نبشتانک: ھیات ءِ کپتگیں ھونانی بدن
نبشتہ کار: آجو کینگی بلوچ
دی بلوچستان پوسٹ
ھیات جان من وتی کلم دست ءَ کتگ ءُ اسپیتیں تاکے منی دیم ءَ اِنت تئی اکس منی موبائل ءِ اسکرین ءِ دیم ءَ ایر اِنت- بلے! من ءَ ھچ تھمبل کنگ ءَ نہ اِنت من چے نبشتہ بکناں پرچا کہ منی چمانی ارس یلہ اَنت منی دست لرزگ اَنت پہ تئی نام ءِ گوھر کیمتی ئیں لبزانی کماھگ ءَ منی لبز شرمندگ اَنت پہ تئی بالاد ءِ سر ءَ اے لبز ھچ پیم بوگ ءَ نہ اَنت چمّن ءَ دور تچگ ءَ اَنت پہ تئی کوھیں بدن ءَ۔
پرچا کہ اے منی نبشتگیں لبزاں ھچ وڑیں شیرکنی ءُ تام مان نیست۔منی دست گوں من ءَ ھمراہ داری کنگ ءَ نہ اَنت منی چمانی ارس ٹُپ ٹُپ ءَ کپگ ءَ اَنت موبائیل ءِ اسکرین ءِ سر ءَ تئی پُلیں دیم میچل اِنت چہ منی رتکگیں ارساں۔
ھیات جان من ءَ پھل کن من وتی دست ءَ زور دیگ ءَ آں کہ پہ تو چیزے نبشتہ بکناں بلے من ءَ پھل کن منی مھروانیں ھیات جان تو من ءَ بھتر زان ئے منی بے دلی ءِ ھال ءَ تو سرپد ئے تو مھروانے اِت ئے من پہ تئی مھراں تلوسگ اِتاں بلے تو ھوں بے مھر بوت ئے۔
ھیات جان تو اُوں پاکستان ءِ پوج ءِ تیرانی آماچ کنگ بوت ئے ھیات جان تئی روگ ءَ من ءَ سک دردیگ کتگ من نہ زاناں اے کجام درد اِنت تئی وڑیں بازیں ورنا جنگ ءُ شھید کنگ بوتگ اَنت بازینے ءِ مرگ ءَ من ءَ نہ تورینتگ بلے بازیں تئی ویں ورناھانی روگ ءَ من ءَ تہ ءَ پروش کتگ بلے من نزاناں اے کجام درد اِنت اے ھما درد اِنت کہ ھلاسی ءِ نام ءَ نزانت بلے من الم زاناں اے درد گوں مسکیں زمین ءَ بندوک اِنت۔
ھیات جان وھدے منی چم تئی اکساں کپ اَنت منی دل گیمرتگیں دردے کنت اے گیمرتگیں درد ءَ بازیں تئی وڑیں دوستانی درد ھوار اَنت ھیات جان من وھدے ھال کتگ وتی آ دگہ دوست ءُ سنگتاں کہ تئی وڑ ءَ کراچی ءُ کویٹہ ءُ دگہ مزنیں شھراں وانگ ءَ انت گڑا منی دل ءَ سردیں گواتے لگ اِتگ کہ بلوچ راج چہ ناسرپدی ءُ گلامی ءِ زنجیراں زوت آجو بیت گلامی ءِ زنجیرانی پروشگ ءَ اِلم ءُ زانت ءِ پکار اِنت تئی وڑیں نودربر کہ بلوچ راج ءِ تہ ءَ بوتگ اَنت گڑا الم نوکیں بانداتے ءِ امیتے ءِ رژنائی ءِ چماں دیستگ تئی وڑیں نودربر آ راج ءِ تہ ءَ بنت آ راج کدی بزگ ءُ بدھال نہ بیت ھیات جان تئی زندگ بوگ پہ پاکستان ءُ پہ پاکستان ءِ مکّاریں پوج ءَ گاری اَت پرچا کہ تو لبز زانتے بوتگ ئے ترا گوں کتاب ءُ کلم ءَ مھر بوتگ تئی وڑیں مھروان مدام تیرانی آماچ کنگ بنت یا کہ تھاریں زندان ءِ باھوٹ بنت ۔
بلوچ راج ءِ کجام ورنا ءَ گوں کتاب ءُ کلم ءَ مھر بہ بیت تئی وڑ ءَ تیرانی آماچ کنگ بیت تو یکیں نودربر نہ بیتگ ئے ھیات جان بلکیں دل ءَ بکن ئے شھید شھداد،اھسان الیاس نزر ،کمبر چاکر ،امداد بُجیر ءُ رزا جھانگیر تئی ھنکین ءِ مردم بوتگ اَنت ھمے زمین ءِ سر ءَ آھانی ھون ریتکگ اَنت ھمے زمین ءِ دلبند ءَ آھانی جون کلّ اَنت تو ھما شھیدانی کش ءَ کلّ کنگ بوتگ ئے ھیات جان دل ءَ مہ کن۔
بلے !
وھدے تئی وڑیں نودربر ءُ سنگتانی شھیدی ءِ ھال ءَ اشکناں گڑا دل ءَ دردے پیداک بیت ھیات جان من گلگ نہ کناں پرچا کہ دژمن اِنت دژمن ھرچی کنت چُکاں چہ ماتاں پُل اِیت ،براتاں چہ گُھاراں ،مرداں چہ زالاں ءُ تئی وڑیں دوست ءُ ھمبلاں چہ منی وڑیں بے مھراں۔
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔