ءُ اگاراں زند ءِ گْوازینگ ارزشت دات۔
منی ارواہ! مروچی تو ھما گلامیں گُلزمین ءَ ودی بوتگ ئے کہ اِد ءَ زندگ بُوَگ اِنچو ارزان نہ انت، اِد ءَ ھمُک ساہ ءِ کشّگ ءَ برے ترا اِزّت ءِ برے مال ءُ جان ءِ کیمت اَدا کنگ کپ اِیت۔۔ تئی گُلزمین ءِ ھمُک چار راھانی سر ءَ درامد گونگیں بوٹ پادیں سپاھی نشتگ اَنت ءُ تئی پجّار ءَ لوٹ اَنت کہ تو کَے ءُ چہ کُجا پیداک ئے۔؟ برے برے ترا پجّار ءِ جُست کنگ ءَ پیسر شھمات ءُ لگتاں گوں مان بند اَنت۔
منی بچّ! وھدے مُلک ءُ راج گُلام بَہ اَنت گُڑا اُود ءَ تُنّ ، گُژن ءُ شُد، نا اِنساپی، کُشت ءُ کُوش الم بیت۔ اُود ءَ وشّی ءُ شاتکامی ءِ جاہ ءَ موتکانی موسم سر ءَ ساھیل ءُ ساچان بَہ اَنت۔ تئی وتن بلوچستان ءِ سر ءَ ھم کوزہ گیریں مُلک ءِ ھاکمی اِنت کہ تئی ھر چیز وتی پنجگاں زُرتگ اَنت ءُ تئی وتن ءِ دْرستیں مال ءُ مڈّی ، نیلّیں زِر وتی کوزہ ءَ کُتگ اَنت ءُ پہ ترا پہ تئی گلیں راج ءَ شُد ، تُنّ ، بزّگی ، بے وابی ءُ دِگہ چاگِردی سلکاری سر ءَ مُشتگ اِنت ئِے۔
بلے منی بچّ! تئی گلزمین ءِ پُسّگاں نی سما کُتگ ءُ اے زُلم ءُ زُوراکیانی دیم ءَ اُوشتاتگ اَنت ، ترا ھم ھمے کاروان ءِ بھر بَیگی اِنت۔ ترا ھم شُد ، تُنّ ءُ گژن سگگی اِنت ، بلے زُلم ءِ ھِلاپ ءَ اُوشتگی اِنت ءُ ھمے کاروان ءِ بھر بُوَگی اِنت۔پرچا کہ ما وتی گُلزمین بلوچستان ءِ وامدار اِیں۔ اے وامانی اَدا کنگ مئے سر ءَ پرز اِنت۔ اے گلزمین پد ءَ گُل ءُ گلزار کنگی اِنت۔ پہ اے گُلزمین ءِ سبز بُوَگ ءِ ھاتر ءَ مارا وتی ھونانی شھجو تاچینگی اِنت ، پمیشکا من وتی ھوناں گوں گُلزمین سمبھینتگ۔
منی جان! مرچی تو وتی چمّ پچ کُتگ اَنت ءُ تو گِندئے اِد ءَ ھمُک دیوالاں بُرّ اِتگیں سر سمبھینگ بیتگ اَنت۔ زمین ءِ سر ءَ ھونانی شھجو تچگ ءَ اَنت۔۔۔
اِد ءَ ھر کس ٹُکّرانی تہ ءَ بھر ءُ بانگ کنگ بیتگ۔
اِد ءَ بھار چہ تاکریچ ءَ پیسر وتی پُلّاں ریچ اَنت ءُ زمین زادگانی گوم ءَ وتی ھمدردی ءَ درشان کن اَنت۔۔۔
اِد ءَ جوزگ چو شاھین ءَ بال اَنت ءُ تُرس زمین ءَ چیر شُتگ۔
اِد ءَ چمّ در کنگ بیتگ اَنت ، بلے واب اَنگت گِندگ بیت۔ اِد ءَ لجّ ءُ ننگ پادمال کنگ بیتگ اَنت ، بلے ننگ انگت دگانی سر ءَ وتی بیگوائیں زھگ ءُ کماش ، براس ءُ جودانی شوھاز ءَ درکپتگ اَنت۔
اِد ءَ زمین زادگانی گماں آزمان ھم ارساں گْوار اِیت ، بلے پد ءَ ھم اے زمین زادگانی ھِمّت ءُ توکل چو کوہ ءِ البُرز ءَ مِکّ اِنت۔
منی بچ! اِد ءَ زھگ گوں تیزی ءَ جوان بَہ اَنت ءُ جوان پیری ءَ سر نہ بَہ اَنت ءُ ساری ءَ مرگ امباز اَنت۔
اِد ءَ ھر گور ءَ بارود ءِ بو شِنگ اِنت ، بلے انگت ساہ کشّگ بیت۔
اِد ءَ نااُمیتی ناچ ءَ اِنت ، بلے پد ءَ ھم اُمیت نااُمیتی ءَ پُروش دَیَگ ءَ اِنت۔
اِد ءَ ھر کس بے توار کنگ بیتگ ، بلے انگت کوکار اِنت ءُ یک توارے چِست اِنت۔ ھمے یکّیں توار اِنت کہ پاکستان ءِ لشکر ءُ لشکریانی کُمک کنوکانی شپ ءِ واب ئِے بُرتگ۔
ھمے یکّیں توار اِنت کہ لشکریاں تُرسین اِیت ءُ چہ تُرس ءَ ھمُک شپ تُوپّک ءَ چہ آس شان اِیت مئے سر ءَ۔
ھمے یکّیں توار اِنت کہ لکمیر دابیں بچّاں آوار جنت ءُ بیگواہ کنت۔
ھمے یکّیں توار اِنت کہ نودربر ھیات گونگیں ورناھاں تیر باران کنت۔
ھمے یکّیں توار اِنت کہ بْرمش ءَ ٹپّیگ کنت ءُ مات ملِکناز ءَ شھید۔اے توار آشوب ءِ توار اِنت۔ اے توار زُلم ءُ زُوراکی ءِ ھلاس کنگ ءِ توار اِنت۔، اے توار تئی وتواجھی ءِ توار اِنت۔ ، اے توار تئی آجو تبیں زِند ءِ گْوازینگ ءِ توار اِنت۔ اے توار ایرموش کنگی نہ اِنت ، بلکیں اے توار ءَ دِگہ یک توارے پِر کنگی اِنت۔ وشیانی منگیراں بات ئے، آجوئی ءِ مراداں بہ گندات ئے-
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔