شال ءَ بیگواھیں مردمانی درگیجگ ءِ ھاتر ءَ شُد کشیں ھرتال برجاہ

دی بلوچستان پوسٹ

وائس فار بلوچ مسنگ پرسنز ءِ نیمگ ءَ بلوچستان ءِ مزن شھر شال پریس کلب دیم ءَ برجاہ داشتگیں شُدکشیں ھرتال ءَ مروچی 4031 روچ سرجم بوتگ ـ پی ٹی ایم ءِ آغا زبیر شاہ ءَ گوں وتی ھمراھاں ھوار بنجل ءِ تر ءُ تاب اِش کُتگ بیگواھیں مردمانی کھولاں گون ءَ دلپدردی درشان اِتگ اِت –

ھمے درگت ءَ وائس فار بلوچ مسنگ پرسنز ءِ رھشون ماما قدیر بلوچ ءَ وتی ھیال درشان اِتگ ءُ گُشتگ کہ بلوچستان ھر دور ءَ زلم ءُ زوراکیانی دیمپان بوتگ ھاسکر مارشلا ءُ لشکری وھدی زیردستیں بلوچ راج بگیری ءَ ریاستی ادارھانی ناشرکاری تھا پیش ءَ چہ گیشتر تیزی آرگ بوتگ –

آئی ءَ گشتگ کہ بلوچ راج ءَ زیر کنگ ءُ آئی ءَ وتی مھکومی ءِ بگیری ءَ توار چست کنگ ءَ چہ دستبردار کنگ ءِ واستا آمریت ءِ درسیں زور کارمرز کنگ بوھگ ءَ اَنت – بے بُنیں ریاست ءِ مکاری ءُ نوک آورتگیں پالیسیاں پہ تاگت ءِ زور ءَ مُشگ ءِ رویش راج ءِ ایردستی ءَ گیشی ءُ ریاست ناشرکاری سوب جوڑ بوھگ ءَ اَنت-

آئی ءَ گشتگ کہ بلوچستان ءِ مزلومیں راج ءِ سر ءَ تاگت ءِ زور ھاکمانی سوچ ءَ نوکیں زوراکی بلوچ راج ءِ سر ءَ آشکار کرتگ اَنت – راجی ھکانی پرایمنیں جد ءُ جھد ءَ بدنام کنگ اِنت – راجی منگ نامہ رد کنگ ءُ ریاستی سلاہ بندیں لشکر ایپ سی ءَ وتی راج دژمن کاروائیاں جواز بکشگے ھاتر ءَ بے بنیں پندل سازی ءُ ناراستیں ڈرامھانی چیر ءَ ساہ زورک کپگ ءَ اَنت –

ماما قدیر بلوچ ءَ گشتگ کہ بلوچستان ءَ ریاستی ناشرکاری کاروائیاں ءُ ریاستی تاگت ءِ کارمرز کنگ ءَ گیشی آیگ ءَ اَنت- سرجمیں دمگاں چیریں لشکر کشی بندات کرتگ بلوچ راج ءَ بیھار دیگ ءُ ترس ءِ تھا کنگ انت- اے وڑیں ھالاتاں بلوچستان ءِ سرجمیں سیاسی باسک ءُ ایردستیں راج ءِ المی جھد جھد درکاری اِنت –

گڈسر ءَ ماما قدیر بلوچ ءَ گوشتگ کہ بیگواھیں مردمانی کھول پُرایمنیں جد ءُ جھد ءَ پُرکار کنگ ءُ دیم برگ ءِ زمہ واری نوں بلوچ راج کوپگاں لڈگ بوتگ – راجدپتری جھد ءِ دارگ ما وتی راجی زمہ واری آسر کنگی اَنت –