ھب ءَ دز بمب اُرش، زمہ واری بی ایل اے ءَ من اِتگ
دی بلوچستان پوسٹ
بلوچستان ءِ باپاری شھر ھب ءَ ناشناسیں مردماں یک لوگے ءِ سر ءَ گوں دبمبے ءَ اُرش کُتگ ۔
ٹی بی پی ءَ سربیتگیں ھالانی ردءَ دز بمب ءِ اُرش ھب ءِ شھر ساکران دگ ءِ سر ءَ بستگیں احتشام الحق نامی ئیں مردمے ءِ لوگ ءِ سر ءَ بیتگ ۔
چہ اِشی ءَ پیسر ھم احتشام الحق ءِ سر ءَ دز بمب اُرشانی نشانگ کنگ ءِ جھد بیتگ بلے آ رکیتگ ۔
دومی نیمگ ءَ بلوچ لبریشن آرمی ءِ جارکش جئیند بلوچ ءَ ناشناسیں جاھے ءَ چہ رسانکدراں شنگ کُتگیں درشان ءِ تھ ءَ گوشتگ کہ بلوچ لبریشن آرمی ءِ سرمچاراں دو شمبے ءِ شپ ءَ، بلوچستان ءِ دمگ لسبیلہ ءِ شھر ھب ءَ ساکران دگ ءِ سر ءَ بستگیں یک لوگے ءَ دز بمبے ءَ گوں نشانگ کُتگ،
جارکش ءَ گْوشت کہ اے لوگ پاکستانی چیریں گلانی کارمندانی کارمرزی ءَ بیتگ۔ اے اُرش ءِ مستریں نشانگ گوستگیں ڈی سی ءُ پاکستانی بیوروکریٹ احتشام الحق بیتگ۔
احتشام الحق پاکستانی چیریں گلانی یک توانائیں کارمندے ءُ چیریں گلانی گوشگ ءِ پد ءَ بلوچ راجی جُنز ءِ بگیری ءَ نہ تھنا وت کارءَ اِنت بلکیں ایندگہ چاریگاں ھم آسراتی سر کنگ ءُ کمک کنگ ءَ اِنت ۔
بلوچ لبریشن آرمی اے اُرش ءِ زمہ واری ءَ من اِت ءُ بی ایل اے ءَ چہ ایشی پیسر اے گپ تچک کُتگ کہ چُشیں درستیں مردمانی گوما ھچ وڑیں پَھِلی کنگ نہ بیت کہ تچکیں وڑی ءَ دژمن ءِ ھمراہ ءَ اَنت ءُ بلوچ راجی جُنز ءِ ھلاپ ءَ کار کنگ ءَ اَنت ءُ جُنز ءِ دیم ءَ اڑاند بیگ ءِ جھد ءَ کنگ ءَ اَنت ۔