نبشتانک: شھید ھیات ءِ رتکگیں ھون ءُ کلم چُوک
نبشتہ کار: آجو کینگی بلوچ
دی بلوچستان پوسٹ
من وھدے پنجگور ءَ شُتاں پہ وانگ ءَ منی سنگتی منی گند ءُ نند گیشتر گوں بی ایس او ءِ سنگتاں بوت پرچاکہ آ وھد ءَ گیشتریں مزنیں مُچی بی ایس او ءُ ھمے آزاتی لوٹوکیں پاٹی ءُ گلانی اِت اَنت من ھم ھمے مُچی ءَ گوں سنگتاں ھوار بوتاں من گوں لھتیں کامریڈیں سنگتاں جوش ءَ اِتاں نا گرم ءُ نا سرد بس بینر مدام بڈائیتاں- ھمے مُچیانی تہ ءَ شھید آگا آبد شاہ ءُ شھید لالا منیر ءِ وڑیں مھروان دیست اَنت گڑا گیشتر ھب ءُ واھگ بوت ھمے گلاں گوں ھوار بہ باں وتی زھر ءُ جوشاں گوں نارہ ءُ کوکاراں ھلاس بکناں۔
بلے وھد ءُ ھالات بدل بوان بوت اَنت شھید لالا منیر گوں شھید گلام مھمد ءُ شھید شیر مھمد ءَ چست کنگ بوت اَنت چیزے روچ ءَ رند ھمے سئیں بلوچ راج ءِ اوست ءُ امیتانی لاش ماں مُرگاپ ءَ دور دیگ بوت اَنت گڑا من ءُ منی ھمراھیں کامریڈ گیشتر جزباتی بوت ایں بازار ءَ کوکار ءُ جاک اَت جنگ ءُ پروشگ اَت پاکستان ءِ سرکاری ادارھاں ماندارگ اَت پہ سرکار ءَ ھچ پشت نکپت
ھمے دوران ءَ شھید آگا آبد شاہ گوں دگہ سنگتاں ھوار مارا کار گرگ اَت۔۔۔۔۔۔۔۔۔۔۔۔ من ءَ شھید آگا آبد شاہ ءَ ھال کت ءُ کہ تو گوں چیزے سنگت ءَ بیا اِت منی نیمگ ءَ من ءَ کار ھست گڑا من گوں وتی ھمے جزباتی ئیں کامریڈاں شتاں شھید آگا آبد شاہ ءِ گُشتگیں جاہ ءَ شھید ءَ مارا سر ءُ سوج کُت ءُ روگ ءِ وھد ءَ چار پنچ آزاد بلوچستان ءِ بلاھیں بیرک دات ءُ گْشت ئِے ھمے بیرکاں بر اِت چار راہ ءُ شوکیں جاھاں بہ جن اِت کہ ھرکس اش بہ گند ایت گڑا ھمے بیرک ما آؤرت ءُ جت اَنت ءُ مزنیں بیرکے ما ھمے سنگتاں زرت ءُ کلم چار راہ بزاں (کلم چوک) ءَ جت پنجگور ءِ زمین گوں وتی کامریڈ ءُ انکلابی ئیں مُچیاں نامان اَت کلم چوک پنجگور ءِ کالج ءِ کش ءَ ءُ پاکستان ءِ آرمی کیمپ ءِ دیم پہ دیم ءَ ۔
بلے ھمے مُچی ءُ شور ءُ کوکار پاکستان ءَ وش نہ بوت اَنت پرچاکہ پاکستان ءِ ھچ وڑیں بُنیادے پش نہ کپتگ اَت۔ اسکول ءُ کالجاں پاکستان ءِ نام ءُ نشان نیست اَت پاکستان ءِ بیرک ءُ آئی ءِ نام پاکستان ءِ آرمی ءُ آئی ءِ کیمپانی تہ ءَ بندوک اِت اَنت بس تو گُش ئے پاکستان ءَ لڈ اِتگ ءُ شتگ اسلام آباد ءُ پنڈی ءَ۔
پاکستان ءَ گوں وتی جرنیلاں وتی نوکیں پالیسی بلوچستان ءِ زمین ءَ چو گوات ءَ پتات بلوچ ءِ ھر لوگ ءَ آھانی ورنا ءُ زانتکار ءُ وانندھیں چُکاں بر ءُ جیل ءُ زندانی بکن چیزے وھد ءَ رند آھانی جوناں کوہ ءُ گیاباناں دور دئے ءُ ھر بلوچے ءِ دل ءِ توک ءَ ھمے بیم اَت کہ منی باریگ کجام اِنت ھرکس وتی باریگ ءِ ودار اَت۔ دیوالانی سر ءِ نبشتگیں لبزاں کور کن آزاد بلوچستان ءِ بیرک ءَ دِرّ ءُ دور دئے وتی زِد ءُ کینگ ءَ درشان کن ۔
ھشت سال ءَ رند مرچی پد ءَ منی چم پنجگور ءِ کلم چوک ءِ اکسے ءَ کپت اَنت کہ شھید ھیات جان ءِ اکس ھمے چار راہ ءِ سر ءَ کلم ءِ سر ءَ لگوک اَت من گل ءَ بال بوتاں کہ پنجگور پد ءَ یک رندے شھید لالا منیر ءُ آگا آبد شاہ ءِ ترانگاں گیج ایت من الم گُشاں پنجگور بے مھر نہ اِنت پنجگور دستگرگ لوٹ ایت پنجگور ھمراہ کنگ لوٹ ایت ۔ مرچی من ھمے گُشاں شھید ھیات جان ءِ رِتکگیں ھوناں رنگ آؤرتگ بلوچ ءِ دست ءِ کلم بے سیاھی نہ بیت بلوچ ءِ دست ءِ کتاب تاں ابدی بند نہ بیت۔
کلم چوک پنجگور ءِ ھما جاہ اِنت کہ 24 ادار ءَ اد ءَ پاکستان ءِ ناروائیں آرمی بلوچ ءِ ھر زھگ ءُ زالبول داشتگ ءُ جست کُتگ ناروائیں سلوک کتگ مھلوک بزگ کتگ لٹ ءُ شاپ کتگ اَنت کماشیں مردم بے ازت کتگ اَنت ورنائیں چُک گار ءُ بیگواہ کتگ اَنت مئے مات ءُ گھارانی گُشان چہ سر ءَ ایر گپتگ ءُ چست ءُ پُرسانی لڑے بندات کُتگ کجا روگ ءَ ئے ،پرچا روگ ءَ ئے ، چی ءَ روگ ءَ ئے،تئی پجاکاٹ کج اِنت ھنچیں بے سریں جست ءُ پُرس بلے مرچی شھید ھیات جان ءِ ھون ءَ رنگ آؤرتگ ھمے کلم چار راہ کہ گُشگ بیتگ ھما روچ ءَ پاکستان ءِ آرمی اتکگ ءُ اے جاہ ءَ نشتگ ءُ وتی تمبوئِے جتگ اَت من ھمے مار اِتگ اَت کہ پنجگور بے مھر کنگ بوت اے کلم ءِ سیاھی ھلاس کنگ بوت اَنت بلوچ ءِ بیرک کدی نہ لگ ایت اے کلم ءِ سر ءَ بلے مرچی شھید ھیات جان ءِ رتکگیں ھونانی برورد اِنت کہ پد ءَ بے سیاھی ئیں کلم پد ءَ چہ سیاھی ءَ سر ریچ بوت ھمے گلزمین ءِ تنگوئیں بچے ءِ اکس ھمے کلم ءِ سر ءَ لگوک اِنت۔
بلے مرچی شھید ھیات جان ءِ رتکگیں ھوناں پد ءَ اے کلم سیاھی ءَ پُرکتگ ءُ پہ بلوچ راج ءِ آیوکیں پدریچ ءِ واستا بلوچ ءِ گلامی ءِ روچ ءِ کم کنگ ءِ ھاتر ءَ دگہ انکلابے ءَ ردوم زُرتگ۔
بلوچ گلام نہ بیت بلوچ ءِ ورنایانی تہ ءَ اکل ءُ زانت اتکگ بلوچ ورنا وتی بزگی ءُ تنگی ءَ زان اَنت اے شھیدانی گُلزمین اِنت شھید لالا منیر ءِ جزباتی ئیں تکریرانی توار مھلوک ءِ گوشاں کپگ اِنت شھید آگا آبد شاہ ءِ دیوانانی سنگت ھما زمین ءَ نشتگ ءُ شھید ءِمھراں درشان کنگ اَنت اے کلم پد ءَ چہ سیاھی ءَ چکار اِنت اے رندی کلم ءِ سیاھی ھلاس نہ بنت۔
شھید ھیات جان ءِ ریتکگیں ھون اَنت الم رنگے کار اَنت
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔