نبشتانک: بلوچی زبان ءِ دربرگ ءَ کسانیں پنتے
نبشتہ کار: اتیکہ بلوچ
دلگوش: باید انت ما بلوچ وتی جِند ءِ راجی زبان بلوچی ءَ بہ وان این ءُ پد ءَ کم کم ءَ نبیسّگ ءَ ھیل بہ گر ایں۔ من شُمارا اے ھم نہ گْوش آں کہ شُما یکپارگی بلوچی ءَ نبشتہ بہ کن اِت ءُ وت ءَ تکانسر بہ کن اِت چی ءَ کہ شُما اے وھد ءَ بلوچی نبشتہ کنگ ءَ ھیل نہ اِت بلے من شمارا ھمے سر ءُ سوج کنگ لوٹ آں کہ شُما پیسر ءَ بلوچی نبشتانک ءُ آزمانکانی وانگ ءَ بندات ءُ ھیل بِکن اِت ءُ پد ءَ چہ گوگل ءَ بلوچی کلیتاک(Balochi Keyboard) ءُ بزانت بلد (ڈکشنری) ءَ ماں وتی گوانکواں ایرگیج بہ کن اِت۔ چریشی ءَ پد پہ راجی زبان ءِ نبشتہ سْیاھگ ءِ دربرگ ءَ بلوچی درونتاں بہ وان اِت گُڑا پہ بلوچی زبان ءِ دیمروی ءُ چاگردی ءِ بابت ءَ گْونڈ گْونڈیں نبشتانکاں گوں بلوچی ءِ کْوھن ءُ زگریں گالاں نبیسّ اِت، آیاں دو رند ءَ چمشانک بہ دے اِت کہ ردی اش مہ بنت ءُ ایشی ءَ پد وتی یک زانتکاریں استاد ءُ سنگتے ءِ نیمگ ءَ راہ ئِے بہ دے کہ آ ھم چمشانکے بدنت ئِے گُڑا من دلجمی ءَ گْوش آں کہ شُما راجی زبان ءَ زیت بلد بہ اِت۔
ما دلگوش بِہ بَہ ایں کہ راجی زبان ھما وھد ءَ دیمروی کنت وھدیکہ ما وتی راجی زبان ءَ گوں زگریں گالاں نبشتہ بکن ایں ناں کہ ما بلوچی ءِ نبیسّگ ءَ پارسی ءُ ھندی ءِ گالاں ھوار کن ایں۔ چوناھیگا ما دُراہ راجی زبان ءِ نودربر ءُ ھزمتکار ایں۔ پد ءَ وھدیکہ تو راجی زبان ءَ زبر بہ ئے گُڑا اے تئی راجی زمہ واری بیت کہ تو وتی دوست ءُ سنگت، سْیاد ءُ وارساں ھم راجی زبان ءِ وانگ ءَ سکین ءُ دلبڈی بہ دے کہ ھمے داب ءَ بلوچی ءَ بہ وان اَنت کہ تو وانتگ ءُ دربُرتگ۔
بلوچ راج ءَ وتی راجی زبان ھر ھال ءُ جاور ءَ وانگی اِنت چی ءَ کہ راجانی پجّار آیانی راجی زبان اَنت ءُ بے زبان ءَ راج گار ءُ بیگواہ بنت۔ وھدیکہ ما وتی راجی زبان ءَ بہ وان ایں گُڑا ما وتی راجی زبان ءِ بستار ءُ ارزِشت ءَ زان این ءُ زبان دوست بہ ایں، اگاں ما زبان دوست بوتگ ایں گُڑا ما ابرمی راج دوست بہ ایں۔ وھدیکہ بلوچ راجدوست بوتگ اَنت گُڑا سرجمیں بلوچ راج ڈیھ دوست بیت چریشی ءَ بلوچ چاگِردی ءَ راجی مارشت ودی بنت چیمشکا ما گْوش ایں کہ بے زبان دوستی ءَ کس راجدوست ءُ ڈیھ دوست نہ بیت اگاں راج ءِ توک ءَ راجدوستی ءُ ڈیھ دوستی نہ بوتگ گُڑا راج گار ءُ وَار بیت۔
اے یک ٹوھیں راستی یے کہ زیردستیں بلوچ راج ءَ مُدام وتی راجی زبان بلوچی ءُ براھوی ماں وانگجاھاں وانینگ نہ بوتگ بلکیں بلوچ ڈیھ سد جاہ ونڈ ءُ چُنڈ کنگ بوت ءُ پد ءَ بلوچ راج ءِ راجی زبان ھم ماں رکشانی، سلیمانی ءُ مکرانی ءِ نام ءَ بَھر ءُ بانگ کنگ بوتگ۔۔۔۔۔
نی باید اِنت بلوچ راج ءِ ورنا ماں چاگِردی رسانکدر ءَ وتی راجی زبان ءَ گوں زگریں بلوچی ءِ گالاں کارمرز بہ کن انت بزاں بلوچ راج وت ماں وت بلوچی ءُ براھوی زبان ءَ گپ ءُ رپ ءَ بہ بنت کہ بلوچ راج چَہ پارسی ءُ ھندی ءَ وازمندگ مہ بیت ءُ چریشی ءَ راجی زبان دیمروی کن اَنت۔
راج ءَ بلوچی ءِ نبشتہ دربرگ ءِ سوج ءُ پنت کنگ ءِ ھاتر ءَ اے کلوہ ءَ دیم ءَ روان کن اِت
ھُدا گُلیں بلوچ راج ءَ بلوچی ءِ وانگ ءُ نبیسّگ ءَ باھندیں ھُب ءُ واھگے بہ دنت۔ آمین ءُ شالا انچوش بات۔
بلوچ زندگ بات اَنت ءُ بلوچ راج ءِ زھگ شالا زیت وتی راجی زبان ءَ ماں وانگجاھاں وانات اَنت ءُ راجی زبان دیمرویاں سربات۔ شالا انچوش بات۔
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔