کیچ ءَ سلاہ بندیں مردمانی تیرگواری، لیویز کارندھے بیران

کیچ ءَ سلاہ بندیں مردمانی تیرگواری، لیویز کارندھے بیران

دی بلوچستان پوسٹ

سر بیتگیں ھالانی رد ءَ کیچ ءِ دمگ زامران نوانو دشتک ءَ ناشناسیں سلاہ بندیں مردمانی تیرگواری ءَ یک لیویز کارندھے بیران بیتگ –

دمگی مردمانی رد ءَ ناشناسیں پرپٹ سواریں مردماں مروچی نوانو دشتک ءَ تیرگواری کرتگ ءُ چریشی ءَ چہ یونس ھسین نامی ئیں لیویز کارندھے بیران بیتگ –

لیویز بنشون ءِ رد ءَ تیرگواری ءَ پد لیویز ءِ کارندھے لاش چِست کنگ بیتگ ءُ اُرشکارانی پَٹ ءُ پولی بیگ ءَ اِنت –

زانگ بہ بیت زامران بلوچستان ءِ ھما جنگ زدگیں دمگانی تہ ءَ ھوار اِنت کہ اود ءَ ھمک روچ جنگ ءُ چوپانی ھال پیداک اَنت –

مروچی کُشتگیں لیویز کارندھے کوش ءِ سوب تنی وھدی زانگ نہ بیتگ –

ھمے وڑ ءَ دگہ یک وھیلے بلوچستان ءِ دمگ ھزدار تھسیل وڈھ ءَ زمین ءِ جیڑھے ءِ سر ءَ تیرگواری بیتگ-

دی بلوچستان پتر ھال ءَ سر بیتگیں ھالانی رد ءَ وڈھ ءَ پیش اتکگیں وھیل دو ٹک ھمل زئی ءُ گرگناڑی ءِ زمین ءِ جیڑھے ءِ سر ءَ جنگ بندات بیتگ – ھردوکیں نیمگاں یکے دومی ءِ سر ءَ تیرگواری کرتگ ءُ یک مردمے زدگ کرتگ – زدگ کرتگیں مردم ڈسٹرکٹ ھسپتال ءَ سرکنگ بیتگ –

ھمے وڑ ءَ دالبندین ءَ تیرگواری ءِ وھیل ءَ ناشناسیں مردماں تیرگواری کرتگ ءُ اھمد نوتیزی زدگ کرتگ –

دمگی مردمانی رد ءَ زدگ بیتگیں مردم لس بینکے ءِ ملازم اِنت ءُ ھسپتال بنشون ءِ رد ءَ زدگ بیتگیں مردم بنداتی درمان ءَ پد شال ءَ برگ بیتگ ءُ آئی ءِ جاور گھتر اَنت –