روکپتی بلوچستان ءَ سَے دزگیر

دی بلوچستان پوسٹ

سر بیتگیں ھالانی رد ءَ روکپتی بلوچستان ءِ دمگ نیکشھر ءَ ایرانی چیریں ادارھاں دو کس دزگیر کرتگ ءُ برتگ اَنت-

دمگی مردمانی رد ءَ گوستگیں روچ ءَ نیکشھر ءِ دمگ دسک ءَ ایرانی چیریں ادارھانی کارندھاں افضل ء عبدالرحیم ءُ رحمت ء داد شاہ دزگیر کرتگ ءُ داں دو ساھت ءَ داشتگ ءُ پد ءَ یلہ کرتگ اَنت –

دمگی مردمانی رد ءَ افضل ءُ رھمت لوگ بندیں مستری اَنت کہ وتی لاپ ءِ والینگ ءَ روزگار کنگ ءَ اَنت –

آیاں گوشت کہ ایرانی چیریں ادارھاں گپتگیں مردماں ھمے بھتام ءَ گپتگ اَنت کہ اے مردمانی سیاسی مردمے کہ شما ایران ءِ ھلاپ ءَ کار کنگ ءَ بیتگ اَنت –

آیاں گوشت کہ اے دوئیں کس دیم پہ شیراز ءَ روگ ءَ بیتگ اَنت کہ راہ ءِ نیم ءَ چیریں ادارھاں دزگیر کرتگ اَنت –

آیاں گوشت کہ رھمت دانشگاہ ءَ ھم وانگ ءَ اِنت کہ وتی لوگ ءِ نیزگاری ءَ چہ کار ھم کنگ ءَ اِنت –

دمگی مردمانی رد ءَ بازیں روچاں چہ نیکشھر ءِ نیمگ ءَ ایرانی چیریں ادارہ “عطلات ” جست ءُ پرس ھم کنگ ءَ اَنت جتائیں تکاں بندوکیں مردماں پَٹ ءُ پول کنگ ءَ اَنت –

دومی نیمگ ءَ بلوچ فعالین کمپئن ءِ نیمگ ءَ شنگ بیتگیں ھالانی تہ ءَ گوستگیں دو روچ ءَ پیسر چھبار ءَ اکبال شریپی دزگیر کنگ ءُ بیگواہ کنگ بیتگ –

فعالین کمپئن ءِ رد ءَ کہ اقبال یک نودربرے ءُ آ چھبار ءَ وانگ ءَ اِنت بلے آئی ءِ دزگیری ءَ دو روچ گوستگ کہ آئی ءِ ھچ ھال نیست –

ھمے وڑ ءَ زاھدان ءِ شھر دزاپ ءَ یک ایرانی لشکر سپاہ ءَ یک مردمے دزگیر کرتگ ءُ برتگ –

گیشیں ھالانی رد ءَ زاھدان ءِ دمگ دزاپ ءَ سپاہ ءَ یک مردمے دزگیر کرتگ ءُ ناشناسیں زنداناں برتگ –

ایرانی لشکر سپاہ ءَ ٹاہ داتگ ءُ گوشتگ کہ دزگیر کرتگیں مردم بمب تراکے ءِ بھتام ءَ دزگیر کرتگ بلے تنی وھدی سپاہ ءَ گپتگیں مردم ءِ پجار نہ کرتگ –

سپاہ ءِ گوشگ اِنت کہ دزگیر کرتگیں مردم ءِ سیادی جیش العدل ءَ اِنت –

زانگ بہ بیت پنچ اگست ءِ شپ ءَ زاھدان ءِ شھر زیبا شھر ءَ بمب تراکے کنگ بیتگ اَت-

بیتگیں بمب تراک ءِ زمہ واری جیش العدل ءَ من اِتگ اَت –

ایرانی لشکر سپاہ ءِ رد ءَ ھما شپ ءَ بمب تراک کہ بیتگ ھما شپ ءَ ھم پنچ شکی ءِ مردم دزگیر کرتگ ءُ برتگ –

روکپتی بلوچستان ءِ انسانی ھکانی گل ءِ گوشگ اِنت کہ سپاہ بے میاریں مردماں دزگیر کنگ ءُ برگ ءَ اِنت کہ اے انسانی ھکانی لگتمالی اَنت –

آئی ءَ لوٹ کرتگ ءُ گوشتگ کہ سپاہ شکی ءِ سر ءَ مردماں دزگیر مہ کنت بلکیں آیانی باور ءَ راستیں پَٹ ءُ پول بہ کنت ءُ رند ءَ وتی کاروائیاں بہ کنت چش انسانی ھکانی پادمالی اِنت –