آواران ءُ تمپ ءَ سَے مردم بیگواہ

دی بلوچستان پوسٹ

بلوچستان ءَ بیگواھیانی درچ روچ پہ روچ گیش بیان اَنت پاکستانی پوج ھمک روچیگیں آپریشناں لس مردمانی بیگواھیانی ھال پیداک اَنت –

سربیتگیں ھالانی رد ءَ بلوچستان ءِ دمگ آواران ءَ پاکستانی پوج ءَ گوستگیں روچ ءَ بیگواھیں چاکر ءِ پِت سلام بلوچ ھم آوار جتگ ءُ بیگواہ کرتگ –

دمگی مردمانی رد ءَ پاکستانی پوج ءَ گوستگیں روچ ءَ سلام بلوچ آواران ءِ بازار ءَ پوجی بنجل ءَ لوٹائینتگ ءُ پد ءَ بیگواہ کرتگ –

زانگ بہ بیت آئی ءِ چُک پاکستانی پوج ءَ ھب چوکی ءَ دزگیر کرتگ ءُ پد ءَ بیگواہ کرتگ مردمانی گوشگ اِنت کہ چاکر سر ءَ بروبر نہ بیتگ کہ ھب ءَ پہ جاندراھی ءَ برگ بیتگ کہ اود ءَ پاکستانی پوج ءَ آوار جتگ ءُ برتگ-

ھمے وڑ ءَ تمپ ءَ پاکستانی پوج ءَ گوستگیں روچ ءَ بیڑ برتگ ءُ دو مردم آوار جتگ ءُ برتگ –

دمگی مردماں ٹی بی پی ءَ گوں گپ کنان ءَ گوشتگ کہ گوستگیں روچ ءِ بامسار ءِ ساھت پنچ ءَ پاکستانی پوج ءَ تمپ ءِ دمگ ملک آباد ءَ بیڑ برتگ ءُ اود ءَ صدام ء مھم جان ءُ اسماعیل ء نظر آوار جتگ ءُ برتگ اَنت –

دمگی مردماں گوشت کہ اسماعیل پوج ءَ ساھتے ءَ پد یلہ کرتگ ءُ بلے صدام انگت ءَ بیگواہ اِنت –