نبشتانک: وتن دیوانگیں ریھان
نبشتہ کار: مھروان کمبر
دی بلوچستان پوسٹ
دنیا ءِ ھمک سیادی جوزگ ءُ مارشتاں گوں بندوک بنت۔ آ ھونی سیادی بہ بنت یا کہ لیکھی سیادی۔۔۔ آ سیادی انسان ءَ وتی زات ءَ چہ در کن انت ءُ مُچی ءِ نیمگ ءَ بر انت۔۔ ھما انسان کہ وتی زات ءَ چہ درکیت یک راجے ءِ بارو ءَ جیڑ ایت گڑا آ ٹوھیں کردانی ھدا بُند بیت۔ دنیا ءِ تھ ءَ ھر انسان ءِ وتی یک جتائیں کرد ءِ بیت۔ شیوار ءُ نہ ترسیں مردم مدام وتی ٹوھیں مکسد ءِ سوبین بوھگے ھاتر ءَ جُھد کن انت۔ دگنیا ءِ تھ ءَ اے وڑیں ھزاراں سر گوستگ کہ آہاں وتی کرد ءَ چہ چاگردے ءَ یا کہ استانے ءِ تھ ءَ مزنیں بدلی ءِ آورتگ۔۔
مروچی یازدہ اگست انت۔ بلوچ راجدپترے تھ ءَ یازدہ اگست سد سال ءِ تھاری ءَ چہ پد یک نوکیں سُھبے ءِ مستاگ اِنت۔کہ بازیں ٹپ ءُ ٹور ءُ تھل ءُ تُرپشیں یاتاں لپاشان گوں نوکیں جوزگ ءُ وشیاں ماتیں سرڈگارے سر ءَ ودی بوت۔۔ بلے اے وشیانی موسم دیراں تاں نہ منت۔ یکرندے پد ءَ لنج ءُ تھاریں شپ اتک ءُ ھر چیزے تھار دیم کُت۔اے تاموریں شپ ءِ دامن ءَ روژنائی ءِ بکشگے ھاتر ءَ ھزاراں ورناہ پیر کماش زالبولاں وتی کندیلیں سر ندر کتگ انت ءُ انگت ندر کنان ءُ پیداک انت۔ ریھان جان ھمے ندر کنوکیں سراں چہ یکے اَت۔۔
گش انت کِرد ھما چیز انت کہ مُرتگیناں زندگ کنت ءُ زندگیناں مردگ۔بلوچ راجدپترے تھ ءَ شھید ریھان جان ءِ کرد چو روچ ءَ روژناہ انت، چو استال ءَ شھمگ ءَ انت۔ مروچی ریھان جان ءِ ولشبو بلوچستان ءِ ھمک کُنڈ ءُ کِشوراں شنگ ءُ تالان اِنت۔ آئی ءِ رتکگیں ھوناں بلوچ راجی زرمبشت ءِ تھ ءَ یک نوکیں رنگ ءُ دروشم ءِ آورتگ۔
ریھان بلوچ شھید جنرل اسلم بلوچ ءِ پُسگ ءُ بی ایل اے شھید مجید بریگیڈ ءِ سنگتے اَت کہ مروچیں روچ ءَ بزاں یازدہ اگست دوھزار ھژدہ ءَ بیرک ءَ سر ءَ بند ایت ءُ لُمہ یاسمین آئی ءَ دست ءَ بڈ ءَ جنت ءُ پہ وتن نمیران بوگے ھاتر ءَ روان دَنت۔۔ لُمہ یاسمین ءَ زانتگ اَت کہ ریھان جان تھنا منی زھگ نہ انت بلکیں آ مکھیں ڈیھ ءِ ھم پُسگ انت۔
بلوچ راج یازدہ اگست ءَ بلوچستان ءِ آجوئی ءِ روچ ءِ درگت ءَ یات کنت ءُ یازدہ اگست شھید ریھان جان ءَ ھوار ایندگہ شھیدانی رتکگیں ھون ءُ کربانی پدا ھمے روچ ءِ آیگے مستاگ ءَ ھم دنت۔
ریھان جان ءِ پہ وتن کربان بوگ ءِ فلسفہ کوزہ گیریں ریاست ءِ مرگ ءِ کُلوہ اِنت۔ ریھان یک انچیں سوچ ءُ پکرے ءِ نام انت کہ آئی ءَ دژمن زھنی نادراہ جوڑ کتگ۔
ریھان جان بلوچ راجدپتر ءِ سیمی پدائی کنوکیں سنگتے اَت کہ وتی سینگ ءَ شورواں بند ایت ءُ لُٹ ءُ پل کنوکیں ملک چائنا ءِ انجینئرانی سر ءَ اُرش کنت۔پد ءَ ھمے کاروان ءَ شھید ازل مری، شیھد رازک جان، شھید وسیم جان، شھید ھمل پتھ، شھید اسد مھراب، شھید کچکول جان، شھید منسب جان شھید سلمان ھمل، شھید تسلیم، شھید شھزاد ءُ شھید سراج کُنگر دیم ءَ برانت۔
وتن دیوانگیں ریھان جان ءِ وڑیں سرانی ندر کنگ اِنت کہ مروچی بلوچ وتی پادانی سر ءَ اُوشتگ ءِ ھاٹیگ ءُ زکت ءَ دار ایت اگاں نہ دگہ اے سرمایہ داریں دور ءُ نوبت ءَ بلوچ ءِ نکش دیری گار بوتگ اِت انت۔۔
مروچی ما پھر بندیں ریھان جان ءِ وڑیں وتن دیوانگیں سرانی سر ءَ کہ وتی ھیشی سراں چہ سر گوزانت ءُ یک راجے ءِ دود ءُ ربیدگ، آئی ءِ وتن ءُ وتن ءِ مڈّی ءُ زر ءِ پھازگ ءَ وت ءَ را کُربان کن انت۔۔ ھون ءِ کہ پہ ھک ءَ ریچ ایت ھاک ءِ تھ ءَ بیگواہ نہ بیت۔۔
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت