نبشتانک: تئی نواھیں گنوک
نبشتہ کار: مھتاج بلوچ
اے گپ ءَ ھر کس سرپد ءُ زانتکار اِنت وھدے زھگ پیداک بیت آئی ءَ ماس ءُ پِس پہ لاڑکی رودین اَنت ئِے ۔
پنچ شش سال ءِ اُمبر ءَ کیت آئی ءَ را وانگجاھے ءَ پہ وانینگ ءَ دیم دے اَنت دانکہ زھگ ءِ باندات روژنا بہ بیت ، آئی ءِ سور ءُ سَربرے وھد کیت بزاں جوان بیت آئی ءِ سور ءِ چِن ءُ لانچ ءَ کن اَنت دانکہ آ پِسے ءِ کرد ءَ پیلو بہ کنت ۔
ھمے وڑ منی ماس ءُ پِساں ھم من ءَ پہ لاڑکی رودینت ءُ وانگ ءَ دیم دات وتی وس ءُ واک ءِ کساس ءَ ، بلے چُشکہ ما بلوچیں ءُ بلوچ چہ کرناں گُلامی ءِ آس ءَ سُچگ اِنت !
اے آس داں مئے لوگ ءَ ھم سر بوتگ ۔
من ءَ یات اِنت من شش ءِ مکتب ءَ وانگ ءَ اِت آں ، اے وھد ءَ ( بی ایس او ) وتی موج ءُ مستیانی دور ءَ اَت ھمک روچ وانگجاہ ءُ بازاراں ترگ ءُ زھر شانی کنگ ءَ اِت اَنت ، سیاسی سرکل دیگ ءَ اِت اَنت ھمُک روچ مراگش اَت ۔
چُشکہ اے وھد ءَ منی اُمبر اِنچو نہ اَت کہ من بی ایس او ءِ گاماں گوں ھمگام بہ باں بلے وھد گوزان بوت ءُ سلاہ بندیں گَلاں سر کشاں کُت گڑا منی اُبیناکی ھم رُدان بوت ، یک نیمگے آجوئی ءِ مارشت ءُ دومی نیمگ ءَ گُژن ءِ آس اَت پِس وتی وس ءُ واک ءَ جُھد ءَ اَت کہ من ءَ بوانین اِیت ءُ یک شریں زانتکاریں انسانے جوڑ بہ کنت بلے وھد ءَ موہ نہ دات ، وانگ ءِ ھرچ ءُ درچ چہ پِس ءِ بستار ءَ بُرزتر بوت اَنت ۔
گڑا من سوڑگ کت کہ پِس ءِ ھمکوپگ بہ باں ۔
ھمے رنگ ءَ وانگ یل دات ءُ روزگار ءِ دُمب ءَ کپت آں !
وھد گوزان ءُ من مزن بوان اِت آں ، پہ آجوئی ءَ جنگ ءُ داوائی بستار نیست اَت پمیشکا من سوشل میڈیا ءَ وتی جُھد برجاہ داشت ءُ جاورانی سر ءَ نبشتہ کت ، داں انی ءَ ھم وتی نبشتہ ءِ جُھد برجاہ داشتگ ۔
انسان ھرچی مستر بیت آئی ءِ واھشت ھمینچو گیشتر بنت ، یک روچے تئی اکسے سوشل میڈیا ءَ دپ کپت !
وسر ءَ وت گُش ئے من ءَ گوں ترا مھر بوت ،
من باز جُھد کت ءُ دل ریپینت ، تو دست سرپدی ءِ نیمگ ءَ چہ دور داشت بلے تو زان ئے مھر چونیں نادراھی یے ؟
روچ پہ روچ مھر گیشتر ودان اَت ، چوناھا باز رند ءَ دل ءَ گُشتگ ترا ھال بہ کن آں ءُ وتی دل ءِ گرانیں بار ءَ بزاں مھر ءِ درشانی ءَ بہ کن آں بلے دست ءُ دپ ءَ ھمراھداری نہ کُتگ ۔
یک روچے تئی نزیکیں ھمکارے ءَ گوں ھال بوت ۔ آئی ءَ من ءَ پُرس اِت .” مُھتاج چیزے وھد اِنت تو سک پریشان ئے ھیر اِنت ؟”
چُشکہ آ گوں من سک نزیک ءُ پد ءَ منی جوانیں سنگتے ءَ چہ ابید پہ من براتے ، پمیشکا من گُمائی ءَ وتی اشکندیں مھر ءِ کسہ آؤرت !
آ سک ھیران ءُ اَبکہ بوت ، تسلہ دات ئے ، بازیں سنگتانی کسھے آؤرت اَنت بلکیں من ترا بے ھیال بہ کن آں ، چہ اے نادراھی ءَ بہ رَکّاں بلے گنوکیں دل ءَ نہ مَنّ اِت ۔
چوناھا باز براں من نمدی نبشتہ کُتگ بلے اِنچو ھاٹیگ نہ بوتگ کہ پہ ترا روان اِش بہ دے آں !
مرچی من دل ءِ سر ءَ سنگے ایر کتگ ءُ وتی کسہ ءَ نبشتہ کنگ ءَ آں پہ تو ۔
بہ گند ئے ایشی ءِ وانگ ءَ پد تو کندگے بہ جن ئے ءُ ھمے بہ گُش ئے ، گنوکانی کمی نہ اِنت مئے چاگرد ءَ ۔
ھو منی وڑیں گنوک باز اِنت ۔
گرداں ننداں تئی اکس منی چمانی دیم ءَ درنجوک اِنت !
چُشیں گال نیست منی کوریں سسا ءَ کہ پہ تو بہ شکسا آں ءُ وتی مھرانی کچ ءُ کساس ءَ بہ گیشین آں ۔
بلے نوں تئی اِشک ءِ بوجیگ بُڑان اِنت ءُ زمین ءِ اِشک سَھرا بوان اِنت ۔
آ وھد ءَ من سوشل اکٹویسٹے ءِ نام ءَ زانگ بوت آں ءُ مرچی سرمچارے ءِ نام ءَ ۔
زی تئی اِشک ءَ ملنگ ءُ دیوانگے اَت آں ، ترا جیڑ اِت ، مرچی زمین ءِ اِشک ءَ ملنگاں زمین ءَ جیڑ آں ۔
پرچاکہ زمین ءِ اِشک تاھیر بکش اِیت ، جنکے ءِ اِشک بے تاھیر کنت ۔
اَنی شپ ءِ ادار چار اِنت ءُ منی پاسپانی ءِ زمہ ھلاس بوگ ءَ اِنت ، پمیشکا وتی نبشتانک ءَ چہ ھمد ءَ پیچ آں ءُ ترا رُکست کن آں ۔
اگاں زند ءَ وپا کت ھال ءُ اھوال بیت ۔
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔