نبشتانک: مھکمیں پگر ءِ واھند شھید ریھان جان
نبشتہ کار: سرباز وپاؔ
دی بلوچستان پوسٹ
اے زِندمان ءِ چکّاس ءِ تہ ءَ شھزانتیں مرد وت ءَ جوانیں کِردانی واھُند جوڑ کن اَنت ۔ گوں مھکمیں ارادہ ءَ مردم وتی بھت ءُ تالہ ءَ مٹّینت کنت ۔ اگاں بنی آدم وت ءَ گْوستانکانی تہ ءَ زندگ دارگ لوٹ اِیت گڑا وتی کردار ءَ بہ سمبھین ایت ۔ کردار وتی واھُند ءَ چہ مرگ ءَ پد یک رژنائیں نامے ءِ ھُدابُند کنت ۔ شریں کردانی واھند ھر دھر ءِ تہ ءَ آئی ءِ نام پہ شاتکامی گرگ بیت ۔ شَر ءُ شِر ءِ دپ ءَ آئی ءِ نام ءِ ورد کنگ بیت ۔ شریں کردنی واھند ھرکس ءَ لاچار کنت ۔ آئی ءِ نام ءَ پہ شری بہ گِپت ۔
کرد چہ بنی آدم ءِ کارپداں زانگ بیت ، کجام مردم چے کنگ لوٹ اِیت ۔؟ ھرکس وتی کردار ءَ وتی وڑ ءَ نبیس اِت کنت ۔ کرد چہ ٹکّ ءُ کُٹم ءَ ھم گستا اِنت ۔ آئی ءَ گوں اُمر ءَ کار نیست ۔ مرچیگیں روچ یازدہ اگست مارا انچیں مزن شانیں کردارے ءِ ترانگ ءَ دنت ، مئے وڑیں نابزاتیں مردم پہ آئی ءِ کردار ءِ سر ءَ تران کنگ ءَ گُنگ بیت ءُ پہ نبشتہ کنگ ءَ دست لرز اَنت مارا لبز دْروہ اَنت ۔ آ کسان اُمریں بچ گوں وتی کوھیں کردار ءَ شھید ریھان جان ءِ نام ءَ زانگ بیت ۔
آجوئی ءِ جنگ چوناھا وتی آشوبی جھدکار ءِ کردار ءَ سینگار اِیت ءُ رُژنا کنت ، بلے شھید ریھان جان بلوچ ءِ آجوئی ءِ جنگ ءَ را دگہ نوکیں رنگ ءُ دْروشمے دات ۔ شھید ریھان جان ءَ وتی کسانیں اُمر ءِ تہ ءَ وتی کردار چو کوہ ءِ پیم ءَ مزن کرت ۔ آئی ءِ کربانی ھمک مردم ءِ زھن ءِ تہ ءَ یک جیڑگے ودی کنت ۔ ھمک مردم ھمے جیڑ اِیت شھید ریھان جان ءَ چون ءُ چے پیم اے راہ گچین کُت؟ ۔ بلے ما گوستانک ءَ چار ایں بلوچ راجدپتر ءِ تہ ءَ چِد ءُ ساری شھید مجید بلوچ ءُ شھید درویش جان پہ وتن پدائی کن اَنت ۔ بلے شھید ریھان جان ءِ پدائی پہ بلوچ راج ءِ ورناھاں یک درونتے بیت ۔
بلوچ ءِ ھمک ورنا پہ شھید ریھان جان ءِ پگر ءُ لیکہ ءَ دیم ءَ برگ ءِ جُھد ءَ اَنت ۔ اے ھبر راستے کہ مھکمیں پگرانی واھُند وتی راجی کاروان ءَ مھکم کن اَنت ، ھمے مھکمیں کاروان راج ءَ وشیں بانداتے ءِ واھُند کنت ۔ بلوچ راج ءُ بلوچ ورناھانی پُر اُمیتیں ستکے گوں شھید ریھان جان ءِ مھکمیں پِگر ءَ بندوک اِنت ءُ دیم ءَ برگ ءَ اَنت اے گپ ءَ بلوچ ءِ زھگ زھگ زانت ءُ سرپد اِنت تباھی پہ دُژمن ءَ ءُ آجوئی ءُ وشھالی پہ بلوچ راج ءَ اِنت۔
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت