روکپتی بلوچستان ءَ نامی ئیں ازمکار بیران

روکپتی بلوچستان ءَ نامی ئیں ازمکار بیران

دی بلوچستان پوسٹ

سر بیتگیں ھالانی رد ءَ روکپتی بلوچستان ءِ دمگ پھرہ “ایرانشھر ” ءَ نامی ئیں ازمکار رسول بکش زنگشاھی مروچی بیران بیتگ –

دمگی مردمانی رد ءَ پھلوان رسول بکش زنگشاھی ءَ بازیں وھدے بیتگ کہ شکر ءِ نادراھی ءِ آماچ بیتگ –

آیاں گْوشت کہ پھلوان ءَ وتی زند ءِ تہ ءَ وتی ازم جوانی ءَ درنگاز کرتگ ءُ آئی ءَ بازیں جاھاں وتی ازم ءِ درنگازی کرتگ –

دمگی مردمانی رد ءَ پھلوان رسول بکش زنگشاھی جوانیں سروز جن اِیں مردمے بیتگ کہ آئی ءَ وتی سروز ءِ زور ءَ ازم درنگاز کرتگ –

آیاں گْوشت کہ پھلوان رسول بکش ءَ داں وتی زند ءِ گُڈی روچاں ھم بلوچی ءُ بلوچی سروز یلہ نہ کرتگ ءُ ھرچی کہ آئی ءِ وس ءُ واک ءَ بیتگ آئی ءَ سروز ءِ سر ءَ وتی ازم درنگاز اِتگ –

دمگی لبزانکارے ءَ ٹی بی پی ءَ گوں گپ کنان ءَ گوشت کہ پھلوان رسول بکش ڈراں ڈیھاں ھم پہ ازمگری ءَ برگ بیتگ –

آئی ءَ گْوشت کہ پرانس ءُ جرمنی ءَ ھم پہ ازم ء درنگازی ءَ پھلوان بازیں براں شتگ کہ اود ءِ مھلوک ءُ ازمکاراں پھلوان ءَ را جوانیں شرپ بکش اِتگ –

لبزانکار ءَ گْوشت کہ پرانس ءَ پھلوان کہ اولی رند ءَ سروز ءِ جنگ ءَ برگ بیتگ گڑا اود ءَ پھلوان ءَ را ڈاکٹری ءِ “لقب ” دیگ بیتگ ءُ ھمے وڑ ءَ جرمنی ءَ ھم پھلوان پہ سروز ءِ ازم ءِ درنگازی ءَ برگ بیتگ ءُ ایشی ءَ ابید بازیں ملکاں شتگ –

آئی ءَ گْوشت کہ پھلوان شکر ءِ نادراھی ءَ گیپتگ ءُ آئی ءِ پاد برگ بیتگ چریشی ءَ چہ پاد ءِ وش نہ بیگ ءِ سوب ءَ پھلوان وتی ھنکین پھرہ ءَ شتگ ءُ اود ءَ زند ءِ گُڈی روچاں گوازینان بیتگ ءُ مروچی اے کوڑھیں امروز ءَ چہ شتگ –

آئی ءَ گْوشت کہ روکپتی بلوچستان ءِ بازیں جاھاں پھلوان پہ سروز ءَ نامینیں مردمے بیتگ ءُ ھرکس آئی ءَ سروز ءُ ازم ءَ سرپد اِنت ءُ مروچی آئی ءِ روگ ءَ چَہ بازیں مردم بے تاھیری ءَ سوکیک کرتگ اَنت –