بلوچستان ءَ جتائیں وھیلاں چُکے ءَ ھوار دو مردم بیران ءُ سے زدگ

دی بلوچستان پوسٹ

سر بیتگیں ھالانی رد ءَ دالبندین ءَ جتائیں وھیلاں یک چُکے بیران بیتگ ءُ سَے مردم زدگ بیتگ اَنت –

گیشیں ھالانی رد ءَ چھتر ءِ ھند ءَ ھورانی گورگ ءَ کورانی آپ ءَ دو چک کپتگ چریشی ءَ چہ ھردوکانی تہ ءَ یکے ءَ ساہ داتگ اَنت کہ آئی ءِ اُمر ھشت سال گوشگ بیتگ –

ھمے وڑ ءَ دالبندین ءِ جھمنندیں چاردہ سالی ئیں سدیس نامے ورنایے ءَ زھر وارتگ ءُ وتکشی کنگ ءِ جھد کرتگ ءُ نیم زندیں جاوراں ڈی ایچ کیو نادراہ جاہ ءَ برگ بیتگ –

ھمے وڑ ءَ سیمسری دمگ تپتان ءَ دیوالے ءِ کپگ ءَ یک زالبولے چیر تر اِتگ ءُ زدگ بیتگ ءُ زدگیں جاوراں ھسپتال ءَ سر کنگ بیتگ –

زانگ بہ بیت سرجمیں بلوچستان ءَ گوستگیں روچ ءَ چہ ھوراں گوارگ بندات کرتگ بازیں جاھاں دگانی پرشت ءُ پروشیانی ھال ھم اتکگ اَنت –

بلوچستان ءِ دگہ یک وھیلے ءَ پشین ءَ آروسی دیوان ءَ تیرگواری ءَ چہ سالونک ءِ پِت ءَ تیر لگ اِتگ ءُ چریشی ءَ چہ بیران بیتگ –

بیران بیتگیں مرد ءِ پجار موسیٰ جان ءِ نام ءَ زانگ بیتگ ءُ پولیس ءِ ایس ایچ او روزی ھان لمڑ سر بیتگ ءُ لاش اش چِست کرتگ ءُ ھسپتال ءَ برتگ ءُ اود ءَ اژدری چار ءُ ٹپاس ءَ پد لاش کھول ءِ گور ءَ سر کرتگ –