پاکستانی پوج ءِ بندیگ جاھاں یک مردمے یلہ کنگ بیتگ

پاکستانی پوج ءِ بندیگ جاھاں یک مردمے یلہ کنگ بیتگ

دی بلوچستان پوسٹ

دی بلوچستان پتر ھال ءَ سربیتگیں ھالانی رد ءَ ھزدار ءَ آوار پاکستانی پوج ءِ دست ءَ آوار جنگ بیتگیں یک مردمے مروچی یلہ کنگ بیتگ ءُ وتی لوگ ءَ سر بیتگ –

پوج ءِ دست ءَ آوار جنگ ءُ بیگواھی ءَ پد یلہ بیتگیں مردم ءِ پجار زاھد بلوچ ءِ نام ءَ زانگ بیتگ –

زانگ بہ بیت سیزدہ جون دوھزار ءُ بیست ءَ پاکستانی پوج ءَ ھزدار ءِ دمگ گریشگ ءَ بیڑ برتگ ءُ اود ءَ زاھد ءُ دگہ یک ورنائے آوار جتگ ءُ برتگ اَت –

دومی نیمگ ءَ بلوچستان ءَ گار ءُ بیگواھیں مردمانی واستا توار چِست کنوکیں گل وی بی ایم پی ءَ گوشت کہ بیگواھیں مردمانی یل بیگ جوانیں گامگیج اَنت باید اِنت اے گامگیج اوشت ءِ آماچ مہ بیت، ما امیت داریں کہ ایندگہ بیگواھیں بلوچاں ھم یل کن اَنت ۔

وائس فار بلوچ مسنگ پرسنز ءِ شنگ کُتگیں گونڈیں جارے ءِ تہ ءَ گوشتگ کہ سیزدہ جون دو ھزار ءُ بیست ءَ ھزدار ءِ دمگ گریشگ ءَ چہ بیگواہ بیتگیں دو بلوچ ورنایانی تہ ءَ چہ یک ورنایے کہ آئی ءِ نام زاھد بلوچ اِنت یل کنگ بیتگ ءُ وتی لوگ ءَ سربیتگ۔

ھمے وڑ ءَ جرمنی ءُ برطانیہ ءَ بی آر پی ءِ نیمگ ءَ راجن پور ءَ دروگیں دیم پہ دیمی کُشتگیں مردمانی بگیری ءَ زھرشانی کنگ بیتگ –

زھرشانی ءَ برطانیہ ءَ نشتگیں بی آر پی ءِ بنجاھی رھشون منسور بلوچ ءَ تران کنان ءَ گوشتگ کہ راجن پور ءَ ھما وڑ ءَ بیگواھیں بلوچ شھید کنگ بیتگ اَنت ءُ سلاہ بند گوشگ بیتگ اَنت ءُ مارا شک اِنت کہ دگہ بیگواھیں بلوچ ھمے وڑ ءَ کُشگ ءُ دور دیگ مہ بنت –

منسور بلوچ ءَ گْوشت کہ انسانی ھکانی ادارھانی سر ءَ اے پرز بیت کہ پاکستانی سلاہ بندیں پوج ءِ زوراکی ءُ زُلمانی ھلاپ ءَ توار چِست بہ کن اَنت –

زانگ بہ بیت ائید ءَ یک روچے ءَ پیسر پنجاپ ءِ دمگ راجن پور ءَ پاکستانی پولیس ءَ پنچ بندیگیں بلوچ کُشتگ ءُ دور داتگ اَنت ءُ پد ءَ دیم پہ دیمی جنگ ءِ نام داتگ اَنت –

چریشی ءَ پد سوشل میڈیا ءُ یورپی ڈیھاں زھرشانی درچ برجاہ بیتگ اَنت زھرشانیانی جار بلوچ ریپبلکن پاٹی ءِ بنجاھی جارکش شیر مھمد بگٹی ءَ پِرینتگ اَنت –