بلوچستان ءَ بیگواھیانی درچ برجاہ، کیچ ءَ چہ دو مردم بیگواہ

بلوچستان ءَ بیگواھیانی درچ برجاہ، کیچ ءَ چہ دو مردم بیگواہ

دی بلوچستان پوسٹ

ٹی بی پی پتر ءَ سربوتگیں ھالانی رِد ءَ بلوچستان ءِ دمگ کیچ ءِ ھنکین بلیدہ ءَ پاکستان ءِ پوج ءَ آپریشن ءِ میان ءَ دو ورنا آوار جتگ ءُ جتگ بیگواہ کرتگ اَنت –

سرجمیں ھالانی رِد ءَ گوستگیں شپ ءِ کساس ساھت دو ءَ پاکستانی پوج ءَ کیچ ءِ دمگ بلیدہ میناز ءَ لوگے ءَ بیڑ بُرتگ آپریشن کنان ءَ دو ورنا مختار ء مجید ءُ عبدلوھاب ء ملا حکیم آوار جتگ ءُ گوں وت بُرتگ انت-

بلوچستان ءِ تھا زورانسری آوارجنیانی رِد یکشل ءَ برجاہ اَنت، گوستگیں روچاں کیچ ءِ دمگ پیدارک ءَ پاکستانی پوج ءَ زوراکی کنان ءَ وقار ء ھاشم ءُ دشت ءَ چہ عبدلقدوس، کولواہ ءَ واجد ء مھمد، مھمد علی ء واجد، الھی بکش ء تلاھو ھوار دگہ بازیں مردمے آوار جنگ ءَ پد بیگواہ کرتگ اَنت – چیزے روچ پیسر بلوچستان ءِ دمگ آواران ءَ چہ شلی بلوچ نامیں زالبولے ھم چہ پاکستان ءِ پوج ءِ دست ءَ اوار جنی ءِ ھال ھست انت-

دومی نیمگ ءَ بیگواھیں مردمانی یل کنائینگ ءِ ھاتر ءَ جد ءُ جھد کنوکیں گل وائس فار بلوچ مسنگ پرسنز ءِ بنجل شال ءِ پریس کلب ءِ دیم ءَ برجاہ انت کہ اود ءَ بازیں بیگواھیں بلوچ ورنایانی کھول زھرشانی کنگ ءَ اَنت –