نبشتانک: بے تواریں ھمبلُک گیرکائے
نبشتہ کار : پولاد سگار بلوچ
مرچی پد ءَ دل ءَ گوشت ند ءَ چست کن چار گالرد بہ نبیس ھمے چاریں گالرد یک انچیں سیدا ءُ سادھیں مردمے ءِ بابت ءَ اَنت ، بہ گند ئے تاں آئی ءِ نام گرگ مہ بیت آ وت زانگ نہ بیت پرچاکہ آ وت سک ءَ بے تواریں ھمبلے اَت، یکے آئی ءِ نام دیم ءَ نہ آیگ گریبی دومی آئی ءِ سادگی بوت کنت ـ
آ یک انچیں گسے ءَ ودی بوتگ کہ پت ءَ پہ وار ءُ بزّگی رودینتگ ، وت مدام پوریاگیری کرتگ ءُ وتی چُک پہ درتہ پوچی دل ئِے نہ بوتگ اَنت اے وھد ءَ بزگیں مردم چوناھی ءَ گار اَنت زوراکی یکشل ءَ گوں انچیں بے وساں بوتگ اَنت ـ
بَلے!! آئی ءِ گار ءُ بیگواھی ءَ سَے سال ءَ چہ گیش وھد گوستگ یکروچے یکجاھے ءَ آئی ءِ نام گرگ بوگ ءَ نہ اِنت، مدام من ننداں ءُ جیڑاں ھیال ءَ ئِے کپ آں اکس ئِے چمّانی دیم ءَ اوشتاتگ من ءَ دل ءَ لاچار کرت پہ ند ءِ چست کنگ ءَ ھمے گار ءُ بیگواھیں پُسگ بلوچ ءِ چُک اِنت، آ را ھم مات ءَ نُھ ماہ لاپ ءَ کرتگ ءُ دوسال پُریں میچینتگ، شپ پہ بے وابی گوازینتگ اَنت ءُ دگہ بازیں ازیت کش اتگ اَنت ـ
کھول ءِ مردم دراہ ناوانندہ اَنت، پوریاگیری کن اَنت وتی زند ءِ روچاں تیلانک دیگ ءَ اَنت مھنتی ءُ بے کساس مھروانیں مردم اَنت، بس گریبی ءُ بے مردمی ءَ جتگ اَنت، وت مدام ھرکسی کار ءَ اتکگاں ، نوں وھدیکہ لاچاری ءَ گپتگ اَنت، گڑا ھچ کس آوانی کار ءَ آیگ نہ اِنت ءُ ھچ کس نیمگ ءَ اِش نیم چمّی چارگ ءَ تیار نہ اِنت، وتی کس ءُ سنگت ءُ دِگراں یک ھساب ءَ بے مھر ءُ شموشکار بوتگ اَنت، اے وھد ءَ پھک دل ءَ بُرتگ اِش، آ چوشیں دَری مردمے نہ بوتگ کہ چو دل ءَ برگ بیت بلکین ءَ آ ھم بلوچ ءِ پُسگے ـ
من زاناں کمو وانوک تکانسر بوگ ءَ اَنت ، اے مردم کے اِنت …؟
انگت نام ئِے دیم ءَ آرگ بوگ ءَ نہ اِنت ، ھمے مردم سک ءَ کم مردماں دیستگ ءُ زانتگ نوں کایاں کسہ ءِ جند ءِ نیمگ ءَ
اے مردم کے اِنت..؟
کُجا نشتگ ءُ چی کار ءُ کسب کتگ ئِے ..؟
ھو!! نام ئِے نور بکش اِنت واجھیں پت ءِ نام ئِے وشی اِنت، بلے !! گیشتر مردم وشی ھوٹل والا گوش اَنت ئِے ماں جائو (جھاؤ) دمب الی مھمد میتگ ءَ جاہ منند اِنت، کار ءُ کسب پوریاگیری کنت ءُ وتی زند ءِ روچاں ھمے وڑ ءَ تیلانک دیگ ءَ اِنت ـ
وھدے نور بکش رُستگ اَت پہ پوریاگیری ءَ کدی مند ءُ تمپ ، کدی تربت ءُ گودار ءَ ءُ کدی بہ جالگی ءَ مزدُوری ءَ شتگ اَت، اگاں وتی ھند ءَ اتکگ ءَ اَت گڑا پِت ءِ جاہ ءَ کار کرتگ ئِے بزاں کہ ھوٹل ءَ شتگ لھتیں وھدے بوتگ وتی اِلاک ءِ تہ ءَ ساڑی بوتگ ءُ بزگری کرتگ ئِے ـ
بیست سوچکان دوھزار ھبدہ ءَ چست کنگ بوتگ انگت ھچ وڑیں ھالے نیست، جند ءِ کھول دراہ ناوانندہ اَنت کہ جاھے ءَ برو اَنت آئی ءِ آجوئی ءِ ھاتر ءَ دو گپّ بہ جن اَنت بہ گند ئے پہ گپّ جَنگ ءَ دپ اِش پچ بوگ ءَ نہ اَنت دراھیں درد ماں وتی سینگ ءَ جاگہ اِش داتگ اَنت، اے کاسگ چٹیں میرانی سواسانی سر ءَ کنگ ءَ روگ ءَ نہ اَنت ـ
نور بکش ءِ بیگواھی ءَ تیوگیں جھان سھی اِنت، نیشنل پارٹی ءِ رھشون میر ھیرجان بلوچ ءِ نزدیکیں ھمساھگے ھست اِنت، دومی گوں بلوچستان اسمبلی ءِ انوگیں اسپیکر کدوس بیزنجو ءِ مردمانی ھمساھگ اَنت اے درگت ءَ ھچ کسی گوشاں مورے نہ وارت اِنت پہ گار ءُ بیگواھیں نوربکش ءَ گپّے بہ جَن اَنت دراہ کرّ ءُ گُنگ اَنت ـ
آئی ءِ واجھیں پِت وشی بلوچ چوشیں مردمے نہ اِنت سھب ءُ بیگاہ برو میرانی منتوار بہ بیت، اگاں برُت ایدگہ دَراھیں زھگاں شُد کُش ایت، ھند ءِ ایدگہ مردم انچو نشتگ ءَ ندارگ چارگ اَنت باریں چی بیت …؟
باید ھمیش اَت پہ وشی بلوچ ءِ گس ءِ وشیانی آرگ ءَ مردم یکجاہ بوتین اَنت گپّ اِش بہ جتیں پرچا کہ بیگواھیں نوربکش ءِ مات ءُ گُھارانی دل ءَ جمبوریں آسے روک اِنت، باریں ودار ءِ گرانیں نوبت کدی آسر بنت ….؟
بے تواریں ھمبلُک آجو بِہ بات ئے مدام گیرکائے ـ
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت