نبشتانک: ھیات ءِ مات ءُ گھارانی واھگ سرجم نہ بوت اَنت
نبشتہ کار: گنی ھیات
دی بلوچستان پوسٹ
وھدیکہ یک چُکے ءَ آئی ءِ مات ءِ دیم شھید بہ کن ئے گُڑا آ وھد ءَ ھما بے وسیں ءُ لاچاریں مات ءُ پِت ءِ سر ءَ چی گْوز اِیت؟ اے مات ءِ جاور چون بنت کہ نُھ ماہ ءَ تھنا وتی چُک ءَ وتی لاپ ءِ تہ ءَ رُدین اِیت، اے وڑیں دردناکیں درداں من کجام لبزاں گوں درشان بہ کن آں؟
مات ءُ پت ءِ دیم ءَ لَٹ ءُ کُٹ کنگ ءَ چہ پد دست ءُ پادانی بندگ ءَ چہ رند جان ءَ ھشت تیر جنگ ءُ نوک رُستگیں ھیات ءَ پہ مدامی زندگی ءَ چُٹینگ-!
مات ءُ پِت ھما مکلوک اَنت کہ آ وتی چُک ءِ سر ءَ گرمیں گوات ءِ کشگ ءَ ھم نہ لوٹ اَنت – آ وتی چُک ءِ سر ءَ کسّی ءِ تُرندیں توار ءَ ھم برداش نہ کن اَنت – ھیات ءِ پت ءُ مات ءِ دیم ءَ آئی ءِ لاڑُّکیں چُک ءَ را اَزیتیں کُشک – ایشی ءِ اکس ءَ چہ دل لرز اِیت چونیں دردناکیں ندارگے بیت – ھیات ءِ درد ءُ بے وسیں توار – ھیات ءِ مات ءُ پت ءِ گوشاں پہ مدامی جکس اِیت – آ ازیت ءُ دردناکیں ندارگ پہ مدامی ھیات ءِ مات ءُ پت ءَ واب ءَ نیل اَنت
یک ماتے وتی چُک ءِ پہ ناھک کُشگ ءِ سر ءَ گریو اِیت کوکار کنت
ءُ من زاناں کہ آ نی زوت گنوک بیت
پرچاکہ پیرزالیں ماتانی ورنائیں چُک جنگ بنت گُڑا اے ماتانی زندگی کم بنت
ھیات وتی کھول ءَ چہ یکیں ورنا بوتگ کہ آ کراچی مزن شھدربرجاہ ءَ “فزیالوجی ءَ بی ایس ءِ “فائنل ایر” نودربر بوتگ ، ایشی ءَ وتی سنگت گْوشتگ اَنت کہ من ھما وھد ءَ گندگ لوٹاں کہ وھدیکہ من کابل باں ءُ یک اسٹیجے ءَ سر باں ءُ ھمے کُمک ءَ وتی لوگ ءُ راج ءِ ھاتر ءَ چیزے کُت بہ کن آں ءُ ھمے ھاتر ءَ وتیگانی زند ءَ بدل بہ کن آں –
ھیات ءِ مات ءَ چہ یات آتک چُنت بے میاریں ماتانی دود لگتمال کنگ بوتگ ءُ چُنت بے میاریں مردم اشانی پھازوکاں کُشتگ ءُ چُنت ماتاں اے ندارگ ءَ وتی چمّاں گوں دیستگ اَنت –
بلوچ راج ءِ سر ءَ بیوکیں زُلم ما چمشانکے بہ دے ایں گُڑا اد ءَ کس ءَ انساپ نہ رس اِتگ – برمش ءِ زدگ کنوک ملک ناز ءُ کلسوم بے گناہ شھید کنوک ءُ ھزرانی بلوچ کشوک انگت سر ءِ بازار ءَ چکرگ ءَ اَنت کس آیانی مید ءِ ٹالے ھمے دست جت نہ کنت-
مروچی تھنا ھیات شھادت نہ اِنت مروچی ھیات جان ءِ ھمے دلپدردیں اکس کہ ماں سوشل میڈیا شنگ بوَتگ بلے ایشی ءَ چہ پیش ھمے انچیں وئیل بوتگ پاکستانی لشکر یا آئی ءِ داشتگیں ڈیتھ اسکواڈ ءِ کارندھانی دست ءَ شھید بوتگ اَنت اے زوراکی ھما وھد ءَ کہ پاکستان ءَ بلوچستان گپتگ داں مروچی برجاہ اِنت
ترا آ مات ءُ بلوچستان ھچبر پھل نہ کنت
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔