نبشتانک: سوشل میڈیا ءُ بلوچ زانتکار
نبشتہ کار: بالاچ قادر
دی بلوچستان پوسٹ
ھستیں وھد ءَ سوشل رسانکدر ھالکاری ءَ ابید انسانی مارشتاں درانگاز کنگ ءِ جوانیں جاھے کہ اد ءَ بنی آدم وتی پگر ءِ درانگازی ءَ پہ وت واک اِنت۔سوشل میڈیا ءِ آیگ ءَ دنیا ءِ دراھیں راجاں وتی وتی راجی کاز، لبزانک،سیاست، سائنس ءُ راجدپتر ءَ را دیم ءَ برگ ءِ جوانیں موھے رس اِت کہ چریشی ءَ ھر یک راجے وتی ربیدگ ءُ دودمان ءَ ابید وتی مارشتاں دنیا ءَ سر کنگ ءَ اِنت۔
دنیا ءِ ایندگہ ملکاں اگاں ما بچار اِیں، اود ءَ اگاں کسے لبزانک ءِ پڑ ءَ گوں سیادی دار اِیت گڑا گوں سنجیدگی ءَ سوشل میڈیا ءَ کارمرز کنان ءَ وتی چینل ءِ وسیلگ ءَ آ وتی لبزانکی ساچستاں پہ وانوکاں سرکنت۔ ھمے ھساب ءَ ھالکار، موٹی ویشنل اسپیکر، ڈاکٹر، تعلیمی زانتکار ءُ ایندگہ پڑاں گوں سیادی داروکیں مردم وتی وتی پڑ ءِ ھساب ءَ سوشل میڈیا ءَ کارمرز کن اَنت کہ چرشی ءَ نوکیں دور ءِ لوٹانی رد ءَ مردماں وانگی آسراتی سر بنت۔
بلے بیا کہ بلوچ چاگرد ءَ سوشل میڈیا ءَ چون کارمرز کن اَنت۔ اولی گپ وَ ایش کہ مئے چاگرد ایندگہ راجانی ھساب ءَ مزنیں آسراتیاں چہ انگت پشت کپتگ بلے اگاں کسے اے آسراتی ءَ گون کپتگ گڑا ایشی ءِ کارمرز کنگ ءَ نہ زانت۔
بلوچانی تہ ءَ وَ انگت اے وڑیں ربیتے نیست کہ ھرچ پڑ ءَ گوں سیادی داروکیں زانتکاریں مردم سوشل میڈیا ءِ وسیلگ ءَ وتی ھیالاں دیم ءَ بیار اَنت، بلے مرچی باندا لھتیں انچیں مردم ھست کہ سوشل میڈیا ءَ کارمرز کنگ ءِ رم ءَ ھوار کپتگ اَنت،کسے ادب ءِ سر ءَ، کسے چاگردی سرھالانی سر ءَ، کسے ڈاکٹری ءِ پڑ ءَ، کسے راجکاری ءِ پڑ ءَ وتی وتی کلوھاں سوشل میڈیا ءَ وسیلگ ءَ شنگ کنگ ءَ اِنت۔
بلے بژن ءِ گپ ایش اِنت کہ ھمے مردم ھوں برے برے چہ سیمسراں در کپ اَنت۔من اجب ھیران باں وھدے یک زانتکار ءُ سوھوئیں مردمے ءِ ھبراں گنداں۔ مئے کر ءَ روایت ایش اِنت کہ یک مردمے شر اِنت،گڑا ھراب بوگ ءَ ھوں دمانے نہ زور اِیت۔ یکے ءَ چاگردی سرھالے ءِ سر ءَ گپ ءُ باوستے بنگیج کت،من ءَ اگاں آئی ءِ ھیالاں گوں ھمتپاکی نیست گڑا من گوں دلیل ءُ باوستاں آئی ءِ منّانک ءَ بہ پروشاں لیکہ ءَ رد بہ کناں،منی گپانی تہ ءَ ھوں اینچو جان مان بہ بیت کہ چریشاں وانوک ھمے بہ پھم اِیت ، منی لیکہ چہ دومیگ ئیگ ءَ گیشتر وزن دار اِنت بلے بدبھتی ءَ مئے کر ءَ اے وڑ نہ اِنت۔ من ءَ پلانی ءِ باوست ءُ گپ دوست نہ بوت اَنت گڑا من سوشل میڈیا ءَ کایاں ءُ ملک ءَ پہ دو ملک کناں کہ واجہ پلانی ءِ گپ سر ءَ سر رد اَنت، بلے اے وڑ نہ گشاں کہ چوں رد اَنت، چتور رد اَنت۔ پد ءَ ھما دومی مردم ھوں وتی زھم ءَ برزاد کنت پلانی ءِ سر برگی اِنت آئی ءَ منی لیکہ رد کتگ۔۔ مئے کر ءَ سبر ءُ برداشت ءَ ابید سنجیدگی ءِ ھوں سک باز کمی گندگ کیت۔ گوستگیں روچاں سوشل میڈیا ءَ دو مردم یک لیکھے ءِ سر ءَ گپ ءَ اِت اَنت، تاں گپ گپ ءَ ھبر چہ باوست ءُ لیکہ ءَ در اتک ءُ زاتیات ءَ سر بوت۔ یکے ءَ گشت تو مردمی جندے نہ ئے، دومی ءَ گشت تو مردمی جندے نہ ئے۔
اے وَیل بلوچانی کر ءَ ھمک روچ گندگ بنت، مئے چاگرد ءِ ناسرپدیں مردم اے وڑیں کارے بہ کن اَنت، انگت دردے پہ دو، بلے ھمے کہ سرپد ءُ زانوگر اَنت اشانی اے وڑیں سبکی پہ یک پدمنتگیں چاگردے ءَ باز تاوان اِنت۔ ما بن ءَ چہ پشت کپتگ ءُ لگتمالیں راجے ءِ پسگ اِیں، دنیا ءِ نوکیں ٹیکنالوجی ءُ سسٹماں بایدگ اِنت پہ وتی یکجاھی، دیمروی ءُ وشھالی ءَ کارمرز بہ کن اِیں ناں کہ پہ زاتی ھسد، وت ماں وتی زد ءُ کنّت ءَ وھد ءَ زوال بہ کن اِیں۔
(اے نبشتانک ءِ سر ءَ اگاں سنگتے تران ءُ باوستے کنگ لوٹ اِیت آئی ءَ را وش اھت گشاں)
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت