نبشتانک: واب
نبشتہ کار: ھلیل بلوچ
واب چے یے؟ آیا واب پہ مانا کنگ ءَ گِندگ بنت؟ من نزاناں سائنس واب ءَ چے یے سرپد بیت۔ من وَت ھَم نزاناں کہ واباں مانا ھست یا کہ نیست۔ تھنا ھمنچو زاناں کہ چہ دَر کسانی ءَ من واب دیستگ ءُ پد ءَ سُھب ءَ وتی مات ءِ کَش ءَ نِشتگ ءُ وتی واب گْوشتگ اَنت۔ وھدے کہ مزن بُوتگ آں گُڑا انڈیائی تامُرانی تھ ءَ باز براں ھمے اِشکُتگ کہ شَپ پہ واب گِندگ جوڑ بُوتگ اَنت ءُ روچ ھما واباں پورو کنگ ءِ ھاتر ءَ۔ بَلے من دنیگتا چو سرپد نہ آں کہ کُجام واب پورو کنگ لوٹ اَنت۔ پرچا کہ یک وابے مردُم ئِے۔۔۔
بَلے من اِد ءَ ھما واب ءِ گَپّ ءَ جنگ ءَ آں کہ مردُم وپسگ ءَ پَد کہ نیم مُردگ بیت گِند اِیت ئِے۔ واب گِندگ ءَ پَد واب ءِ سر ءَ باوست کنگ ءُ ھما واباں نبشتہ کنگ من ءَ سکّ دوست بیت۔ پرچا کہ واباں تھر نیست، آزات اَنت۔ واب ءِ تہ ءَ مردُم بالی گُراب ءِ وڑ ءَ بال ھَم کُت کَنت ءُ ھَما کیزی ءِ وڑ ءَ تَچ اِت ھَم نہ کَنت کہ سانکلاں بَستگ۔
من یک گُلامیں چاگردے ءَ چمّ پچ کُرتگ پمشکا منی وابانی تہ ءَ ھَم رگباڑی ءِ تیرانی توار ھست۔ برے سرمچارانی کَتارانی تَہ ءَ من ءَ تُپنگے بڈّ ءَ اِنت گِندگ باں۔ برے چار راہ ءِ سر ءَ تیر سُپتگیں لاشے ءِ دْروشم ءَ وت ءَ گِند آں۔ بَلے من ھِچ بَر سرپد نبوتگ آں کہ اے واباں مانا ھست اگاں اِنّا۔۔۔
من باز واب دیستگ بَلے من ءَ ھوش نہ کَنت کہ کُجام منی اولی واب اِنت پرچا کہ یک روچ ءِ گْونڈُو ھَم واب دیست کَنت۔ بَلے ھَما واب کہ من آئی ءِ کِسّہ گوں وَتی مات ءَ کُرت۔۔۔ ھَمائی ءَ من وَتی اولی واب سرپد باں۔ آ واب چو اے وڑ ءَ اَت۔۔۔
“یک دْراج بالادیں مردُمے مئے لوگ ءِ تَہ ءَ دَور کَنت ءُ منی پَد ءَ کپ اِیت۔ من تچگ بِندات کن آں پہ وَتی مات ءِ نیمگ ءَ۔ مئے لوگ ءَ یک کُروسے ھست اَت ھمے دْراجیں مردُم تچگ ءِ تہ ءَ کُروس ءَ گیپت ءُ سَرگ سِند کَنت ءُ پد ءَ منی نیمگ ءَ تچگ بِندات کَنت۔ اسپیت پَسے ءِ گُٹّ ءَ سادے بستگ ءُ ساد منی مات ءِ دَست ءَ اِنت۔ منی مات ھمے مردُم ءَ گِند اِیت تاں اسپیت پَس ءَ یلا دَنت۔ گُڑا اے مَرد ھمے اِسپیت پَس ءَ زُور اِیت ءُ چہ مئے لوگ ءَ دَرکپ اِیت۔”
وھدے من اے واب ءِ کِسّہ گوں وتی مات ءَ کُت گُڑا منی مات ءَ چہ میتگ ءِ مُلّا ءَ اے واب ءِ مانا جُست کُرتگ اَت۔۔۔ مُلّا ءَ واب مانا کُرتگ اَت ءُ گْوشتگ اَت
“اے یک بَلاھے شُمئے سر ءَ کپگ ءَ اِنت ءُ شُمئے جند ءِ سْیادے شُمارا نُکسان دیگ لوٹ اِیت۔ پمیشکا کُروس ءَ ءُ یک اسپیت پَسے ھیرات بکن اِت۔”
من ءَ شرّی ءَ یات اِنت کہ اے گَپّانی اِشکُنگ ءَ رند من وتی مات ءَ را گْوشت گُڑا اے تئی بْرات ماما کریم اِنت کہ مارا نُکسان دیگ لوٹ اِیت۔۔۔ پرچا کہ واب ءِ مردُم ھَم ماما کریم ءِ وڑ ءَ دْراج اَت ءُ ماما کریم مئے سْیاد اِنت ھَم۔۔۔ گُڑا بیا اِت ماما کریم ءَ کُشیں۔۔۔ پرچا کُروس ءُ اسپیت پسے ھیرات بکنیں۔ منی مات ءَ من ءَ بَد ءُ رِد کُت ءُ ما کُروس ءُ اسپیت پس ھیرات کُت اَنت۔
ھمے واب ءَ چہ پد من زانت کہ واب ھَم زندمان ءِ تہ ءَ ارزشت دار انت۔ وھدے من مزن بوھان بوت آں گُڑا منی وابانی تہ ءَ ھَم بدلی پیداک بُوت۔ جنگ ءُ جدل، لوگانی سر ءَ لشکر کشّی۔۔۔ اے دْرست منی وابانی ھمراہ اِت اَنت۔ بلے انگت من سرجم ءَ وابانی سر ءَبیسہ نہ کُت۔ پد ءَ وتی زندگی ءَ من لھتیں انچیں واب دیستگ کہ آ منی وھم ءُ گُمان ءَ نہ بوتگ اَنت۔ بلے ھما وڑ بوتگ۔ انچو کہ یکبرے من وابے دیست کہ “من ءُ نثار سَباہ اوتھل ءِ مھراج ھوٹل ءِ دیم ءَ پہ ھاران ءِ بَس ءِ ودار ءَ نشتگ ایں۔ بَس کیت نثار بَس ءَ سوار بیت ءُ من نوک وتی بیگ بَڈّ ءَ کُتگ۔ سوار بُوّگ ءَ چہ پیسر بَس رَوَگ بندات کنت ءُ من پشت کپاں۔” شَپ ءَ من اے واب دیست سُھب ءَ من نِٹورک ءَ شُت آں کہ نثار ءَ ھال دے آں کہ من چُشیں وابے دیستگ۔ بلے نِٹورک ءِ رَوگ ءَ گوں من ءَ ھال رَس اِت کہ نثار شھید بُوتگ۔
برے برے انچیں مردُم منی وابانی ھمراہ بُوتگ اَنت کہ زندمانی ءِ تہ ءَ چہ واب ءَ پیسر من گوں آھاں ھِچ دُچار نہ کپتگ آں بَلے پَد ءَ آ وڑے ناں وڑے ءَ گوں من یکجاہ بوتگ اَنت۔۔۔ ھمے وڑ ءَ وتی زِرد ءِ تاھیر ‘ماھَل’ ءِ دْروشم ھَم وابے ءِ توک ءَ دیست۔ چہ واب ءِ گِندگ ءَ کساس دہ ءُ پانزدہ روچ ءَ پَد من گوں ماھَل ءَ دُچار کَپت آں۔ ءُ لھتیں روچ ءِ تہ ءَ ما انچو یکّے دومی ءَ گوں ھمگْرنچ بوتیں گُش ئے ما ھَپت زندمانی یکجاہ گْوازینتگ۔ بوت کَنت پمشکا ماھَل دنیگتا منی وابانی ھمراہ اِنت۔
واب گِندگ الّمی اِنت۔ من چو ھَم زاناں کہ ھر کَس الّم ءَ واب گِند اِیت بَلے ھر واب راست بہ بیت اے الّم نہ اِنت۔
واب زندگی ءِ گْواچنیں رَنگ ءَ پیش دار اِیت۔ واب چہ زندمانی ءِ بندشاں آزات اَنت پمیشکا من وابانی تہ ءَ زندگی ءِ اسلیں دْروشم ءَ گِندگ لوٹ آں۔ وتی زِرد ءِ ھما واھِشت کہ چاگرد ءَ آھانی سر ءَ بندش جتگ وابانی تہ ءَ سرجم کنگ ءِ کوشست کن آں۔
واب مردُم ءَ چہ زند ءِ رُنگراھاں گِستا کن اَنت پمیشکا من گْوشاں کہ واب بہ گِند اِت ءُ وتی زند ءِ اسلیں تَب ءَ سرپد بِہ بَہ اِت۔ داں کہ چہ زِند ءِ دْرستیں تکّ ءُ پھناتانی وشّیاں زِبھر مہ بَہ اِت۔
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔