تربت ءَ بیگواھیں ماسٹر یوسف شش سال گوازگ ءَ پد ھم یل کنگ نہ بوتگ

تربت ءَ بیگواھیں ماسٹر یوسف شش سال گوازگ ءَ پد ھم یل کنگ نہ بوتگ

ماسٹر یوسف 8 ستمبر 2014 پوجیاں آوار جنگءَ پد بیگواہ کُتگ-

دی بلوچستان پوسٹ

دی بلوچستان پوسٹ پتر ھال ءَ سربوتگیں ھالانی رِد ءَ بلوچستان ضلع کیچ ءِ دمگ جمک گورکوپ ءِ جھمنند ماسٹر یوسف ھان ء گُنڈی گوستگیں شش سالاں چہ بیگواھی ءَ ابید انگت یل کنگ نہ بوتگ – ماسٹر یوسف ھشت ستمبر دوھزار ءُ چاردہ ءَ بیگاھے ساھت ءَ پوجیاں چہ جمک ءِ بازار ءَ آوار جتگ ءُ بیگواہ کتگ-

ھندی اھوالکارانی رِد ءَ ماسٹر یوسف یک اِس اِس ٹی ماسٹرے بوتگ تربت ءِ دمگ چاھسر ءِ وانگجاہ ءَ وتی پرز ءَ پیلو کنگ ءَ بوتگ –

ماسٹر یوسف ءِ بازیں وھداں بیگواھی ءِ بگیری ءَ آئی کھول ءُ چاگردی مردماں سرکاری ادارہ ءُ ھاکماں چہ لوٹ ءُ زھرشانی کُرتگ ءُ آئی ءِ آوارجنی ءِ بھتام کانود جوڑ کنوکیں ادارھانی سر ءَ لڈ اِتگ ءُ بازیں براں اے لوٹ کنگ بوتگ کہ اگاں ماسٹر یوسف کُتکار انت گڑا آ ملکی کانودانی متابک ءَ آمیدگس ءَ آرگ بہ بیت – یات بہ بیت دوسال ءَ پیش آئی ءِ مات وتی چُک ءِ راہ ءَ چاران ءُ پہ وداریگے بیران بوتگ –

بلوچستان ءَ بیگواھیں مردمانی یل کنائینگ ءِ ھاتر ءَ برجاھیں گل وائس فار بلوچ مسنگ پرسنز ءِ رِد ءَ تنی وھدی بلوچستان ءِ تھا چِل ھزار ءَ گیش بلوچ زورانسری آوار جنی ءَ پد بیگواہ کنگ بوتگ اَنت – وی بی ایم پی، ایمنسٹی انٹرنیشنل ھوار دگنیا ءُ ھندی انسانی ھکانی ھاتر ءَ کارکنوکیں گلاں بلوچستان ءَ زورانسری آوارجنیانی بھتاماں پاکستان ءِ پوجی ادارھانی سر ءَ لڈ اِتگ اَنت- بلے دنیگت ءَ پاکستان ءِ پوجی ادارہ اے بھتاماں رد کنگ ءَ اَنت –

زورانسری آوار جنگ بوتگیں مردمانی کھولاں ھم وتی دوستگیں مردمانی بیگواھی بھتام پاکستان ءِ چیریں ادارھانی سر ءَ لڈ اِتگ انت-ءُ بلوچستان ءِ جتائیں پریس کلباں ھوار کراچی ء پریس کلب ءِ دیم ءَ گوستگیں دو دیھک ءَ زھرشانی کنگ ءَ اَنت-

یازدہ سال ءَ پیش جوڑ بوتگیں وائس فار بلوچ مسنگ پرسنز ھمے زورانسریاں آوار جنگ بوتگیں بلوچانی کھولانی گل انت کہ آئی ءِ کار مستر نسراللہ بلوچ ءِ ناکو علی اصغر بنگلزئی 2001 ءَ چہ بیگواہ انت ءُ گل کمک کارمستر ماماقدیر بلوچ پرزند جلیل ریکی بازیں وھدی ءَ بیگواھی ءَ پد آئی ءِ تیر سپتگیں زانگولیں لاش چہ پنجگور ءَ دست کپتگ- وی بی ایم پی گوستگیں 4027 روچاں چہ نہ کُٹوکیں شدکشیں زھرشانی ءَ نشتگ ءُ بیگواھیں بلوچانی یل کنائینگے ھاتر ءَ زھرشانی ءَ اِنت-

یات بدار ات بلوچستان ءَ ائید ءِ روچ ءَ ھم وائس فار بلوچ مسنگ پرسنز ءِ چیردستی ءَ شال ءَ بیگواھیں مردمانی کھولاں مزنیں کچے ءَ یکجاہ بوتگ ءُ روانک کش اِتگ ءُ پریس کلب ءِ دیم ءَ مچی داشتگ ءُ زھرشانی کُتگ- اے وھد ءَ بلوچستان ءِ جتائیں دمگاں چہ بیگواھیں مردمانی کھول اتکگ ءُ وتی زھرشانی نبشتہ کنائینتگ وھدیکہ چاگردی ءُ سیاسی باسکاں بیگواھیں مردمانی کھولانی گوم ءَ دلپدردی درشان اِتگ-