نبشتانک: نمدی یے پہ مکھیں مات ءِ نام ءَ
ندر پہ نمیرانیں شھداد جان ءَ
نبشتہ کار: سازین بلوچ
دی بلوچستان پوسٹ
بلوچی شعبہ تربت۔
ماتی! تو وش ءُ جوڑ ئے ؟ من امیت کن آں تو گل ءُ شاد ءُ شادمان ءُ جمبر مدام تئی سر ءَ ساھل بات اَنت۔
ماتی ترا گپے گُشگ لوٹ آں ! یک پیر زالے مدام کیت منی دل ءِ در ءَ جنت ءُ آئی ءَ زندمان ءِ سرجمیں کسہ گشان ءِ لمب ءَ بستگ اَنت ۔
بلے ماتی ! من نزاناں زند ءِ کسہ چہ کجا بندات بیت ءُ کجا آسر !
مرگ ءِ کسہ ءُ زندمان ءِ کسہ ! اے درو مان گیش اِتگ اَنت ، اَنچو سما بیت انگت بندات نہ بوتگ اَنت ۔کسہ چوں نبشتہ بہ کن آں چونیں لبز گچین بہ کن آں ؟ کَس نیست پہ سر ءُ سوج کنگ ءَ ، بازیں نندگ ءُ جیڑگ ءَ اَنچو سما بیت گْوش ئے لبز چہ من ءَ دل پروش اَنت !
آ نہ لوٹ اَنت کہ من آیاں کاگدے ئے دیم ءَ بہ کمایاں ۔
پھل کن ماتی ! من پیر زال ءِ گپ ءَ اِت آں ، بلے گپ گپ ءَ دگہ سرھالے ءَ شُت آں ۔
اے پیرزال چونیں انسانے ؟ گْوش ئے سرجمیں زندمان ءِ کسھانی نبیسوک اِنت یا اَنچو بہ گْوش دراھیں کسہ ریکورڈ کتگ ءُ ایشی ءِ دماگ ءَ جاگہ داتگ اَنت !
ماتی پیرزال ءَ ویل کن ، ایشی ءِ کسہ ترا بور کنت ۔
راستاں ماتی ! ترا یاد بیت تو مدام من ءَ شاھو ،شاھو ءِ نام ءَ توار کتگ اَت ؟
من باز براں جیڑ اِتگ بلکیں ترا دوست نہ بوتگ آں ، تو پمیشکا نیم نام ءَ توار کتگ ۔ھاھاھاھاھاھا امّاں مزاک کنگ ءَ آں وت ءَ پریشان مہ کن ، تو منی ھال ءَ سرپدے ۔ دست نہ اوشتی کندگ مسکرہ مزاک ، اے چہ کسانی ءَ منی ھمراہ اَنت ۔
ماتی تئی پُرشتگیں چمانی تہ ءَ کسھے گندگ بیت ۔
ماتی تو زان ئے اے کسہ کئی کسہ اِنت ؟
اے کسہ نمیرانیں کمبر ، نمیرانیں الیاس نزر ، نمیرانیں رسول جان ءِ کسہ اَنت ۔ھمے زی منی ھمراہ بوتگ اَنت بلے مروچی۔۔۔۔۔۔۔؟؟؟؟؟
امّاں! مروچی ھمے ناسرجمیں کسہ ھمک پیر زال ءِ گُشان ءِ لمب ءَ بستگ اَنت ۔
ماتی ! من زانان ترا یاد بیت کہ اسلام آباد ءَ مئے سر ءَ اُرش کنگ بوت تو منی انگھیں چمانی وابانی تہ ءَ گریوگ ءَ اِت ئے ۔تو منی اندار ءِ در جت ءُ پرس اِت کہ ابّا شاھو تو جوڑ ءُ سلامت ئے؟؟؟
من بچکند اِت ءُ پسو دات ھا ھا ھا ھا من شکر آں سلامت آں ۔
ماتی ! بابا قاضی گْوش اِیت ۔۔۔
کجا دراتک ءُ شت اَنت واھگانی چم ءِ چراگ
ھزار پند ءِ ارادہ کتگ اے ارواہ ءَ
جگر نہ ست گوں یاتانی گونڈلیں تیران
کجام مات ءِ جگر آبلہ نہ اِنت مرچاں
کجام گوھار نہ جیڑ اِیت پہ تنگھیں براتاں
کجام برات وتی کوپگاں نہ دنت کوپگ ۔
ماتی ! وتئی گوھریں ارسان مہ گوار کہ زندمان ءَ گوں ھزار کسہ پیچ ءُ تاب وارت ءُ پد ءَ ھمک بنیادم ءِ کسہ ءِ جند ۔۔۔
امّاں اگاں تو آتک ئے منی چارگ ءَ گڑا الم تو یک کسھے بیار ۔
اماں بلوچستان ءِ ھمک پیر زال ءَ را الم جنگی کسہ یاد اَنت ؟؟
تو زان ئے اماں من چونیں کسہ یاد کتگ ؟
منی کسہ چہ تھاریں کوٹیاں بنا بنت ءُ چہ بلوچستان ءِ دْرچک ،دار، کواہ ءُ کوچگ ءَ چہ آسر بَینت ءُ پد ءَ تھاریں کوٹیانی کسھانی تہ ءَ ارس گواری ، ھون شنزی بیت ۔
بلے اماں چہ بہ کن آں کسہ ھمیش اَنت۔ اگاں چہ مرگ ءَ رند زندگ بوھگی اِنت گڑا ھمے کسہ زندگ دارگی اَنت ۔
قدر دانی کی یہاں پر شرط بس ایک موت ہے۔۔
آپکی بھی قدر ہوگی،پہلے مر تو جائیے۔۔۔
ماتی! من ھم لوٹ آں کہ منی زندمان ءِ کسہ ءَ باند ءَ یکے نبشتہ بہ کنت ۔۔۔
زندمان ءِ کسہ آسر نہ بنت اگاں بنت پد ءَھم دگہ کسھے بنا بیت۔ انوں بادشاہ ءُ وزیر ءِ کسہ ھلاس ءُ انوں نبشتہ ءِ جنگی ءُ پدائی ءِ کسہ بندات بوتگ اَنت۔
ماتی منی کسہ انچو نبشتہ کنگ بیت کہ من چہ وتئی کرتگیں اھد ءَ پشت ءَ مہ کنز آں۔
گار باں ، بیگواہ باں ،توپان باں بلّے سید
اے شنگان ءَ کسے جت مکن کہ پشت ءَ کنزاِتگ۔
منی مرگ ءِ کسہ ءِ اشکنگ ءَ تو اوں پھر بند ئے بلے منی ھمراہ منی دوست ءُ سنگت کتاب الم چہ من ءَ دل گران بنت ۔۔۔۔۔الماری ءِ کتابان سلام کن۔۔۔!!!
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت