دی بلوچستان پوسٹ
ٹی بی پی پتر ءَ سربوتگیں ھالانی رِد ءَ بلوچستان ءِ دمگ لسبیلہ اوتھل ءَ کوسٹ گارڈ ءِ گاڑی ءَ پرپٹ ءَ سواریں مردم دام کرتگ انت ـ وئیل ءِ سوب ءَ مات ءُ چک ءَ ھوار پنچ مردم بیران چار زدگ بوتگ اَنت ـ
گیشیں ھالانی رِد ءَ سئے شمبے ءِ بیگاہ ءَ لسبیلہ ءِ دمگ اوتھل لنڈاپل ءَ پاکستانی کوسٹ گارڈ ءِ پراڈو گاڑی ءَ سئے جتائیں پرپٹاں گوں ڈیک وارتگ ـ
ڈیک ورگ ءِ سوب ءَ پرپٹاں سواریں نور مھمد ء ابو آچرہ، عظیم اللہ ء مھمد ھاشم، غلام مھمد ء شفیع مھمد، گلام مھمد ءِ لوگ بانک ممی ءُ آئی ءِ چار سالی ئیں چُک غلام رسول بیران بوتگ انت ـ وھدیکہ پراڈو گاڑی ءَ سواریں پاکستانی کوسٹ گارڈ ءِ کارمند جمعہ خان، شھزاد ء فاروق، امتیاز ء زوالفقار علی، افضل ء یار مھمد ءُ عبدالغفور ء اللہ بخش آچرہ زدگ بوتگ انت ـ
ھال سر بوھگ ءَ ایدھی ایمبولینس وئیل جاہ ءَ سربوتگ انت ـ لاش ءُ زدگ بوتگیں مردم ھما دمان ءَ چست کرتگ ءُ ڈسٹرک ھیڈکواٹر اوتھل ءِ نادراھجاہ بُرتگ انت ـ
ھمودا اژدری چار ءُ ٹپاس ءَ پد لاش کھول ءِ ھوالگ ءَ کنگ بوتگ انت ءُ زدگ بوتگیں مردم درمان کنگ ءَ پد پہ گیشیں علاج ءِ ھاتر ءَ کراچی ءَ دیم دئیگ بوتگ اَنت
وئیل تیز رؤگ ءِ سوب ءَ دیم ءَ اتکگ ـ اے درگت ء ھندی مردمانی گُشگ انت کہ پاکستان ءِ کوسٹ گارڈ گاڑی سک باز تیز رؤگ ءَ بوتگ پمیشکہ وئیل دیم ءَ اتکگ ـ
وئیل ءِ درگت ءَ اوتھل ءِ ھندی پھازدار گیشیں پٹ ءُ پول کنگ ءَ انت ـ