آزمانک: مئے وانگ جَاه کڈُّکے اَت
آزمانکار: سیپ بلوچ
دی بلوچستان پوسٹ
من ءَ یات اِنت اَنگت وتی وانگ ءِ دَور ءُ باریگ کِہ مئے وانگ جَاه کُڈّکے اَت مئے میتگ ءِ دراهیں بَچک جَنک ما همود ءَ وانگ ءَ اَت ایں
همے کُڈّک ءَ دَریگ هم پر نیستگ اَت ما نودبر هنچو باز اَت اِیں برے برے جاگہ هم مارا نندگ ءَ نیستگ اَت۔ یکّوئی بَچکاں کَند اِت مَسکراهی کُت کہ کُڈّک ءَ پُشت ءَ یکے بُن بِدات ما دْرست چو پتکگیں گوشت ءَ بہ اِیں
ماشٹر ءَ کند اِت مُدام گُشت ماشاء الله شُمئے وهد ءِ بچکندگاں گِنداں همے گُمان بیت کہ زندمان ءِ پورهیں لوٹ مارا رس اِتگ اَنت بَلے چے کن ئے سرکار مارا شّریں وانگ جاهے هم نہ دنت اے کڈّک ءَ من ءَ زمانگے بیت کِہ من شمارا وانینگ ءَ آں
ماشٹر ءَ گپے جت من ءَ انگت یاد اِنت –
ماشٹر ءَ گُشت ، چُکّاں شما دْرست منی پرزند اِت منی دست ءَ دِگہ هچ بوت نہ کنت بلے هَرچیز کہ منی زانت اِنت مَن شمارا بے بهر نہ کناں داں دُگنیا ءِ دیم ءَ کُجام وهد ءَ اِن شاء الله کہ شما دیمروئی کَن اِت ،
سَنگتاں کند اِت ما چہ اے کُڈّک ءَ هاک دْربر اِیں برے کتاب نیست برے کاپی ءُ نَد هاهاها ماشٹر ءَ کند اِت ءُ گُشت اے مئے لاچاری اِنت کیت وهدے اے دْرستیں چیز بنت داں شما وتی جهد ءَ برجم بدار اِت –
ما وانگ جَاه ءِ بَچک سک باز اَت اِیں
ءُ مئے مِیتگ ءَ ما پوْرهیں بچک مدام یکجاه ءُ یکمشت اَت اِیں
سُهبانی سر ءَ وانگ جاه ءَ وانگ ءَ شُت اِیں بِیگهاں لیب ءُ گْوازی کُرت داں مَگرب بوت شتاں نماز ونت مَدرسہ مَولوی ءَ مارا کُران پاک ءُ سِیپاره وان اِینت دَاں اِشا بوت نماز ونت ءُ اتکاں لوگ ءَ چُنڈکے نَان وارت پد ءَ دْرست پیرُک رهمت ءِ ءُ بُلک مِیری ءِ نیاد ءَ شُت اَنت کہ وْشّیں کِسّہ کار اِیت پیُرک رهمت –
انچو وش اَت ما نزانت اے شپ ءُ روچ چوں گوزگ ءَ اَنت نہ کہ کسے دُرملک ءُ درانڈیھ اَت نہ کہ کَسے دگہ دوریں جاهے ءَ شُتگ اَت همے وانگ جاه ءِ موکل بوت یکشمبه ءِ ما دْرستیں بچکاں اُشتر زرت اَنت دیم پہ کوه ءَ شت اِیں پیشّ ءُ کونر ءُ کُنر ءُ کوش آؤرت داں شپ ءَ مئے پیریں نِشت برے پات ءُ برے تگرد اش گْوپت زند وشهالی ءَ گوں گْوزگ ءَ اَت چنچو وش اَت مئے مِیتگ ما چو ورنا اَت اِیں۔
مئے میتگ ءِ سَنگتاں برے برے لَیب ءَ اگاں کَسّے ءَ چِیلنج داتگ ما دْرست یَکجاه شُتگ اِیں لیَب الّم بُرتگ سَرجم کتگ کْوکار کناں کُتگ واتر اتکگیں دیم پہ مِیتگ ءَ هَنچو وشهالی ءَ زند گْوں وشیاں جُنزان اَت،
باریں کئی نزر لگ اِت اَتک زَمین چَنڈے میتگ ءَ دْرستیں لوگ ءُ بان مَیست ءُ مَدرسہ دْرست ویران بوت اَنت-
ءُ زمین چنڈ ءَ رند داں سالے دوسال سرجم بوت،ماشٹر ءَ گپے کہ مارا گُشتگ اَت کہ کیت یکروچے شُمئے دْرستیں لوٹ پوره بنت داں سَرکار ءَ وانگ جاهے جوڑ کُرت ماهے نہ گْوست دِگہ وڑیں پوشاکی بوٹ والاهاں پُر بوت ،
ما سَنگت کس نزانت کُج ءَ کُج ءَ درپہ در بوتیں چیزے ماں درملک ءُ درانڈیھاں شُت چیزے گار بیگواه بوت اَنت انگت هال اِش نیست-
مرچی هشتمی سال ءَ رند منی سر میتگ ءَ کپت نا کِہ ورنایانی مُچّی ءُ نِند ءُ نیادے دیست نا کہ بلُّک میری ءُ رهمت دیست اَنت هما مئے کُڈّکیں وانگجاہ ءِ کِرّ ءَ یک دراجِیں کَبرستانے اَت ءُ کڈّک ءِ دار مِک اِت اَنت بس ابیتکی یے گندگ ءَ اتک ءُ چمّانی اَرس در اتک اَنت –
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔