بلیدہ ءُ ھوشاپ ءَ چار مردم بیگواہ

بلیدہ ءُ ھوشاپ ءَ چار مردم بیگواہ

دی بلوچستان پوسٹ

سر بیتگیں ھالانی رد ءَ کیچ ءِ دمگ بلیدہ ءَ پاکستانی پوج ءَ بیڑ برتگ ءُ آپریشن کنان ءَ سَے مردم آوار جتگ ءُ برتگ اَنت –

دمگی مردمانی رد ءَ گوستگیں شپ ءَ پاکستانی پوج ءَ بلیدہ بزپیش ءَ ماسٹر ناسر ءِ لوگ ءَ بیڑ برتگ ءُ آپریشن کرتگ کہ اود ءَ دو برات جاسر ءُ باسد ء شریپ ءُ عالم ء اُمیت آوار جتگ ءُ برتگ اَنت –

آیاں گوشت کہ پوج ءَ لوگ ءَ جاڑیگیں پرپٹ ءُ دگہ سامان گوں وت برتگ اَنت –

ھمے وڑ ءَ ھوشاپ ءِ دمگ ڈمب ءَ گوستگیں روچ ءَ پاکستانی پوج ءَ بیڑ برتگ ءُ اود ءَ یک مردمے آوار جتگ ءُ برتگ –

گیشیں ھالانی رد ءَ پاکستانی پوج ءَ ھیات ء عبدالحکیم ءِ لوگ انگیر ءَ کرتگ ءُ ھیات آوار جتگ ءُ برتگ –

دمگی مردمانی رد ءَ ھیات ءَ یک مساپر کشیں گاڑی ءِ گون بیتگ کہ آئی ءَ وتی زند ءِ روچاں تیلانک دیگ ءَ بیتگ کہ آئی ءِ گیشتریں رؤ آ تربت ءُ ھوشاپ ءَ بیتگ اَنت-

زانگ بہ بیت بلوچستان ءِ جتائیں جاھاں پوجی آپریشن یکشل ءَ برجاہ اَنت ءُ مردمانی بیگواھیانی ھال پیداک اَنت –

سیاسی ءُ چاگردی مردمانی گوشگ اِنت کہ پاکستانی پوج اگاں مردماں گپت ءُ بارت گڑا آیاں وتی ڈیھی جوڑ کانودانی رد ءَ آمیدگس ءَ پیش بہ کنت –