بلوچ نسل کُشی ءِ سر ءَ بے توار بیگ انسانیت ءِ واستا تاوانبار بیت اِنت، ماما قدیر
دی بلوچستان پوسٹ
شال ءِ پریس کلب ءِ دیم ءَ بیگواھیں بلوچانی ءُ شھیدانی کھولانی نیمگ ءَ برجم داشتگیں گدان ءَ مروچی 4016 روچ سرجم بیتگ –
شدکشی گدان ءَ ھمدری درشانگ ءَ بی ایس او ءَ چہ امیر داد بلوچ، بلگ شیر بلوچ ءُ دگہ مردین ءُ زالبولانی بازیں کَچے ءَ بھر زرتگ –
وائس فار بلوچ مسنگ پرسنز ءِ کسان کمک سرکماش ماما قدیر بلوچ ءَ بنجل ءَ اتکگیں مردمانی گون ءَ گْوشت کہ بلوچستان ءَ ھمک آیوکیں روچاں بلوچانی بیگواہ کنگ ءُ بندیگ جاھاں ترندیں لَٹ ءُ کُٹ کنگ ءَ پد کُشت ءُ کوشی ءُ لَٹ داتگیں کُنٹانی دزکپگ ءَ چہ بنگلہ دیش ءَ پاکستانی پوج ءِ بنگالیانی نسل کُشی ءِ یاد نوک بیان اَنت – پاکستانی زوراکی براھنگیں رنگے ءَ دنیا ءِ دیم ءَ پدر اَنت بلے بدبھتی ءَ چَہ دنیا ءِ وتی ھیشاں گوں دزبند اِنت – آیانی گور ءَ زیردستانی ھوناں چہ گیش آیاں وتی واھشت دوست تر بنت – آ وتی واھشتانی سوب ءَ بے توار اَنت – ھمے وڑ ءَ زرچاریں رسانکدر درستاں وتی سرھال ءُ کاروباریاں دیم ءَ کنت ءُ رسانکدر ءِ واھشت ھم ڈیھاں گوں بندوک اَنت ھمے واستا ھمے واھشتی یے دنیا ءَ بلوچ ءِ وڑیں زیردستیں راجانی توار چیر تریت ءُ پَشکپ ایت، اے زرچاریں جھان ءَ ھم کجام راجے ءِ سر ءَ کرتگیں رویشی یے زُلماں دنیا ءِ واستا جوانی یے نیست اِنت کہ اود ءَ میان اُستمانی زورانی واھشتانی سیادی مہ بیت –
آئی ءَ گْوشت کہ نِی اے بلوچ راجداریں پاٹیانی کار اِنت کہ آ وتی تھی جیڑہ ءُ سُک سُکاں یلہ بہ کن اَنت کم چہ کم بلوچ نسل کُشی، بلوچستان ءَ بیوکیں پوجی آپریشن ءُ بلوچ پُسگانی آرمی ءِ دست ءَ آوار جنگ ءَ پد کوشیانی جیڑھانی سر ءَ یکجاہ بہ بنت ءُ یک ھمگرنچیں زھرشانی ءِ بہ کن اَنت بدبھتی ءَ اے جیڑھانی سر ءَ ھم مئے ھمبل یکجاہ نہ اَنت ءُ دنیا ءِ سر ءَ چی گِلگ –
ماما قدیر ءَ گْوشت کہ گڈی ءَ من بس ھمینچُک گْوش آں میان اُستمان ءُ دگہ میان اُستمانی زورامندیں ادارھانی بلوچ نسل کُشی ءِ سر ءَ بے تواری سرجمیں انسانیت ءِ واستا تاوانباری یے بیت اِنت پرچاکہ زُلم ءِ سر ءَ بے توار بیگ گیش زُلم ءِ رودینگ اِنت -بلوچ راستی ءَ پاکستانی زُلمانی تہ ءَ چیر ترگ اِنت بلے اے ایوک ءَ بلوچ راج ءِ واستا یک انسانی ھلاسی ءِ نہ اِنت بلکیں میان اُستمانی ھلاسی یے –