درستانی ھِساب یک پہ یک ءَ گرگ بیت اِنت – بشیر زیب

دی بلوچستان پوسٹ

ما لگورانی پیم ءَ نشت ءُ چار اِت نہ کن ایں – بشیر زیب

بلوچ لبریشن آرمی ءِ سرکماش بشیر زیب بلوچ ءَ وتی چارگردی رسانکجاہ ٹوئٹر ءَ ٹویٹ کنان ءَ گوشتگ کہ ھما دردمانی ءَ مروچی بلوچ مات گوزگ ءَ اَنت آ ھچبر بے سوب نہ بنت –

آئی ءَ گوشت کہ بلوچ شھیدانی ریتکگیں ھون ھچبر زوال نہ بنت آیانی دیمونی بنت ءُ آیاں راجدپتر مدام یات کنت –

مارا جزباتی گوشت کن ئے بلے ما لگورانی پیم ءَ بے تواری ءَ نشت نہ کن ایں –

آئی ءَ گوشت کہ اے گپ ءَ ھچبر وتی دل ءُ مازگاں میار اِت کہ مروچی ھرچی مئے سرڈگار ءِ

سر ءَ بوگ ءَ اِنت، اشانی درستیں ھساب یک پہ یک ءَ گرگ بیت اِنت –

زانگ بہ بیت حیات بلوچ سیزدہ اگست ءَ تربت ءِ دمگ آپسر دگ ءَ پاکستانی پوج ءَ تیرانی آماچ کرتگ ءُ کُشتگ –

حیات بلوچ ءِ کوش ءِ ھلاپ ءَ بلوچستان ءِ جتائیں جاھاں برمش یکجھتی کمیٹی ءِ نیمگ ءَ زھرشانی درچ یکشل ءَ برجاہ اَنت ءُ مروچی تربت ءُ گوادر ءَ ھوار دگہ جاھاں ھم حیات بلوچ ءِ کوش ءِ ھلاپ ءَ زھرشانی کنگ بیتگ –

زھرشانی کنوکانی گوشگ اِنت کہ بلوچستان ءَ ھزاراں ورناہ حیات بلوچ ءِ پیم ءَ کُشگ ءُ چگل دیگ بیتگ اَنت درستانی کُشندہ یک پہ یک ءَ گرگ ءُ سزا دیگ بہ بنت –

دومی نیمگ ءَ بلوچستان ءِ سرکار ءِ گوشگ اِنت حیات بلوچ ءِ کوش ءَ ھواریں ایپ سی ءِ کارمند دزگیر کنگ ءُ پولیس ءِ دست ءَ دیگ بیتگ – بلے دمگی مردمانی گوشگ اِنت کہ حیات ءِ کوشکاری ءَ یک ایپ سی ءِ کارمندے نہ بیتگ گیشتر بیتگ اَنت کہ آیاں حیات ءِ سر ءَ تیرباری کرتگ ءُ آئی ءِ دلبند ءَ ھشت دانگ تیر جتگ –