نبشتانک: بلیدہ ءُ نشہ
نبشتہ کار: جورکان بلوچ
دی بلوچستان پوسٹ
ھمک انسان آسودگیں زند ءُ وشھالیں لوگ ءِ واھگدار بیت کہ انسان ھرجاگہ بہ روت ھرچی بہ کنت وھدیکہ لوگ ءَ کیت پہ آرام ءُ آسودگی ءِ واستا ، انسان ءِ وشتریں جاہ آئی ءِ لوگ اِنت کہ مات پِت ، برات گُھار ، چُک جَن درس دیم ءَ ئے بنت ، بلے لھتیں انچیں گِس ھست کہ آ گِسانی تہ ءَ نا مات آسودگ اِنت نا پِت آرام دلیں نا گُھار شات اِنت ءُ نا برات ءَ سکون رس اِت ءُ نا جَن ءُ چُک آرامیں زندے گوازینگ ءَ اَنت چی ءَ ؟
ھمے اِلت کہ گِس ءِ تہ ءَ یکے ءِ سر ءَ کپت ءَ بزان نشہ !
انسان نشہ ءَ ھما وھد ءَ کنت کہ کسانیں وشی ءِ چہ ایشی ءَ سرور بکشائیت بلے گِس ءِ آ دگہ مردم کجام ھالت ءَ گوز اَنت اے چیز ءَ ھما کَس سرپد بیت کہ آئی ءِ لوگ ءَ نشہ آماچیں مردمے بیت ، ھچ مات پت یا برات گُھار نہ لوٹ اِیت کہ مئے برات زوال ءِ نیمگ ءَ بُہ روت بلے نا دسرس اَنت ، چی ءَ نا دسرس اَنت ؟
پرچاکہ نشہ مئے گردن ءَ پہ زور لوپ کنگ بیتگ ، ما نشہ آماچی ءِ نیمگ ءَ بَرگ بیتگ اِنت ، داں ما دگہ ھچ جیڑ اِت مہ کن اِیں ،وھدے انسان جیڑ اِیت پگر کنت آ وتی ھمک مشکل ءِ آسان کنگ ءِ نیمگا روت ءُ جھد کنت ، جھد ءِ آسر ” عمل ” اِنت ” عمل ” کہ کن ئے اَلم سوب مند بئے ھمے ھاتر ءَ مارا ” عمل ” وتی جاہ ءَ جیڑگ ءِ مگز ءِ جند بُرگ بوتگ ، کے ءَ بُر اِتگ ؟ دُرس زان اَنت !
ھمے واستا بلیدہ ءِ ورنایاں پہ وتی آوکیں پدریچ ءِ واستا اے اَنیگیں زوالیں چاگرد ءِ ھاتر ءَ ھمے مار اِتگ کہ مئے باندات تھاریں
اگاں پہ وت ءَ پَد مہ جن اِیں گُڑا ورنا ءُ پیر شُتگاں بلے نوں مئے زالبولانی سر ءَ کپگ ءَ اِنت ۔
جوانیں جُھدے ، وتی راج ءِ رَکینگ ، بلاھیں کارے وتی باندات ءِ واستا جیڑگ ، بلے کسّہ پد ءَ ھما اِنت ۔ کہ اے چو ٹماٹر ءَ ھمک دَمک ءِ دَپ ءَ دست کپ اِیت بلے سرکار ءُ آئی ءِ ادارھاں شست سال اِنت کہ ھچ سُدے نیست اِش پرچا ؟
پنجاب ، سندھ ءُ بلوچستان ءِ لھتیں دَمگ چو کہ بیلہ ، اُوتھل ءُ دگہ لھتیں جاگہ تو روئے ترا مزنیں نشہ ءِ جند نرس اِیت پرچا ؟
بس بلوچستان ءِ ھما ھند ءُ دمگ کہ جنگ زدگ اَنت متلب گون ریاست ءَ جنگ ءَ اَنت اود ءَ ورگی ھچ چیز نہ رس اِیت بلے نشہ ” سرعام ” اِنت پرچا ؟
منی ھیال ءَ سرپدیں مردم اِت ءُ زان اِت شما ۔
نوں کایاں بلیدہ ءِ ھمے جُنز کہ چِست بوتگ ، بلیدہ ءَ نشہ بند کنگ بہ بیت ۔ بلکل بند کنگ بہ بیت بلے بیا کہ اے جُنز ءِ تہ ءَ نوں پد ءَ یک نوکیں رنگے ءَ لَس مھلوک ھوار کنگ بوتگ کہ سرزاھر ءَ نشہ بندی ءِ جار ءَ جَن اَنت بلے چیر ءُ اندر ءَ بھ نہ لوٹ اَنت کہ بند بہ بیت پرچاکہ ھمے مردم وت مستریں ڈیلر اَنت گڑا ھمے زانگ بیت کہ اے مردم وت راہ دیگ بوتگ اَنت ، اے جُنز وھدی ” صورت ” ءَ وَ روت بلے آسر پد ءَ ھما واجھانی دست ءَ بیت کہ بندات ءَ بوتگ ۔
تربت ءِ تہ ءَ مستریں نشہ ءِ باپاری نامیں مردم کہ ھرکس اِش جاہ کار اِیت ھوتمان پُرکی ، جعفر پُرکی اَنت ، کہ ایشی مال بزان نشہ چہ پنجگور ءَ بائی روڑ پروم ،بلیدہ ءُ زامران گوز اَنت ءُ کیچ ءَ سر بنت ،
ھوتمان ءِ دست ء راستاں چہ یکے لطیف کاشاپی اِنت کہ وتی دَمگ ءِ مستریں نشہ باپار اِنت ، لطیف کاشاپی ءِ دست راست برکت شکتی کہ بلیدہ جاہ مہ نند اِنت ھرکس برکت شکتی ءِ باروا سرپد اِنت کہ بلیدہ ءِ مستریں سپلائر اِنت پد ءَ ھمے برکت شکتی ھمے بلیدہ ءَ نشہ بندی ءِ جُنز ءَ ھوار اِنت کہ بند بہ بیت ۔
پد ءَ سلّو بلیدہ ءِ نندوک ئے برکت عُرف برکو کہ ریاست ءِ ھاسیں دلّار ئے ، اے مرد ءَ دو بے گناھیں کماش جت ءُ دور دات روچ مرچی سرکاری توپنگے بَڈا اِنت ءُ مستریں نشہ سپلائر ئے اے ھم ھواریں کہ نشہ باپاری بند بہ بیت نوں گپ کیت ھمد ءَ کہ نشہ ءِ باپاری وت گشگایاں نشہ باپاری بند بہ بیت گڑا زاھر اِنت کہ گیمے بوگ ءَ اِنت ۔
چے گیم ؟
اے مردم بلیدہ ءِ تہ ءَ ظھور بلیدئی ءَ کمزور کنگ ءِ جُھد ءَ کنگ ءَ اَنت دگہ ھچ ، اے مھلوک ءِ رُجھان ءَ وتی نیمگ ءَ آرگ ءَ اَنت چاھے فتح بلیدئی بہ بیت یا اسلم بلیدئی ۔
پرچاکہ فتح بلیدئی نزیکتریں مردم ءُ آئی ءِ سنگت کہ مدام ھمراہ اَنت اَسد پنجگوری کہ ھمک کس زانت کہ شراب ءُ تریاک ءِ مستریں باپاریانی تہ ءَ ھوار اِنت ۔
اسلم بلیدئی کُلوہ راہ دنت وتی مردمانی سر ءَ کہ من ائید ءَ پیداکاں شما ساری ءَ روانک در مہ کن اِت من کہ کایاں گڑا روانک کش اِیں چہ اے گپ ءَ زاھر بیت کہ واجھاں مھلوک ءِ ھچ گَم نہ اِنت بس وتی سیاسی گرزّ ءَ اے کار ءَ کنگ ءَ اَنت ، بکول یک نبشتہ کارے ئیگ ءَ ۔ ( کرونا لاک ڈون ءِ واستا یک ایس ایچ او ءِ سرجمیں شھرے مھلوک ءَ ڈن ءَ گردگ ءَ نیل اِیت بلے اِنچو فورس چار اڈہ بند کُت نہ کن اَنت ) بیتگیں گپ ءِ نہ اِنت بلے وت لوٹ اَنت کہ مھلوک چہ نشہ ءَ در مئیت ۔
ھرچی کناں ھمے نوجوان وت بہ کن اَنت چہ ایشاں اوست ءُ اومیت دارگ مستریں ” بیوقوفی ” اِنت
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔